Од Министерството за односи меѓу заедниците во време на раководењето на Артан Груби се исчезнати 30 лаптопи, над 25.000 евра, се точело гориво и за возила кои не се на оваа институција, а Државниот завод за ревизија констатирал дека едно лице работело се и сешто, додека други земале плата без да се појават на работа. Извештајот што денеска го објави ДЗР се однесува на работата на Министерството во 2024 година, во времето кога се смени власта. Во обемниот извештај се вели и дека 61 процент од 244 вкупно вработени во институцијата не се знае дали воопшто оделе на работа.

-За исплата на плати и надоместоци за 244 вработени во Министерството, исплатени се 165.010 илјади денари, од кои за 150 вработени по Потпрограмата К5 -Соодветна и правична застапеност на заедниците и како преведувачи, или за 61% од вработените, исплата на плата се врши без да се обезбеди доказ за присутност на работа и за полно работно време, и покрај воспоставената електронска евиденција на работното време за вработените, велат од ДЗР.

Ревизорите утврдиле и дека 8.367 евра биле исплатени за гориво без да се врши контрола на регистарските таблици и видот на набавеното гориво, со што вработените си овозможиле полнење на приватни возила на државна сметка. Евидентирани се бројни злоупотреби и на тендерски постапки и јавни набавки.

-Ревизорите утврдија нецелосно спроведен попис на средствата и обврските со состојба на 31.12.2024 година, при што 28% од вкупните основни средства со сегашна вредност од 1.565.000 илјади денари, односно 25.360 евра, не се пронајдени при вршењето на годишниот попис на основни средства, а како резултат на невоспоставена пракса на издавање реверси за задолжување на вработените со опремата која им е доделена на користење, исто така 30 преносни компјутери не се пронајдени со пописот – ДЗР.

Државни пари министерството доделило и на 33 здруженија и фондации во висина од 320.900 евра, но ревизијата утврдила дека 17, треба да вратат средства во Буџетот на државата во висина од 19.850 евра, бидејќи не доставиле докази за трошење на средствата.

Вицепремиерот и министер за односи меѓу заениците Иван Стоилковиќ, кој го наследи Груби на оваа позиција, а на чија иницијатива беше свикана ревизијата кога го презеде министерското место, за Канал 5 вели дека е задоволен од наводите во ревизијата, кои како што вели биле утврдени и од нив самите во министерството.

-Многу е важно што ДЗР прв пат влегува во оваа институција да изврши ревизија. Што укажува дека ова функционирало подолго време надвор од институциите на системот и надвор од контрола на државнбиот систем. Сето ова што е наведено во извештајот на ДЗР сите поединчени случаи се документирани и предаде на надлежните органи, што до Обвинителство, што до финансиска полиција, така што од тој аспект ние сме очистиле се што се очекувало од нас. Наведено е и во извештајот на ДЗР Нема веќе седење дома, земање плата, расчистивме со таа работа, изјави Стоилковиќ.

Стоилковиќ вели дека сите нивни податоци за злоупотребите во министерството се доставени до надлежните органи. Засега скопското обвинителство официјално го гони екс вицепремиерот за милионските злоупотреби во Државна лотарија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.