И покрај тоа што дигитализацијата на матичните книги започна пред повеќе од една деценија и во неа се вложени над 520 милиони денари или осум и пол милиони евра, Државниот завод за ревизија укажува дека сè уште не е завршена дигитализацијата на матичните книги.
Скенирани се 52 проценти од записите во матичните книги, а внесени во електронскиот матичен регистар се 49 проценти од записите. Ваквиот степен на реализација, според ДЗР, не овозможува поедноставување и забрзување на услугите за граѓаните, ниту пак, доведува до подобрување на квалитетот на податоците што ги користат надлежните институции согласно своите законски надлежности.
Според државниот ревизор Зоран Ристовски, системските слабости се најголемиот проблем. Според пресметките на ревизорите, за внесување на податоци во електронскиот систем се ангажирани 286 лица кои ако би имале по 100 внесувања на ден во матичниот регистар, за една година би биле внесени четири милиони записи. А, и матичарите во подрачните единици имаат ваква обврска.
- Околу 8ипол милиони евра се вложени во целиот систем. Никој не може да каже дали е тоа малку или многу, ако се гледат ефектите врз основа на што граѓаните ќе добијат подобри услуги. Имаме проблем во делот на рализација на процесот, ако нема ефект од вложените средства, тогаш проблемот е на другата страна. Дополнително, документите што ќе ги добиете по електронски пат, многу малку можете да ги користите за вашите потреби во администрацијата,- - Зоран Ристовски Државен завод за ревизија.
Констататирано е дека Управата се уште нема спроведено попис на матичните книги по матични подрачја. Дел од книгите се оштетени, а дел од архивската граѓа од трајна вредност веќе не може да се користи за потврдување на запишаните податоци.
Анализата на податоците покажува дека 92 проценти од електронските изводи се издаваат во Скопје, додека во поголемите градови како Прилеп, Битола, Охрид и Тетово бројот на издадените изводи е значително помал. Во помалите и рурални средини, како Гевгелија, Делчево и Пехчево, употребата на електронските услуги е речиси занемарлива.