Донација од СЗО за Судска медицина и Микробиологија

 Tри кабинети со високо ниво на заштита и еден автоматски екстрактор за изолација на вирусна РНК, како и реагенси за три илјади анализи добија лабораториите на Институтот за судска медицина и на Институтот за микробиологија.

Станува збор за донација од Светската здравствена организација.

На денешното примопредавање на донацијата присуствуваше министерот за здравство Венко Филипче кој изјави дека СЗО се покажа како еден од нашите најсериозни и најголеми партнери од почетокот на оваа криза, по претходниот период на соработка на други полиња.

– Меѓутоа, сега по појавата на пандемијата со Ковид-19 навистина многу интензивно комунициравме, соработувавме и разменувавме информации. Тоа беше институцијата од која на глобално ниво доаѓаа првите сознанија за вирусот, начинот на ширење, препораките, превентивните мерки итн. И ова сега е еден сегмент на соработка кој значи сериозно зајакнување на лабораториските капацитети. Конкретно, денешната донација се состои од три био сејфти кабинети. Два се наменети за Институтот за микробиологија и еден за Институтот за судска медицина, рече Филипче.

Тој посочи дека ова е една значајна поддршка за Медицинскиот факултет во Скопје, со што се одделува работата од форензиката со делот на дијагностика на коронавирусот, нешто што е многу значајно посебно за работата на Институтот за судска медицина и дополнително автоматски значајно зајакнување на дијагностичките, лабораториските капацитети во делот на идентификување на коронавирусот на Медицинскиот факултет во Скопје.

Филипче се заблагодари што СЗО беше од почетокот на кризата присутна и со донација на лична заштитна опрема и био сејфти кабинети за Институтот за јавно здравје.

Шефицата на канцеларијата на СЗО во земјава, Џихан Тавила рече дека се многу горди што поддршката што ја дава Светската здравствена организација не е само за справувањето со Ковид-19, туку помага и за подобра подготвеност на земјата преку воведување нова технологија и подобра обученост на здравствениот кадар.

– Задоволни сме што работиме со Филипче, со Медицинскиот факултет и со сите партнери во земјава, бидејќи веруваме дека одговорот на пандемијата е силен, ќе напредува и нема да запре. Има уште многу работа да се направи со вакцинацијата која претстои, додаде Тавила.

Деканка на Медицинскиот факултет, Соња Топузовска се заблагодари на министерот Филипче и на Тавила што овозможиле Медицинскиот факултет да биде дел од институциите на кои СЗО донира опрема, која, како што потенцира, е многу значајна во овој момент.

– Се работи за три кабинети со високо ниво на заштита и еден автоматски екстрактор за изолација на вирусна РНК, како и реагенси за три илјади анализи. Оваа опрема ќе овозможи лабораториите на Институтот за судска медицина и на Институтот за микробиологија да го зголемат својот капацитет односно бројот на анализи за детекција на Ковид-19 на дневна основа. Се разбира „biosafety" кабинетите ќе овозможат високо ниво на заштита на вработените. Оваа опрема во иднина ќе се користи и за други анализи. Со тоа се зголемува капацитетот на Медицинскиот факултет за молекуларната дијагностика воопшто. Уште еднаш голема благодарност до СЗО, додаде Топузовска.

Богојавление-Водици одбележан со свети литургии во црквите

Православните верници денеска го одбележаа големиот христијански празник Богојавление – Водици со свети литургии во црквите и нивните дворови. 

Годинава првпат, поради пандемијата со Ковид-19, изостана вековната традиција на положување на крстот во светите води.

Поглаварот на Македонската Православна Црква – Охридска Архиепископија г.г. Стефан по повод празникот служеше Златоустова литургија во храмот „Рождество на Пресвета Богородица" во Скопје. Светата црква секоја година речиси повеќе од два милиениума преку сите содржини, и богослужбени и обичајни не навраќа на смислата на тој спасоносен настан на крштевањето Христово и моментот кога се покажала целата света Троица . Денешниот празник Богојавление всушност, рече, ги објаснува сите други празници и сите други настани, ни ја објаснува целта на Хритовото доаѓање како син божји како вистински богочовек, тајната на кршевањето, но и на покајанието и на исповетта.

Меѓу нас, истакна г.г. Стефан, многу слабо или воопшто не се практикува покајанието или исповетта, а во светата црква тоа е една од седумте свети таинства, но при покајанието, при исповетта не е доволно да кажеме дека сме грешеле, дека грешиме и дека се каеме. Потребно е, вели, гревот да не го повторуваме, и да се трудиме што помалку да грешиме. Но очигледно е недоволното познавање на верата.

-Ако знаеме што учи нашата света вера и помалку ќе грешиме, а ако грешиме ќе знаеме и да се покаеме. Еве од каде и да тргнеме, од семејството, од соседството, од работно место, од меѓупартиското живеење од секаде и насекаде се гледа што е поголемо во нас – љубовта или омразата, верата или неверието, слогата или неслогата, вистината или невистината, подготвеноста или неподготвеноста да си простиме и да се помириме или не. Дури и на непријатели и на подалечни ќе им простиме и ќе им подадеме рака, што е и добро, но на блискиот, на братот свој не можеме да му простиме. Е тука навистина има место за загриженост и, секако, потреба да се сфати и местото и улогата на покајанието, а со тоа и на исповетта кои се неодвоиви од практиката на вистинскиот христијански живот. Како црква и духовни пастири должни сме постојано да повикуваме кон покајание, кон исповед и кон помирување, зашто кој не може да се помири најпрвин со себе си и со братот свој, како ќе се помири со Бога, рече поглаварот г.г. Стефан, кој по завршувањето на литургијата го изврши осветувањето на водата во црквата.

Присутните верници се придржуваа кон мерките за заштита од ширење на коронавирусот со носење заштитни маски и одржување на физичка дистанца.

На овој ден во реките се положува светиот крст, а оној кој ќе го фати, се верува дека ќе го следи среќа и благослов цела година. Фаќањето на крстот значи соединување на човекот со Христа, а се верува дека со положувањето на крстот, водите стануваат лековити.

До минатата година, празникот се одбележуваше во сите епархии во земјава, а централната манифестација се одржуваше во Скопје каде поглаварот на Македонската Православна Црква – Охридска Архиепископија г.г. Стефан го положуваше светиот крст во водите на реката Вардар.

Празникот Богојавление се одбележува уште од вториот век. На овој ден, според христијанското предание, Свети Јован Крстител го крстил Исус Христос во реката Јордан. Празникот се нарекува уште и Водици поради големиот водосвет што го извршува црквата на овој ден.

Во земјава, согласно Законот за празници, Богојавление-Водици е неработен ден за граѓаните од православна вероисповед.

Најдено е телото на американски планинар во близина на вториот највисок врв на светот

Американски планинар кој исчезна во близина на К2, втората највисока планина во светот, е пронајден во планинскиот венец Каракорум во северен Пакистан од екипаж на воен хеликоптер, пренесуваат агенциите.

Пакистански воен тим го забележал телото на Алекс Голдфарб Румјанцев од хеликоптер, откако започнала интензивна операција за пребарување и спасување ден претходно, соопшти Пакистанското планинарско друштво (АЦП).

Тоа е втора смрт на странски алпинист на таа планина за помалку од една недела.

„Телото на руско-американскиот алпинист Алекс Голдфарб беше пронајдено од пакистански воен тим на планината Пасторе Пик висока 6209 метри“, рече Карар Хаидри, портпарол на АЦП.

Се претпоставува дека алпинистот паднал, додава Хаидри.

Голдфарб и унгарскиот планинар Золтан Сланко планирале да се аклиматизираат на врвот Пасторе, лесен врв за пешачење лоциран помеѓу базните логори за К2 (8611 м) и Брод Пик висок 8047 м.

Тие биле дел од унгарскиот тим на Magyar Expedicios чија цел била да го освојат Брод Пик во зима и без помош на боци и носачи на кислород.

На Брод Пик сè уште не е забележано зимско искачување.

Планинарското дуо се соочило со екстремни временски услови при искачувањето до Пасторе Пик и Сланко решил да се врати, додека Голдфарб самостојно го продолжил искачувањето.

Откако не се вратил до неделата, Сланко ја предупредил АЦП и се вклучил во потрагата.

Голдфарб е лекар и предавач на Харвард, Бостон и е доброволец во лекување на пациенти со ковид-19 од почетокот на пандемијата, изјавил неговиот син Леви Голдфарб.

„Тој го имаше прекрасното искачување. За него, тоа беше ослободувачко искуство, бидејќи на висорамнините не е важно дали сте лекар, адвокат, па дури и крадец. Сите тие етикети веќе не се важни и вие сте целосно голи затоа што тогаш играте според сосема нови правила. Тој оствари прекрасни пријателства во планините, спаси животи и себе си и го стори тоа патувајќи по светот“, го опиша Леви својот татко.

Неколку дена претходно, светски познатиот шпански алпинист Серхио Монготе загина на Каракорум откако паднал во леден процеп кога се спуштал кон базниот логор на К2.

Умрел истиот ден кога непалски тим алпинисти напишаа нова страница на планинарењето со прво зимско искачување на оваа крајно тешка планина. Стотици врвни алпинисти од Европа и САД се обиделе да го сторат тоа, но К2 се покажал немилосрден.

Или како што рече американскиот планинар Џорџ Бел: „Тоа е дива планина која се обидува да те убие“.

Во 2008 година, 11 алпинисти загинале на К2.

Непалскиот тим од 10 алпинисти го предводел Нимсдаи Пурја и сите заедно се искачиле на врвот во исто време. Непалските водичи, најчесто од народот Шерпа, се неопходни и незаменливи членови на странските експедиции.

„Со децении, Непалците им помагаат на странските алпинисти да се искачат на врвовите на Хималаите, но никогаш не сме го добиле признанието што го заслужуваме“, рече Ками Рита, кој се искачил на Монт Еверест дури 24 пати.

Груби-Абазовиќ: Односите меѓу Македонија и Црна Гора се одлични

Првиот вицепремиер и министер за политички систем и односи меѓу заедниците,Артан Груби оствари онлајн средба со вицепремиерот на Црна Гора Дритан Абазовиќ, се наведува во соопштението од неговиот кабинет.

На оваа средба и двајцата соговорници г.Груби и г. Абазовиќ разменија мислења за актуелните политички теми во земјата и регионот. Двајцата заедно високо ја оценија соработката меѓу Македонија и Црна Гора, соработка која е на одлично ниво.

Првиот вицепремиер Груби му честиташе на неговиот колега од Црна Гора, Дритан Абазовиќ за функцијата вицепремиер и за успешното спроведување на досега клучните политики кои одат во прилог на сите граѓани во Црна Гора.

Груби исто така му соопшти на својот колега Абазовиќ дека Македонија е посветена на исполнувањето на потребните реформи и обврски со цел што побрзото отворање на преговорите со Европската Унија.

Од негова страна, вицепремиерот на Црна Гора, Дритан Абазовиќ му кажа на Груби дека Македонија е пријателска земја и стратешки партнер на неговата земја. Абазовиќ вели дека односите со Скопје се изградени преку дијалог и добра соработка.

Груби и Абазовиќ за време на оваа онлајн средба се согласија дека полноправното членство на Македонија и Црна Гора во НАТО, пријателството со меѓународната заедница и особено со стратешките партнери на двете земји, Соединетите Американски Држави и заедничкиот пат кон Европската Унија се додадена вредност за развојот на регионот и особено за мирот и стабилноста.

притисни ентер