Државниот завод за ревизија во најновиот извештај објавен денеска информира дека скоро 700 илјади примероци книги во вредност од 6,5 милиони евра скапуваат во подрумите на Министерство за култура, Националната библиотека и уште неколку установи, за што неодамна информираше и Канал 5 телевизија.

Книгите се дел од големиот проект за печатење и превод на книги кој започна во 2009 година, кога премиер беше Никола Груевски. Ревизорите наведуваат дека не е извршен попис за утврдување на фактичката состојба, како во однос на бројот на книги, така и за условите во кои тие се чуваат, што може да доведе до оштетување на истите.

„Поради непостоење на план за дистрибуција на отпечатените и не дистрибуираните книги, се создава значителен проблем со сместувањето на оваа голема количина, дополнително усложнет од недостигот на интерес од државните институции за преземање на книгите поради исполнетост на нивните капацитети. Исто така, не е извршен попис за утврдување на фактичката состојба, како во однос на бројот на книги, така и за условите во кои тие се чуваат, што може да доведе до оштетување на истите“, се наведува во извештајот на - Државен завод за ревизија.

Во насока на решавање на овој проблем, Владата во повеќе наврати донела одлуки за трајно отстапување на дел од овие количини кај повеќе библиотеки и образовни институции и во изминатиот период веќе им била извршена дистрибуција на дел од отпечатените книги, но не постои интерес ниту простор за прием на дополнителни количества.

Дел од проектот за превод и печатење книги беа „Ѕвезди на светската книжевност“, „Врвови на светска филозофија, историја, психологија и психоанализа“, „Светско книжевно богатство„, „Антологија на светска поезија“, “135 тома македонска книжевност” и други.

Од ДЗР препорачуваат одговорните во Министерството за култура во соработка со националните установи каде се чуваат книгите да извршат попис со обезбеден податок за проект, наслов, количина и локација на чување на истата, да се обезбеди соодветен простор за чување на книгите со цел да се заштитат од евентуални оштетувања, а министерството во соработка со Владата да ја преиспита состојбата со книжниот фонд во министерството и останатите институции и да изготви план за распределба на книгите до крајните корисници и пошироката јавност со насоки за соодветна евиденција и начин на користење.

-Со реализација на капиталните проекти за печатење на книги, постапено е спротивно на буџетските начела на економично и наменско користење на средствата од причина што книгите сѐ уште се наоѓаат во магацините на националните установи и истите не се дистрибуирани до крајните корисници или до пошироката јавност за да ја постигнат целта за која се печатени. Оваа состојба беше констатирна и со ревизорскиот извештај за 2019 година, но состојбите не се сменети“, велат од Државниот завод за ревизија.

Во последните седум години ова е втора ревизија за работата на Министерството за култура извршена од Државниот завод за ревизија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.