На 25 октомври Александар Вучиќ ги изгуби изборите во Србија.

Шест дена подоцна, Народната банка на Србија ја одзеде дозволата на Алта банка, банката на неговиот близок соработник Давор Мацура.

Денес сакаме да кажеме две работи јасно.

Прво: проектите на Вучиќ во Македонија доаѓаа со поддршка од ДУИ.

ДУИ сега вика „српски свет“. Но фактите покажуваат кој му ја отвори вратата:

Во јули 2021 година српската компанија МТЕЛ влегува на нашиот пазар. Тогаш ДУИ е во Владата, а Бујар Османи е министер за надворешни работи.

Османи имаше најмалку 11 средби со српски функционери. Записниците од тие средби до денес не се објавени.

На 24 октомври 2024 година, АС Сењак, фирма на сватот на Али Ахмети, доаѓа до акции на Стопанска банка Битола од фирма поврзана со Сашо Мијалков.

На 9 јуни 2025 година, фирма во која АС Сењак е сосопственик подигнува кредит од 5 милиони евра од Алта банка Белград.

На 17 септември 2025 година акциите се продадени на Алта банка. Шест дена подоцна, општина водена од ДУИ му дава на АС Сењак два договори вредни 90 милиони денари.

Ова не е случајност. Тоа е синџир што од Белград води до ДУИ, а од ДУИ назад до Белград. Истата партија што им зборуваше на Албанците за патриотизам правеше бизнис со луѓето на Вучиќ.

Второ: паѓа Вучиќ, паѓаат и неговите сателити во ДУИ.

Што се гради врз туѓа моќ, паѓа заедно со неа. Вучиќ ја изгуби власта, а Алта банка остана без дозвола. Сега се отвораат тајните во Белград, а со нив и сметките.

ВРЕДИ го кажува ова уште од септември 2025 година. Документите ги доставивме до Државната комисија за спречување на корупцијата. Али Ахмети и ДУИ молчат веќе 13 месеци. Тој молк сега нема да им помогне.

Затоа бараме:

Државната комисија за спречување на корупцијата и Јавното обвинителство итно да ги истражат трансакциите на АС Сењак со Мијалков и со Алта банка, кредитот од 5 милиони евра и тендерите од општините на ДУИ.

Надлежните институции да побараат податоци од српските органи за сите врски на Алта банка со фирми од Македонија.

ДУИ да ги објави записниците од средбите на Османи и Ахмети со Вучиќ и со српски функционери.

Али Ахмети лично да објасни зошто фирмата на неговиот сват купувала од Мијалков, се задолжила кај Алта и продавала на Алта.

Албанците во Македонија заслужуваат политика што не се продава на Белград. Вучиќ падна. Редот е на неговите сателити.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Почитувана амбасадорке на Обединетото Кралство, Ваша Екселенцијо, г-ѓа Маја Сивањанам,

Почитувани претставници на Институтот за комуникациски студии,

Почитувани пратеници,

Драги млади,

Ќе започнам со едно прашање што многу често ми го поставуваат во изминативе две години: Кој е најголемиот предизвик да се биде претседател на Собранието? Секогаш велам дека одговорот на ова прашање не е едноставен, бидејќи оваа одговорност подразбира бројни предизвици, но несомнено еден од најголемите е поврзан со начинот на кој нашите постапки и изјави се комуницираат, толкуваат и перципираат во јавниот простор.

Во време кога вниманието на јавноста сè почесто го привлекуваат негативните вести, кога една изјава може да биде извадена од контекст, да биде протолкувана поинаку од она што навистина било кажано, па дури и да биде искривена, станува сè потешко граѓаните да направат јасна разлика меѓу објективните информации и нивните толкувања, како и меѓу фактите и обидите за манипулација.

Се разбира, не го започнав ова обраќање за да зборувам за моите предизвици како претседател, туку за да ја истакнам важната улога што ја има точното и објективно информирање во разбирањето на реалноста и во развојот на демократијата.

Затоа што денес се соочуваме со еден парадокс: имаме повеќе информации на располагање од кога било досега, но тоа не значи дека поседуваме и повеќе знаење, будност и способност за критичко расудување. Младите се особено изложени на влијанието на дигиталниот простор, бидејќи социјалните мрежи одамна не се само средства за комуникација и забава, туку и важни извори на информации и обликување на нивните ставови. Затоа, заштитата од дезинформации, во суштина, е заштита на демократијата и на нашата слобода да расудуваме независно.

Токму тука започнува значењето на медиумската писменост и суштината на денешната дебата. Целта не е да им кажеме на младите што да мислат, туку да ги оспособиме самостојно да размислуваат; да не им определуваме кому да веруваат, туку да ги оспособиме како да ја проценуваат веродостојноста на една информација.

Една од првите поуки во оваа насока ја наоѓаме во учењето на кинескиот филозоф Конфучие: „Да не им веруваме на зборовите без претходно да ги провериме и да не заземаме страна пред внимателно да размислиме”.

Драги млади,

Вие кои сакате да го промените светот, системот и општествените неправди, запомнете: не можеме да промениме нешто за кое не сме целосно свесни, а целосна свесност стекнуваме единствено преку целосното информирање. Во духот на Џон Лок: „Оној што суди без да биде информиран од сите можни извори, неизбежно е да донесе погрешни заклучоци“.

Затоа, не ја мерете вистината според бројот на позитивните реакции, не ја мешајте популарноста со веродостојноста и не дозволувајте брзината на информациите да ја замени длабочината на вашето размислување. Застанете, прашувајте, проверувајте и барајте аргументи. Дури и разумното сомневање, кога нè води кон вистината, е знак на слободен ум. Затоа што на едно демократско општество не му се потребни граѓани кои веруваат или критикуваат сè, туку граѓани кои знаат правилно да расудуваат и критички да размислуваат.

Собранието, во оваа насока, има важна улога. Како дом на сите граѓани и институција во која тие се претставени, тоа треба да биде пример за транспарентност, аргументирана дебата и отчетност.

Исто така, сметам дека Собранието треба да биде отворена врата за општеството, особено за младите, кои не се само носители на иднината, туку и активни чинители на сегашноста.

Токму затоа, особено ми е драго што заедно со Британската амбасада, Институтот за комуникациски студии и Клубот на млади пратеници, преку овој настан придонесуваме оваа способност да се негува, да се заштитува и да стане дел од нашата демократска култура.

Нашата заедничка обврска е да создадеме услови младите да стекнуваат знаења, да развиваат критички пристап и да имаат доверба во сопственото расудување. На нашата држава ѝ се потребни млади луѓе кои знаат да ги преиспитуваат работите, одговорно да дејствуваат во општеството и да имаат капацитет да придонесуваат кон позитивни промени и напредок на државата.

Ќе го завршам моето обраќање со цврсто уверување дека:

„Вистинската слобода не се состои само во правото да го изразиме тоа што го мислиме, туку и во способноста слободно да размислуваме пред да поверуваме во она што ни се кажува и да станеме робови на дефиницијата на реалноста што ни ја наметнува некој друг“.

Ви благодарам и ви посакувам плодна дискусија!

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

„McLaren“ би можел да го претстави наследникот на својот суперавтомобил „750S“ уште следната година – иако производството на „750S“ моментално е планирано да продолжи до 2027 година.

Можното име на новиот модел беше откриено сосема случајно, благодарение на скулптура од птицата киви, изложена во лондонскиот „Covent Garden“.

Кивито е традиционален симбол за „McLaren“, поврзан со новозеландското потекло на основачот на компанијата, Брус Мекларен.

Сепак, токму ознаката „McL 820“ – испишана со портокалови букви на скулптурата – го привлече вниманието на списанието „Autocar“.

Доколку овие претпоставки се покажат како точни, името би можело да укажува на нов суперавтомобил со приближно 820 коњски сили – околу 70 коњски сили повеќе од сегашниот модел „750S“.

Се очекува новиот „McLaren“ да биде опремен со „V8“ мотор со два турбополначи, за разлика од „V6“ моторот кај „Ferrari 296 GTB“, кој развива 830 коњски сили.

Сепак, компанијата сè уште официјално нема потврдено ниту името, ниту техничките спецификации на новиот модел.

Нова ознака и враќање на мануелниот менувач

Префиксот „McL“ веќе се појави кај моделот „McL 6GT“ – суперавтомобил од ограничена серија со цена од приближно 1,5 милиони долари.

Овој модел исто така привлече внимание бидејќи поседува мануелен менувач – прв од ваков вид во понудата на „McLaren“ уште од легендарниот модел „F1“ од 1990-тите години.

Промените во компанијата опфаќаат повеќе од само нови модели и ознаки.

„McLaren“ сега е во сопственост на инвестицискиот фонд „L'imad“ со седиште во Абу Даби и поминува низ поширока корпоративна реорганизација.

Исто така, постојат планови за развој на „SUV“ возило, дизајнирано да им конкурира на модели како „Lamborghini Urus“ и помоќните верзии на „Porsche Cayenne“. Понатаму, „McLaren“ има намера да изгради втора фабрика во Обединетото Кралство и да започне со производство на сопствени мотори, со што ќе стави крај на досегашната зависност од компанијата „Ricardo“.

Засега, „McL 820“ останува неофицијална можност, но еден детаљ на скулптура во Лондон поттикна шпекулации во врска со следното големо ново издание на „McLaren“.

Извор: Б92

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.