Забава

Докторот кој се грижел за Тома 10 години вели дека пејачот ја негирал болеста

Веќе подолго време, некое филмско остварување на предизвикало толкаво внимание кај српската публика како филмот „Тома“ за легендарниот пејач Тома Здравковиќ.

За многумина, најемотивни сцени се оние во кои главни актери се Тома (кој го игра Милан Мариќ) и неговиот лекар Алекса Хаџипоповиќ (го игра Петар Бенчина). Иако д -р Хаџипоповиќ е измислен лик за потребите на филмот, во реалниот живот Тома Здравковиќ навистина имал бројни лекари кои сведочеа за неговиот живот и борбата против болеста.

Еден од нив е д-р Дејан Елаковиќ, поранешен началник на Клиниката за урологија на ВМА.

- На почетокот не знаев многу за Тома Здравковиќ. Тоа беше 1976/1977 г. Во тоа време, тој доаѓаше кај нас на прегледи, потоа замина во Канада со неговата сопруга. По враќањето од Канада, повторно се појави, тогаш веќе беше познат како исклучителен пејач, сите го сакаа и со задоволство го слушаа. Сите имаа посебни емоции кон Тома, и пациентите и персоналот и докторите. Беше омилен лик, мислам дека покрај медицинскиот третман, му помогнавме да се чувствува удобно во болницата - изјави д-р Елаковиќ на ТВ „К1“.

Тома Здравковиќ со години се бореше со тумор на мочниот меур.

- Тома не придаваше големо значење на таа болест, имавме впечаток дека ја доживува како непријатност што не го оптоварува многу, тој и понатаму го живееше својот живот посветен на музиката. Можеше да дојде на клиниката кога сака, можеше да оди кога сака, му одговараше нашиот став кон него. За тоа најдобро зборува ситуацијата кога пред еден викенд беше примен во болница бидејќи имаше крварење, за да може хируршки да се санира, но пред тоа мораше да прима трансфузија на крв. Тоа го заврши во сабота околу 12-13 часот и исчезна попладнето. Бевме загрижени, изненадени, го известив неговиот главен хирург кој го оперираше неколку пати - раскажува Елаковиќ и продолжи:

- Некои луѓе од страна ни рекоа дека можеби отишол во Шабац, тоа уште повеќе нè вознемири... Се плашевме да не колабира на сцената, но беше што беше, утрото бевме пресреќни кога го затекнавме во креветот. Тој имаше свои врски, свои пријатели, кои го организирале тоа напуштање на клиниката за да може да одржи концерт во Шабац. Таков беше Тома.

Тома Здравковиќ беше познат како голем заводник. Се оженил четири пати, но според д-р Дејан Елаковиќ, не зборувал многу за емотивниот живот.

- Не зборуваше многу за жените, беше дискретен по тоа прашање - додаде Елаковиќ на крајот од разговорот.

Извор: blic.rs

Регион

За европските избори во Хрватска пријавени 25 листи

Хрватската Државна изборна комисија (ДИК) доби 25 кандидатски листи за европските избори во Хрватска, што е за осум помалку од 2019 година, јави Хина.

На 9 јуни во Хрватска ќе се одржат избори за Европскиот парламент, а на нив треба да се изберат 12 европратеници со мандат од пет години.

Со предавањето на списокот се означува и официјалниот почеток на изборната кампања, што ќе трае до 7 јуни, кога почнува изборниот молк.

Листата на ХДЗ ја предводи премиерот Андреј Пленковиќ, Божо Петров ќе биде на чело на листата на Мост, Иван Пенава на Татковинското движење ( Домовински покрет), додека листата на коалицијата собрана околу СДП ќе ја предводи Билјана Борзан.

Јунските избори за Европскиот парламент ќе бидат четврти по ред од влезот на Хрватска во Европската унија, при што првата постава на хрватски европратеници избрана во 2013 година имаше мандат од само една година, бидејќи веќе следната година се одржаа редовни европски избори.

Европските избори во Хрватска се втор изборен циклус годинава во земјата, по парламентарните избори одржани на 17 април, а на крајот на годината ќе се одржат и претседателските избори. /МИА

Свет

Германија наскоро ќе ја продолжи соработката со УНРВА

УНРВА - главниот обезбедувач на хуманитарни услуги во Газа - се соочи со голема криза .

Германската влада планира да ја продолжи соработката со Агенцијата на ОН за помош и работа за палестинските бегалци на Блискиот Исток (УНРВА) во Појасот Газа во блиска иднина, соопштија денеска германското Министерство за надворешни работи и Сојузното Министерство за економска соработка и развој.

УНРВА - главниот обезбедувач на хуманитарни услуги во Газа - се соочи со голема криза откако Израел обвини десетина нејзини вработени дека се вклучени во нападите на 7 октомври во кои загинаа околу 1.200 луѓе.

Неколку вработени беа отпуштени поради обвинувањата. Во деновите и неделите што следеа, 16 земји донатори - вклучувајќи ги и двата најголеми донатори, Соединетите Американски Држави и Германија - го суспендираа или паузираа финансирањето, оставајќи го со финансиска празнина од околу 450 милиони американски долари.

Откако се појавија наводите, генералниот секретар на ОН, Антонио Гутереш вети сеопфатен преглед.

Експертите задолжени за истрага на неутралноста на ОН во светлината на наводите дека вработени на ОН биле вмешани во нападите врз Израел на 7 октомври денеска препорачаа заострување на заштитните мерки во „осум критични области“.

Во исто време, во нивниот извештај се вели и дека Израел досега не доставил докази дека одредени вработени биле членови на терористички организации.

Независната група, предводена од поранешната француска министерка за надворешни работи Катрин Колона, беше формирана на почетокот на февруари. /MИА

Шоу биз

Фестивалот „Коачела“ казнет со 28.000 долари поради Лана Дел Реј

Популарниот музички фестивал, на којшто настапија светски ѕвезди како Шакира, Доџа Кет и „Ноу даут“, „Коачела“ (Coachella) заврши, но една од изведувачките ги прекрши правилата.

Се работи за американската поп-пејачка Лана Дел Реј, поради која организаторите на фестивалот ќе треба да платат казна од 28.000 долари... Имено, пејачката настапила 13 минути подолго од предвиденото и со тоа го прекршила договорот што организаторите го имаат со Градот Индио, каде што се одржува фестивалот, пишува „Ти-ем-зи“ (TMZ).

На фестивалот, имено, му се наплаќа дневна казна од 20.000 долари за првите пет минути од пречекорувањето на времето и дополнителни 1.000 долари за секоја минута потоа. /МИА