Но, на почетокот на јуни, неколку експерти од целиот свет напишаа извештај во New England Journal of Medicine (NEJM) според кој коронавирусот не е ризичен само за лицата со дијабетес, туку дека тој всушност може да го предизвика и самиот дијабетес.

Постојат два главни вида на дијабетес. Тип 1 е автоимуна болест, односно е предизвикана од сопствениот имунолошки систем на организмот кој ги напаѓа бета клетките на панкреасот кои произведуваат инсулин сè до апсолутен недостаток на инсулин. Не е познато точно што ја активира оваа автоимуна реакција, но некои експерти веруваат дека нејзиното активирање би можело да бидат вирусни инфекции.

Дијабетесот тип 2 е далеку најчестата форма на дијабетес; се јавува во 90% од случаите. Повеќето пациенти произведуваат изменети или дури и нормални количини на инсулин, но поради нарушувања во клетките на црниот дроб и мускулите, постои отпорност на неговото дејство, пишува The Conversation.

Кинеските научници објавија информации за случај на инаку здрав млад човек кој добил тешка форма на дијабетес откако бил заразен со коронавирус. Пред пандемијата на „ковид-19“, во Азија избувна епидемијата на САРС од 2002 до 2004 година, што исто така е предизвикана од вирус. И тогаш , почетокот на акутен дијабетес е забележан кај луѓе кои добиле пневмонија поради инфекција со САРС.

Во повеќето од овие случаи, дијабетесот исчезнал по три години, но останал кај 10 проценти од пациентите.

Имено, коронавирусните соеви кои предизвикуваат САРС и ковид-19 имаат сличен начин на влегување во клетките. Протеините на површината на вирусот се прикачуваат на ACE2 протеините кои се наоѓаат во многу типови на клетки, како што се клетките на белите дробови, бубрезите и панкреасот.

Експертите сметаат дека ковид-19 го нарушува нормалното функционирање на клетките на панкреасот, што доведува до нарушувања во процесите што го одржуваат нивото на гликоза во крвта преку секреција на инсулин.

Треба да се напомене дека ова се претпоставки на некои научници и дека сè уште не е потврдено со сигурност дека ковид-19 предизвикува дијабетес тип 1 или 2. Некои лекари дури посочуваат дека може да се работи за сосема нова форма на дијабетес.

За разлика од мноштвото податоци што го поврзуваат дијабетесот со дебелината и високиот крвен притисок, до сега се направени многу малку студии за влијанието на ковид-19 врз развојот на дијабетес. Затоа, експертите кои пишуваат за НЕЈМ развиле регистар за евидентирање на сите случаи на дијабетес поврзани со пандемијата на коронавирус.

Овој вид регистар е неопходен за да се соберат доволно податоци што може да укажат на поврзаност помеѓу ковид-19 и дијабетесот.