Живот

Древниот дебарски храм заблеска за Цветници, благодарение и на христијаните и на муслиманите

По повод празникот Цветници, кој традиционално се одбележува во овој возобновен божји храм, црквата „Успение на Пресвета Богородица“ во Дебар, денеска, како некогаш што било, беше преполн со верници, постојани и поранешни жители.

По повод празникот Цветници, кој традиционално се одбележува во овој возобновен божји храм, црквата „Успение на Пресвета Богородица“ во Дебар, денеска, како некогаш што било, беше преполн со верници, постојани и поранешни жители кои за празникот се тука, но во голем број присуствуваа и жители од други градови на државава.

-Завршувајќи ја душеполезната Велика Четириесетница, благодарение на Свештената Бигорската Обител, пред се на владиката Партениј, заедно го одбележавме празникот на Влегувањето на Господ Исус Христос во Ерусалим – Цветници, како најава за конечниот триумф на Животот над смртта. Ме потсетува на некои поодамнешни години, кога тука живевме многу голем број православни. Од срце им благодариме на Свештената бигорска обител и владиката Партениј, вели Јованка Василевска, врз чии плеќи се надвиснати осум децении.

Со Божествената Архиерејска Литургија, чиноначалствуваше Неговото Преосвештенство, Епископот Антаниски г. Партениј, заедно со Бигорските архимандрити, јеромонаси и дебарскиот свештеник Миле Ангеловски.

За сите дебрани, како што самите велат, денешниот ден е голем ден.

-Верувам дека и ѝ направиме чест на Пресветата Владичица наша Богородица, заради оваа нејзина црква-паметник со големо историско и духовно значење, а им оддадовме чест и благодарност на богољубивите предци, коишто со голема пожртвуваност ни го оставиле ова велелепно и свето наследство што ете сега го гледаме возбновено и во сиот свој сјај, додава Евангелија Грбиќ од Кичевскиот хор Митрополит Козма Пречистански, кој пак, денеска милозвучно пееше на богослужбата, но изведе и неколку каланди во возобновениот трем на храмот.

Црквата „Успение на Пресвета Богородица“ е сместена во населбата Варош, во горниот дел на градот изградена е во 1840 година и е една од најубавите преродбенски цркви.

-Таа е во вистински спомен на духовниот и градителски дострел на нашите предци од тој славен период, имајќи ги предвид и тешките општествени и економски услови и ограничувања. Порано била главен соборен храм на Дебарското архиерејско намесништво и била седиште на Дебарската митрополија. Потврда за тоа е и фактот што и ден денес просторот до црквата ние дебрани го нарекуваме митрополија, вели Душан Казанџиевски претседател на црковниот одбор на дебарската парохија.

Тој денеска од страна на владиката Партениј беше одликуван со орден Претеча заради сите негови заслуги околу историскиот храм.

-Возљубени дебрани, мили браќа, сестри и чеда. Знаете дека минатата година, заедно со малкуте православни дебрани од градот, започнавме да го обновуваме овој свет и славен Храм на Царицата Мајка Богородица. Лани започнавме со нешто малку, но годинава обновивме многу повеќе. Ги реставриравме столбовите, ги променивме распаднатите греди на храмовиот балкон, ја очистивме целата црква и сосема го возобновивме тремот, кој сега е навистина прекрасен. Кога пред два месеца започнавме интензивно да обновуваме и да градиме, доста средства ни пристигаа од нашите Христијани ширум целата наша возљубена Македонија. Во делото, пак, на возобновата најмногу се потруди благочестивиот господинот Душан Казанџиовски од Дебар, чесен и угледен човек од стара дебарска фамилија, еден од малкутемината храбри коишто останаа да живеат тука. Во обновата, исто така многу се потруди и сестра Елисавета од манастирот во Рајчица. Да знаете дека сите што работеа на храмот, секое утро уште пред 5 часот доаѓаа овде, остануваа некогаш и до полноќ, само за да би го завршиле навреме, рече владиката Партениј.

Затоа, додаде, дозволете ми, во оваа свечена прилика, по одлука на советот на старците од Бигорскиот манастир, да го одликуваме нашиот возљубен Душан Казанџиовски со највисокото манастирско одликување – орденот „Претеча“, заради неговите особени трудови, заложби, пожртвуваност и љубов за овој свет и сечесен храм.

- Бездруго, тој неуморно работи и се грижи за Црквата, и да ви исповедам нешто лично – сум го гледал како лее солзи кога црквата пропаѓаше, а го гледам и денес кај повторно плаче, но сега од радост. Овој добар човек го почитуваат сите граѓани од Дебар. Кога и да поминеше низ дебарската чаршија изминатиов период, нашите драги сограѓани, честитите Албанци кои знаат што правиме, му даваа средства, за да ја помогнат обновата на Црквата, па така Душан секојпат се враќаше во храмот со парични даренија. Затоа се молиме и нив Бог да ги благослови. Денеска на Божествената Литургија се помоливме и за сите граѓани на овој град, без разлика на нивната национална припадност, без разлика на нивната вера, оти сите ние сме возљубени деца на Господ, со вдахновеност и радост истакна владиката Партениј.

Благодарност, искажува и сестра Ефимија, до сите дебрани, без разлика на нивната верска или етничка припадност.

-Тука сме со посебно чувство на заедништво и припадност, на благодарност кон Бога и едни кон други заради ова големо дело што во толку кратко време успеавме да направиме да изгледа вака.

Им се заблагодаруваме на сите Дебрани, без разлика на нивната вера или националност, кои несебично ја даваа својата помош во текот на последните 2 месеци откако започнаа активностите на возобнова на храмот, додава сестра Ефимија.

Вредните дебранки за неколкуте стотина прсутни верници подготвија и богата закуска. /МИА.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Забава

Бројот четири ја одбележа најуспешната година на Влатко и Златко Миладиноски

Четири турнеи на 4 континенти, четири големи солистички концерти, четири значајни награди и признанија, а наскоро и четврти солистички албум – бројот четири на необичен начин ја одбележа изминатата година во кариерата на Влатко и Златко Миладиноски

Во изминатиот период, македонската музика ја претставија пред публиката во Америка и Канада, Европа, Азија и Австралија. Четирите меѓународни турнеи ја потврдија нивната сè поголема популарност меѓу македонската дијаспора, но и посветеноста со која ја промовираат македонската песна надвор од границите на земјата.

Истовремено, зад нив се и четири солистички концерти одржани на некои од најзначајните концертни сцени во Македонија – Македонската опера и балет во Скопје, Античкиот театар во Охрид, арената „Борис Трајковски“ во Скопје и античкиот локалитет Хераклеа во Битола.

Секој од концертите понуди различно музичко и сценско доживување, но сите ги обединија препознатливиот звук на Миладиноски, македонската традиција и силната поврзаност со публиката.

Успешната година беше заокружена и со четири награди и признанија. Влатко Миладиноски ја доби наградата „Фолк концерт на годината“ на „Златна бубамара на популарноста“, како и признанието „Фолк пејач на годината“ на „Лазаров Awards“. Од Општина Кисела Вода му беше доделен „Златен клуч“ и признанието „Заслужен граѓанин“, додека македонскиот бренд RVR му подари специјално уметнички изработени патики, создадени во само еден примерок, како признание за неговиот досегашен труд и придонес.

Симболиката на бројот четири продолжува и во приватниот и во професионалниот живот на пејачот. Влатко се наоѓа во четвртата деценија од својот живот, а во подготовка е и неговиот четврти солистички албум. До неговото целосно комплетирање недостасуваат уште само четири песни.

„Дури сега, кога ги сумиравме сите активности и успеси од изминатата година, забележавме колку често се повторува бројот четири. Не знаеме дали е случајност, симболика или предзнак, но сакаме да веруваме дека најголемите успеси допрва доаѓаат. Благодарни сме ѝ на публиката што постојано е со нас и заедно со нас го живее ова музичко движење“, велат Влатко и Златко Миладиноски.

Дали „четворката“ е само интересна случајност или најава за ново големо поглавје во нивната кариера, ќе покаже времето. Засега е сигурно дека подготовките за новиот албум продолжуваат, а публиката наскоро може да очекува нови песни и музички проекти од Влатко и Златко Миладиноски.

Европа

Шпанскиот премиер Санчез ги распиша предвремени избори за 29 ноември

Премиерот на Шпанија, Педро Санчез распиша предвремени парламентарни избори за 29 ноември, објави тој утрово во вонредно свикана институционална изјава од палатата Монклоа.

Одлуката доаѓа само три дена по големиот пораз на неговата малцинска влада во парламентот, каде што пратениците отфрлија два клучни декрети со кои владата на Санчез се обиде да одговори на продлабочувањето на кризата со домувањето.

Ова ќе го заврши сегашниот шпански законодавен дом околу девет месеци пред предвиденото.

Непосредната причина за одлуката беше гласањето одржано во петокот. Конгресот на пратениците ги отфрли двата владини декрети за домувањето.

Првиот пакет не успеа со 172 гласа „за“ и 178 „против“, додека вториот доби 166 гласа „за“ и 184 „против“. Конзервативната ПП, крајно десничарската Вокс и каталонските Хунтс гласаа против двата пакета. ПНВ и Коалисион Канарија беа исто така против вториот декрет.

Особено важен за малцинската влада на Санчез беше потегот на Хунтс, партијата на Карлес Пуџдемон, чии гласови од почетокот на овој мандат беа клучни за усвојувањето на голем број закони. објавува Журнал.мк

Македонија

ЈПКХС: Во текот на септември подигнати и транспортирани 14 320 тони комунален отпад

Во текот на месецот септември, екипите на ЈП Комунална хигиена-Скопје подигнаа и транспортираа 14 320 тони мешан комунален отпад од домаќинствата на територијата на градот Скопје.

Во истиот период се отстранети и 3040 кубни метри непрописно одложен кабаст и градежен отпад од јавни и сообраќајни површини. Најголемо количество отпад од диви депонии -545 кубни метри- е подигнато во општината Чаир.

Во текот на минатиот месец, Еко-патролата на ЈП Комунална хигиена-Скопје врачила 24 едукативно-информативни записници на приватни лица и претставници на стопански субјекти што биле затекнати при прекршување на Законот за јавна чистота.

ЈП Комунална хигиена-Скопје преку рачно и машинско метење и миење секојдневно ја одржува и јавната хигиена на скопските булевари и улици, како и плоштадите и пешачките мостови во централното градско подрачје, пешачките патеки и тротоарите на мостовите „Гоце Делчев", и „Слобода" и целокупниот простор на Старата скопска чаршија.