Оштетениот руски танкер натоварен со течен природен гас (LNG) „Арктик Метагаз“, кој веќе две недели плови неконтролирано во централниот Медитеран без екипаж, претставува сериозен ризик од експлозија и голема еколошка катастрофа, предупредија италијанските власти.

Секретарот на италијанскиот Министерски совет, Алфредо Мантовано, истакна дека бродот носи значителни количини на LNG, како и околу 450 тони мазут и 250 тони дизел, што дополнително ја зголемува опасноста. Тој предупреди дека постои „огромен ризик“ и дека танкерот може да „експлодира во секој момент“, пренесува Би-Би-Си.

Танкерот моментално се наоѓа јужно од островот Лампедуза, на околу 45 наутички милји (83 километри) од италијанските територијални води, но во близина на зоната за пребарување и спасување што ја покрива Либија.

Италија и Малта ги следат неговите движења, додека во моментов нема информации за обиди за стабилизирање или отстранување на бродот.

„Арктика Метагаз“ исплови од руското пристаниште Мурманск во февруари и е дел од таканаречената „флота во сенка“ што Русија ја користи за транспорт на енергија и покрај западните санкции. Пред две недели, бродот беше тешко оштетен во серија експлозии и пожари, а екипажот беше пронајден и спасен од либиската крајбрежна стража.

Либиските пристанишни власти првично изјавија дека танкерот потонал, но оттогаш плови без екипаж и претставува опасност.

Москва ја обвини Украина за напад врз танкерот, тврдејќи дека биле користени поморски дронови, но Киев не коментираше за овие обвинувања.

Еколошките групи, вклучувајќи го и Светскиот фонд за природа (WWF), предупредија дека евентуалното истекување на гориво или експлозија може да предизвика долгорочно загадување во област од исклучително значење за биодиверзитетот на Средоземното Море.

Европските земји повикаа на итен координиран одговор за да се спречи потенцијална катастрофа. Италија, Франција и седум други земји писмено до Европската комисија (ЕК) велејќи дека рускиот танкер за течен природен гас што моментално плови во Медитеранот претставува закана за животната средина и повикаа на брза акција по ова прашање.

Во писмото, кое го виде Ројтерс, се вели дека рускиот танкер претставува непосреден и сериозен ризик од голема еколошка катастрофа во средината на поморскиот простор на Европската Унија.

Во декември, украинската разузнавачка служба SBU соопшти дека оштетила три брода во Црното Море за две недели, вклучувајќи го и Дашан, за кој рече дека претрпел „критична штета“.

Нешто повеќе од една недела подоцна, танкерот за нафта Квендил беше погоден во Средоземното Море.

Украина ги смета „танкерите во сенка“ за легитимни цели: тие рутински пловат со своите транспондери исклучени за да ги избегнат западните санкции, а парите што Москва ги заработува од нафтата и гасот помагаат во финансирањето на нејзината тековна војна во Украина.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.