Година и пол по трагичните убиства 14 годишната Вања Ѓорчевска и 74 годишниот велешанец Панче Жежовски, судот одлучи четворица од петте обвинети добија доживотни казни затвор. Дополнително, добија и по 10 години затвор за грабнувањето на Вања, а грабнувањето на Панче, како што образложи судија Ивица Стефановски, обвинителството не успеало да го докаже.

-Со намера некој друг член на нејзиното потесно семејство да го присилат да стори нешто, да даде парични средства на обвинетите за откуп на детето, од претходно смислен план и детални инструкции од обвинетиот Љупчо Палевски.... На свиреп начин и со умисла го лишиле од живот малолетното лице, оштетеното дете Вања Ѓорчевска на начин што изложувајќи ја на тешко психичко страдање со силен интензитет во врзана состојба и онеспособена за отпор и било предочено дека ќе биде убиена,- изјави – Ивица Стефановски – Судија.

Александар Ѓорчевски, таткото на Вања, кој беше обвинет дека во комуникација со првообвинетиот Палевски открил кога Вања ќе излегува од дома сама, е ослободен од обвинението, бидејќи според судот, обвинителството не успеало да ја докаже вината кај него.

-Обвинетиот Александар Ѓорчевски се ослободува од обвинение согласно чл.403 т.3 од ЗКП дека обвинетиот Александар Ѓорчевски со умисла им помогнал на обвинетите Љупчо Палевски, Велибор Манев, Боре Видевски и Влатко Кешишев кои на 27.11.2023 по претходен договор заедно извршиле грабнување на малолетното лице, оштетеното дете Вања Ѓорчевска,- изјави – Ивица Стефановски – Судија.

Ослободувањето од обвинението за Александар Ѓорчевски, според неговата одбрана е законита но празна одлука. Обвинителството пак најави жалба.

-Зошто се инсистираше по секоја цена да Александар биде дел од оваа постапка иако од првиот момент се знаеше дека за него нема ниту еден доказ. Должни се институтиицте да дадат одговори на овие прашања и дали со инволвирањето на Александар во оваа постапка е свесно направен дефокус од она што требало да биде предмет на оваа истрага, а тоа е она што го кажа Велибор Манев дека од 2022 година се правеле и кроеле планови и списоци за киднапирање и убивање луѓе,- изјави – Владимир Туфекџиќ – Адвокат на Александар Ѓорчевски.

-Кога станува збор за Александар Ѓорчевски, иако денеска не ги слушнавме аргументите на судот за ваквата пресуда, неспорен факт кој што стои на страна на овој обвинет е дека единствено родителите на детето знаеле дека детето по исклучок, критичниот ден, ќе оди само на училиште. Двајца обвинети дадоа искази дека овој факт тие го дознале од таткото, не од некој друг, од таткотом обвинетиот Александар Ѓорчевски преку Палевски. Да не знаеле дека детето дента по исклучок ќе оди сама немало да има ниту грабнување, заради тоа што не е можно, а немало да има ниту таков исход последователен,- изјави - Ана Стојковиќ Димитриевска – Јавен обвинител.

На пресудата ќе се жалат и другите обвинети додека оценка на Јавното обвинителство е дека денешните доживотни пресуди се доказ дека сторителите на свирепи убиства нема да останат неоткриени.

-Мое лично мислење е дека не се ценети нити еден доказ на одбраната иако беа доста и во нашите завршни зборови. Дека судот по мое мисење нема направено оценка нити на сите докази посебно нити на сите заедно. Мислам дека оваа пресуда не е издржана, продолжува циркусот без ниеден доказ да се обвини Љупчо Палевски,- изјави – Јовица Страшевски – Адвокат на Љупчо Палевски.

-Вака конфузно обвинение беше само препишано во оваа објава на пресудата а во однос на доказите, знам дека не постои ниту еден доказ на кој се темели обвинението, а од денес и судот својата пресуда. Ќе ја почекаме пресудата на писмено па ќе вложиме жалба,- изјави – Бојан Манев – Адвокат на Боре Видевски.

-Доколку не бил Кешишев немаше да бидат пронајдени ниту телата ниту пак начинот на извршување на грабнувањата а особено сметаме дека судот не поклони доволно верба на исказот на Кешишев во делот дека истиот дејствувал под страв и по наредби на обвинетиот Палевски, поради тоа по добивањето на пресудата ќе ја разгледаме и ќе биде обжалена,- изјави – Игор Ефремов – Адвокат на Влатко Кешишев.

-Изречените доживотно казни затвор за обвинетите Велибор Манев, Боре Видевски, Влатко Кешишев и Љупчо Палевски се доказ дека ниту еден сторител не може да остане неоткриен во сторување на вакви грозоморни кривични дела, и покрај испланираното до детали убиство и на Вања Ѓорчевска и на Панче Жежовски обвинетите се откриени и си добија заслужените казни затвор,- изјави – Жаклина Крстевска Јосифовска – Јавен обвинител.

Пресудата за случајот кој ја потресе земјава е изречена по 9 месеци судење и одржани околу 40 рочишта. Посебна истрага пред неколку дена обвинителството отвори по завршниорт збор на Велибор Манев во кој го посочи лицето кое наводно на барање на Љупчо Палевски требало да се ослободи од ранецот во кој се наоѓал пиштолот со кој биле извршени убиствата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.