ДЗР: Утврдени неправилности во управувањето со имотот, инвестициите и човечките ресурси во АД МЕПСО- Скопје - Канал 5

Македонија

ДЗР: Утврдени неправилности во управувањето со имотот, инвестициите и човечките ресурси во АД МЕПСО- Скопје

АД МЕПСО Скопје остварува раст на приходите, но се соочува со сериозни слабости во управувањето со имотот, инвестициите и јавните средства, што директно влијае врз ефикасноста и развојот на електропреносниот систем. 

ДЗР: Утврдени неправилности во управувањето со имотот, инвестициите и човечките ресурси во АД МЕПСО- Скопје

Државниот завод за ревизија изврши ревизија на финансиските извештаи заедно со ревизија на усогласеност на Операторот на електропреносниот систем на Република Македонија, Акционерско друштво за пренос на електрична енергија и управување со електроенергетскиот систем, во државна сопственост Скопје, (АД МЕПСО Скопје) за 2024 година.

Ревизорите утврдија дека, иако надлежните служби во континуитет преземаат активности за усогласување на работењето на друштвото со позитивните законски акти, утврдени се слабости во евиденцијата и регулирањето на сопственоста на електропреносната инфраструктура, вклучително и земјиштето. Дел од имотот нема уреден правен статус, a има и имот за кој нема точна сметководствена евиденција.

Преносната мрежа на АД МЕПСО Скопје интегрира 112 далекуводи, при што за 53 далекуводи запишано е правото на сопственост во Агенцијата за катастар на недвижности, додека за 59 далекуводи друштвото не располага со имотни листови . За овој имот отпочнати се постапки за утврдување на правниот статус, но истите се сложени и долготрајни поради големиот број локации и нерешените имотно-правни односи, а во одредени случаи не може да се утврди основот за стекнување на правото на сопственост.

Сѐ уште, постојат нерешени имотно-правни прашања во врска со 33 трафостаници кои се во заедничка сопственост на АД МЕПСО Скопје и ЕВН Македонија АД , при што за истите запишано е право на сосопственост само на ЕВН Македонија АД или се во постапка на запишување на права на сопственост/постапка на преземање. Друштвото во повеќе наврати иницирало постапки за решавање на сопственоста на трафостаниците. Во 2025 година формирана е заедничка работна група, која договорила процесот да се реализира во два фази, преку меѓусебен пренос на право на сосопственост (соодветен идеален дел) на трафостаниците запишани на име на секое од друштвата, додека за неизложените трафостаници утврдување на фактичката состојба и конечно уредување на сопственичките права продолжува.

Дополнително утврдено е дека со расположливите податоци во воспоставената сметководствена евиденција на далекуводите и трафостаниците (евидентирани се по делови, на различни сметки за градежни објекти, постројки и опрема и со неусогласени називи) не е можно да се потврди нивниот број и вредност. Оваа состојба влијае на висината на тарифата за пренос на електрична енергија, која се утврдува со одлука од страна на РКЕ, а врз основа на сметководствените податоци и финансиски евиденции доставени од страна на АД МЕПСО Скопје.

Материјалните средства во подготовка не се правилно признати и евидентирани , при што дел од нив се однесуваат на завршени проекти кои не се ставени во употреба (74.176 илјади денари или 1.202.200 евра), а за дел не може да се потврди нивната состојба, потреба и оправданост поради недостиг на документација (19.100 илјади денари). Поради ненавремено признавање на овие средства не бил пресметан и признат трошок за амортизација во претходниот и тековниот период, што влијание и на остварениот финансиски резултат од работењето.

Исто така, на остварениот резултат од работењето за 2024 година влијае и не искажаниот трошок по основ на расходувани средства со сегашна вредност од 16.386 илјади денари утврдени по попис, како и непресметаната амортизација на дел од ново набавените материјални средства и инвестициите со кои се зголемува корисниот век на употреба, капацитетот и функционалноста на средствата во вкупен износ од 16.419 илјади денари . Ревизорите во извештајот обелоденуваат дека во изминатите тринаесет години АД МЕПСО реализира значајни инвестициски активности за изградба, реконструкција, ревитализација и модернизација на електропреносната мрежа , при што е утврдено дека степенот на нивна реализација се движи од 9% до 62% .

Кај дел од проектите постои зголемување на вредноста на склучените договори, пролонгирање на рокот за нивната реализација, а два договори кои делумно биле реализирани се раскинати. Kај три проекти има зголемување на вредноста на првично склучените договори, при што најголемото зголемување од 51% (1.481.657 евра) е кај проектот "Ревитализација на 110kV ДВ ТС Скопје 4-ТС Велес" чиј износ по зголемувањето изнесува вкупно 4.393.609 евра, додека најголемото пролонгирањето од пет години и осум месеци е кај проектот “Реконструкција на 110kV Далекувод ТС Битола 1-ТС Прилеп”. Истовремено за проектот "Изградба на ДВ 110 kV ТС Валандово - ТС Милетково", иако во јуни 2024 година одобрен е заем од ЕБРД во износ од 26.400.000 евра, сè уште не се започнати активности за изградба, поради што за одобрување на заемот и провизија за неповлечени средства платени се 155.672 евра (22.205 евра во 2024 година). Овие состојби негативно влијаат врз модернизацијата и сигурноста на преносната мрежа и упатуваат на потреба од поефикасно управување со инвестициските проекти.

АД МЕПСО Скопје користи повеќе кредитни линии од меѓународни финансиски институции за финансирање на инвестиции, при што значителен дел од одобрените средства не е повлечен, што резултира со дополнителни трошоци за провизии и камати. Вкупниот износ на одобрени тековни заеми изнесува 102.400.000 евра, од кои 52% или 53.434.992 евра не се повлечени, за што во 2024 година платена е провизија во износ од 245.629 евра (2.633.953 евра за периодот откако се одобрени заемите, се до крајот на 2025 година) .

Заклучно со 2024 година, за земените заеми, платени се провизии за одобрување и неповлечени средства, како и камати во вкупен износ од 8.996.052 евра, што претставува 8,8% од вкупниот износ на одобрени заеми. Ненавременото користење на заемите го зголемува финансискиот товар и ја забавува реализацијата на стратешките проекти за електропреносниот систем. Побарувањата по дадени заеми на акционерски друштва во државна сопственост изнесуваат 591.990 илјади денари (приближно 9.594,652 евра) и истите се повеќе од 10 пати зголемени во однос на 2020 година.

Давањето заеми не е основна дејност на АД МЕПСО Скопје, поради што ваквата практика негативно влијае врз ликвидноста и финансиската состојба на друштвото. Дел од побарувањата на друштвото (12%) се постари од три години , при што најголем дел од нив се побарувања по основ на предизвикан дебаланс од страна на правни лица – трговци на електрична енергија (БОС), како и на побарувања за користење на прекугранични преносни капацитети. За наплата на доспеаните побарувања преземени се мерки преку репрограмирање и извршни постапки, но за одредени предмети кои се од постар датум не беа образложени причините кои довеле до состојба побарувањата да не се наплатат.

Имајќи ја во предвид старосна структура на побарувањата, како и неизвесноста на долготрајните извршни постапки, истакнуваме дека постои неизвесност во однос на нивната наплата. Со извршената ревизија утврдивме дека приходите од основната дејност – пренос на електрична енергија бележат раст , главно поради повисоките тарифи за пренос, иако количината на пренесена енергија има благ пад. Истовремено, приходите од прекуграничните преносни капацитети значително се зголемуваат, дебалансите во преносната мрежа покажуваат тренд на стабилизирање, а загубите во мрежата се намалуваат, иако трошоците за нивно покривање остануваат под влијание на цените на електричната енергија.

Кај 65% од нововработените лица (45) утврдени се неправилности во однос на исполнувањето на условите од јавниот оглас и актот за систематизација и распределбата на работните места, а кај дел од нив кратко по вработувањето е извршено прераспределување или унапредување. Во 2024 година АД МЕПСО Скопје беше цел на сајбер напад кој предизвика привремена недостапност на дел од ИТ системите и податоците, без притоа да биде нарушен преносот на електрична енергија.

Настанот укажа на потребата од дополнително зајакнување на сајбер безбедноста преку технички и организациски мерки. Во извештајот ревизорите ја потенцираат потребата од санирање на оштетената фасада во 2020 и 2021 година, за чија реконструкција и адаптација во периодот од 2013 до 2018 година биле потрошени 547.058 илјади денари, односно приближно 8.866.400 евра . Со ревизијата утврдени се и други состојби кои се однесуваат на извршениот попис, расходувани средства, пријавената кражба, реализацијата на Годишната инвестициона програма, начинот на финансирање на синдикалните организации при АД МЕПСО Скопје, отчетноста на ангажираните лица преку авторски договори, начинот на доделување спонзорства и донации и други состојби кои имаат влијание врз работењето на друштвото.

Тагови: ДЗР мепсо

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Бизарно

Бугаринот Николај стана светски шампион- изел 76 лути пиперчиња (ВИДЕО)

Бугаринот Николај „ Papaworm“ Филипов е новиот светски шампион во јадење лути пиперки!

Бугаринот Николај стана светски шампион- изел 76 лути пиперчиња (ВИДЕО)

Тој ја освои титулата „Лига на огнот“ по директен дуел со трикратниот светски шампион и носител на Гинисов рекорд, Стивен „Фајери Ред“ Керган.

Тие ја измерија својата сила во 14 рунди

Историското финале се одржа на 3 октомври на сцената на фестивалот „Софија Чили Фест 2026“, пред голема публика.

Филипов со победата го освои шампионскиот појас „Лига на огнот“ и го задржа во Бугарија. Неговиот успех е кулминација на долгогодишно натпреварување, подготовки и настапи на меѓународни натпревари.

Дуелот се претвори во вистински тест на издржливост за двајцата натпреварувачи. Филипов и Керган ја измерија својата сила во 14 рунди, кои траеја вкупно еден час и 38 минути, објавува Moreto.net.

На натпреварувањето се користеа специјално подготвени пиперчиња, чија лутина надмина 1,5 милиони единици Сковил, додека во две рунди натпреварувачите консумираа сосови со повеќе од шест милиони единици Сковил.

„Беше тешка борба“

Секој од финалистите изеде повеќе од 76 пиперки, што е рекорд во историјата на светските финалиња. Победникот беше решен во првата рунда на брзина.

„Немам зборови да опишам колку сум среќен. Беше тешка борба и до последниот момент дадов сè од себе, бидејќи знаев каква можност е ова - за мене, но и за Бугарија“, рече Филипов веднаш по победата.

Тој му честиташе на својот противник за борбата и спортскиот дух, и им се заблагодари на своето семејство, тимот „Чили Хилс“, „Лигата на огнот“, како и на сите фанови кои го поддржуваа на лице место и онлајн.

Американецот Стивен „Фајери Ред“ Керган пристигна во Бугарија како актуелен трикратен светски шампион во „Лигата на огнот“. Само неколку дена пред финалето, тој постави и светски рекорд во Гинис, бидејќи изеде 50 пиперки „Гост Пепер“ за помалку од пет минути.

Тагови: пиперчиња

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Се огласи ЕУ по сомнителниот случај на чума во Русија: Будно ја следиме состојбата

Брисел и Вашингтон „внимателно“ ја следат ситуацијата во Сибир, каде што се сомнева дека се појавила чума по смртта на лабораториски работник.

Се огласи ЕУ по сомнителниот случај на чума во Русија: Будно ја следиме состојбата

Европската комисија „многу внимателно“ ја следи наводната појава на пневмонична чума во Сибир, Русија, и е подготвена да координира одговор меѓу земјите-членки доколку е потребно, објавува „Еуроњуз“.

Ситуацијата излезе на виделина откако работник во Иркутскиот истражувачки институт за борба против чума почина на 2 октомври откако наводно скршил епрувета што го содржела патогенот на чума. Причината за смртта е наведена како „пневмонија со непозната етиологија“.

Инцидентот доведе до воведување превентивни мерки во регионот. Околу 200 лица кои биле во контакт со лабораторискиот работник се ставени под строг медицински надзор.

Руските власти сè уште не потврдиле појава на чума, но извештаите предизвикаа загриженост низ целиот свет.

„Свесни сме за извештаите за инцидент во лабораторија во Русија, за кој се вели дека е поврзан со предизвикувачкиот агенс на чумата“, изјави портпаролот на Европската комисија во понеделник.

„Јавното здравје е секогаш приоритет за нас, поради што сме во контакт со нашите експерти во Европскиот центар за превенција и контрола на болести. Многу внимателно следиме што се случува“, додаде портпаролот.

Пневмонската чума е брзо прогресивна белодробна инфекција предизвикана од бактеријата Yersinia pestis, која се пренесува преку респираторни капки за време на близок контакт. Има висока стапка на смртност, но може успешно да се лекува со современи антибиотици.

„По Ковид, многу сме подобро подготвени за пандемии“, рече портпаролот, истакнувајќи дека земјите имаат залихи на антибиотици.

Европската комисија добива информации за ситуацијата преку Светската здравствена организација (СЗО), која собира податоци од руските власти. Директните контакти на Москва со европските партнери се значително ограничени од почетокот на војната во Украина.

Засега, Европската комисија не планира да свика посебен состанок или да воведе итни мерки. Реакцијата на Брисел е слична на онаа на Вашингтон.

Американскиот Стејт департмент соопшти дека „внимателно“ ја следи ситуацијата и ја повика Москва да „обезбеди точни информации брзо и отворено“. Европската комисија, исто така, ја нагласи потребата од „навремено и транспарентно известување“.

Чума не е регистрирана во Европа повеќе од 50 години.

Тагови: русија чума

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Октоберфест урива рекорди- го посетиле 7,4 луѓе, испиле 6,7 милиони литри пиво

Најголемиот фестивал на пиво во светот го заврши овогодинешното издание со бројки какви што никогаш порано не биле видени. 

Октоберфест урива рекорди- го посетиле 7,4 луѓе, испиле 6,7 милиони литри пиво

Околу 7,4 милиони луѓе го посетија Октоберфест во Минхен за само 16 дена, поставувајќи нов историски рекорд, објави Бизнис.

Претходниот рекорд го држеше изданието од 2023 година со 7,2 милиони гости, додека минатата година околу 6,5 милиони луѓе поминаа низ познатите минхенски порти. Ова значи дека Октоберфест привлече приближно 900.000 посетители повеќе за само една година.

Високата посетеност беше придружена и со огромна потрошувачка. За време на фестивалот беа потрошени околу 6,7 милиони „масовни“ кригли пиво, секоја содржеше по еден литар.

Потрошувачката на пиво со тоа се зголеми за 2,7 проценти во споредба со минатата година, кога беа потрошени околу 6,5 милиони литри. Во исто време, продажбата на безалкохолни пијалоци се зголеми за десет проценти.

Милиони гости пристигнуваа во Минхен

Овогодинешниот Октоберфест траеше од 19 септември до 4 октомври, а особено големо зголемување на посетеноста беше забележано во текот на работните денови.

Според податоците од градот Минхен, бројот на гости од понеделник до четврток во текот на првата недела се зголемил за 18,5 проценти, а во втората недела за дури 28,9 проценти.

Организаторите дел од успехот го припишуваат на доброто време, но и на кампањата што ги охрабруваше посетителите да доаѓаат на фестивалот во текот на работните денови со цел да ги олеснат традиционално најпрометните викенди. Меѓу странските гости, особено се издвоија Американците, Италијанците и Австријците.

И покрај рекордниот број луѓе, организаторите велат дека благодарение на новиот безбедносен концепт и управувањето со движењето на посетителите, немало неконтролирано пренатрупаност на фестивалската област.

Се обиделе да однесат 105.000 кригли

Зад рекордната посетеност, имало некои прилично необични бројки. Посетителите се обиделе да однесат дури 105.000 од познатите кригли за пиво од литар од Октоберфест, кои персоналот ги собрал пред да завршат надвор од просторот на фестивалот.

Службата за изгубени предмети не останала без работа ниту. Пронајдени се околу 4.000 предмети, вклучувајќи повеќе од 1.000 парчиња облека, речиси 700 паричници и околу 450 лични документи.

За 16 дена, потрошени се приближно 2,65 милиони киловат-часови електрична енергија, додека милионите гости оставиле околу 92 тони отпад.

Продажбата на храна, исто така, се зголеми. Угостителите во големите фестивалски шатори пријавија раст од два до три проценти, а традиционалното печено пилешко повторно беше меѓу најбараните јадења.

Директорот на Октоберфест, Кристијан Шарф, процени дека фестивалот е на списокот на многу луѓе со работи што сакаат да ги доживеат барем еднаш во животот.

Судејќи според бројките од оваа година, интересот за традицијата е ненамален - 191-от Октоберфест стана најпосетениот во речиси двовековната историја на настанот. Следниот Октоберфест ќе се одржи од 18 септември до 3 октомври 2027 година.

Тагови: Октоберфест пиво

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер