Од грчката полиција соопштија дека по темелна истрага на полициската станица Касандра, беа расветлени вкупно 13 кражби во различни делови на Халкидики.

Уапсениот бил откриен додека управувал возило што со неговиот соучесникот претходно го украле од крајбрежна област на Халкидики, а откако не одговорил на наредбите на полицијата, се обидел да побегне пеш, но брзо бил фатен.

Според истрагата, уапсениот и неговиот соработник претходно украле чанта од лице кое било на плажа, во која имало 1.500 евра, 200 романски леи, 100 бугарски лева, мобилен телефон и клуч од возило, кое потоа било украдено од местото каде што било паркирано.

Соучесникот, исто така државјанин на Грција, кој е во бегство, но е идентификуван, во понеделникот бил забележан додека управува украдено возило, кое заедно со уапсениот го украле на 27 август 2025 година од двор на куќа во Халкидики.

При полициски сигнал за запирање, со голема брзина возел кон полицаецот, но без да го повреди, по што избегал.

- Понатамошната истрага на полицијата откри дека, од крајот на јули до почетокот на септември, двајцата мажи, дејствувајќи заедно, извршиле уште 12 кражби во различни области на Халкидики, а поконкретно: шест кражби од туристички сместувачки капацитети, каде што во еден случај отстраниле и паркиран автомобил со клучот што го украле од туристичкиот објект; две кражби од куќи, при што од една украле и паркиран автомобил од дворот; две кражби на торби од капачи, а во едната имало клуч од автомобил, со кој го украле и паркираното возило; една кражба на чанта од пешак и една кражба на мотор, соопштија од грчката полиција.

Во извршените 13 кражби одзеле вкупно четири автомобили и еден мотор, 5.595 евра, 1.850 српски динари, 1.000 долари, 500 швајцарски франци, 600 бугарски лева и 200 романски леи, накит во вредност од над 10.000 евра, два часовници и два пара очила за сонце, два мобилни телефони, како и банкарски картички, документи и други предмети.

Паралелно искористиле три од украдените банкарски картички и подигнале 1.320 евра од банкомат.

Кај уапсениот биле пронајдени и одземени 380 евра и 1.850 српски динари, кокаин со тежина од 0,6 грама, два клуча од возило и два мобилни телефони.

Од грчката полиција информираа дека украденото возило што го управувал уапсениот, како и дел од украдените предмети им биле вратени на сопствениците./МИА.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.