Доделени наградите „Виртуози“ - Канал 5

Култура

Доделени наградите „Виртуози“

Во организација на СОКОМ, Македонската филхармонија и Македонската опера и балет синоќа беа доделени наградите „Виртуози“ за достигнувањата во областа на класичната музичка и балетска уметност.

Доделени наградите „Виртуози“
Во трка за признанието годинава беа 22 музички и балетски уметници и ансамбли, а осум од нив ја понесоа наградата во секоја од предложените категории. За победниците одлучи дванаесетчлена жири комисија составена од релевантни претставници на сите музички организации во државата.

Во категоријата „Млад музички уметник“ наградата ја понесе баритонот Иван Наумовски во конкуренција на виолинистите Ева Богоевска и Александар Иванов. Наумовски, магистрант на Универзитетот во Грац, веќе ги освојува оперските и концертни сцени низ Австрија и Европа, каде сите негови настапи се дочекани со едногласно воодушевување од публиката и критиката. Наумовски добива блескави оценки не само поради својата извонредна вокална интерпретација и музикален пристап, туку и поради зрелоста и проникливоста во донесувањето на ликовите на сцената. Минатата година, на 24 години, Наумовски го оствари своето меѓународно оперско деби, како најмлад солист во престижната оперска куќа во Грац.

За најуспешен „Камерен ансамбл“ се натпреваруваа дуото виолини Ана и Олег Кондратенко и пијанистката Марија Вршкова, дуото Сихана Бадивуку на виолина и Маја Кастратовиќ на пијано, како и женскиот камерен хор „Св. Злата Мегленска“, а наградата им припадна на дуото Ана и Олег Кондратенко кои преку една деценија, ги обединуваат своите индивидуални уметнички квалитети во заеднички сензибилитет, збогатувајќи го македонскиот концертен простор со емотивните бранувања на камерното музичко творештво.

Во придружба на пијанистката Марија Вршкова, која е нивен редовен музички сопатник, дуото Кондратенко може да се пофали со бројни настапи на концертните подиуми во земјава и во странство, реализирани звучни записи за Македонската телевизија, официјално ЦД издание.

Тања Вујисиќ - Тодоровска го понесе признанието во категоријата „Музички публицист“, во која беше номинирана и музикологот Тина Иванова. Вујисиќ - Тодоровска е исклучително име во балетската уметност на Македонија, како на полето на сценската уметност, така и на полето на педагошката дејност. По заокружувањето на својата плодна балетска кариера во која одигра над 40 водечки улоги во повеќе од 300 балетски претстави, фокусот на Вујсиќ беше насочен кон педагошката и истражувачката работа. Плод на таа посветеност, труд, љубов и ангажман во минатата година беше монографијата „Моделирање на педагошката работа на балетските репетитори“, која претставува прв научен труд кој го третира комплексниот проблем на моделите на педагошката работа на репетиторите на балетската уметност во Македонија.

За „Музички настан“ во минатата година беше прогласен концертот на Македонската филхармонија со пијанистот Бориз Березовски одржан по повод 70-годишниот јубилеј на нашата најстара музичка институција.

Дарија Андовска ја понесе статуетката во категоријата „Композитор“, во конкуренција на Валентина Велковска-Трајановска и Александар Пејовски. Андовска, која втор пат го добива признанието, минатата година ги претстави своите дела на концертните сцени во Швајцарија, Украина, Русија, Полска, Германија, Турција, САД и Македонија, во изведба на реномирани ансамбли и солисти. Нејзините композиции се најдоа и на носачи на звук, а беа емитувани и на бројни европски радио станици. Андовска во 2014 година го доби и највисокото одличје во својата досегашна кариера – признанието „Истакнат уметник на градот Цирих“.

Оперска певица Ана Дурловски се закити со признанието во категоријата „Меѓународна афирмација“, за кое се натпреваруваше со диригентот Сашо Татарчевски. Големото оперско деби на сцената на најпрестижната оперска куќа во светот, Метрополитен во Њујорк, во улогата на Кралицата на ноќта од „Волшебната флејта“, за оперската примадона Ана Дурловски значеше најголемо признание во нејзината досегашна кариера, успех кој ја зацврсти Македонија на светската оперска мапа. Ана го воздигна до височините комплексниот лик, воодушевувајќи ги критичарите со својата совршена техника. Минатата година Дурловски продолжува да се искачува на скалилата на европската и светска оперска уметност и воодушевуваше и во улогите создадени од Доницети, Белини, Офенбах.

Примабалерината Александра Мијалкова е годинешниот „Виртуоз“ во категоријата музичко-сценски уметник каде беа номинирани и тенорот Ѓорѓи Цуцковски и кореографот и танчер Игор Киров. Со својата сугестивно изнијансирана игра со која ги обликува расположенијата на ликовите, техничко-танцовата доминација и креативност, Александра Мијалкова се трансформираше од Одета, Рајмонда, Далила, Лили во Маргарита во „Дамата со камелии“.Мијалкова ја одбележа 2014 година со широк дијапазон на театарски улоги, а нејзината игра ги освои сцените на гостувањата во Виена и Рим, каде во улогата на Лили во современиот балет „14 часа“, собра бурни аплаузи и овации.

Во последната категорија „Музички изведувач“ беше награден диригентот Саша Николовски-Ѓумар, во конкуренција на пијанистот Тодор Светиев и виолинистот Владимир Костов. Повеќе од 20 години плодна творечка уметност, вложена љубов, енергија, посветеност –диригентот Саша Николовски-Ѓумар ги раздвижува македонските ансамбли преку кои создава импресивни музички креации. Минатата година за него ја одбележаа бројни концерти и оперски претстави во Македонија и надвор од нејзините граници.

Наградите „Виртуози“ се востановени во 2013 година за да им оддаде признание на најуспешните уметници кои континуирано работат кон уметничко созревање и развој на македонската култура и истовремено да ги поттикне на нови предизвици и успеси.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Израелски доселеници претепаа американска новинарка, ОН бара истрага (ВИДЕО)

Обединетите Нации повикаа на темелна истрага за нападот врз фотографката на „Вашингтон пост“, Хајди Левин, на окупираниот Западен Брег. 

Израелски доселеници претепаа американска новинарка, ОН бара истрага (ВИДЕО)

ОН нагласи дека новинарите мора да можат да ја работат својата работа без вознемирување. Левин известувал за кражбата на маслинки на Западниот Брег во времето на нападот, каде што израелските доселеници сè повеќе напаѓаат палестински земјоделци и им ги крадат посевите.

Заменик-портпаролот на ОН, Фархан Хак, изјави дека е запознаен со инцидентот. „Ова е очигледно уште еден случај во кој е прекршено правото на новинарите да ја извршуваат својата работа без мешање“, изјави тој за новинарите. Хак додаде дека ОН повикува на истрага за инцидентот и да се спречи какво било понатамошно вознемирување на новинарите на терен.

Реакција на ОН дојде откако „Вашингтон пост“ го осуди нападот врз нивната новинарка. „Утрово, израелските доселеници ја нападнаа фотографката на „Вашингтон пост“, Хајди Левин, додека таа известуваше на Западниот Брег“, изјави извршниот уредник на весникот, Мет Мареј. Мареј истакна дека Левин носела видливи ознаки што јасно укажуваат дека е новинарка.

Заштитни мерки

Кога беше прашан за одговорот на ОН на насилството на доселениците во окупираниот Западен Брег, Хак рече дека организацијата го покренува прашањето со земјите-членки. Тој објасни дека ОН работи и преку своите тела за човекови права и специјализирани агенции.

„Ги повикуваме сите земји-членки да ги почитуваат правата на новинарите“, рече Хак. Тој ја спомена работата на телата за човекови права на ОН, како и Организацијата за образование, наука и култура (УНЕСКО), која игра водечка улога во промовирањето на правата и безбедноста на новинарите.

Тагови: доселеници новинарка

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Крадци ограбиле колекционерка на луксузни чанти, вредни 300.000 долари- се фалела со нив на фејсбук (ВИДЕО)

Љубителка на луксузни додатоци од Лос Анџелес останала шокирана откако група крадци провалиле во нејзиниот дом и украле колекција чанти од „Хермес“, чија вредност се проценува на 300.000 долари.

Крадци ограбиле колекционерка на луксузни чанти, вредни 300.000 долари- се фалела со нив на фејсбук (ВИДЕО)

Патриша Ваињо (60) вели дека во понеделник попладне била на лекарски преглед, што криминалците го искористиле за да ги украдат чантите од нејзината куќа во населбата Игл Рок.

Ги избегнале камерите во куќата

Иако куќата е обезбедена со безбедносни системи, крадците успеале да ја избегнат камерата „Ринг“ и да ги заобиколат зајакнатите прозорци, пред да ја скршат бравата на вратата од гардероберот каде што ги чувала скапоцените чанти.

„Беа доволно пресметани за да ја избегнат камерата на предниот дел од куќата, па влегоа од страна. Точно знаеја што прават“, рекла Патриша.

Гардероберот ја содржел нејзината колекција чанти од „Хермес Биркин“, објавува „Дејли меил“.

Патриша ја започнала својата колекција пред повеќе од две децении, а луксузните чанти не биле само страст за неа, туку и еден вид финансиска сигурност за нејзиното пензионирање, се наведува во соопштението.

„Напорно работев за сè што имам“, рекла очајната жена.

Таа објавила список на Фејсбук

Снимките направени по провалата покажуваат скршено стакло расфрлано низ куќата и целосно ограбен гардеробер, каде што крадците барале вредни предмети.

Сепак, украдените предмети не биле само торби. Крадците зеле и часовници, како и кутија за накит во која се содржани млечните заби на нејзините ќерки од детството. Токму оваа загуба, рекла таа, ја погодила најтешко.

Според неа, крадците користеле уред за блокирање на сигналот за да го оневозможат системот за надзорни камери. Очигледно, блокирањето влијаело и на камерите во соседните куќи, што го отежнувало следењето на нивните движења.

Месеци пред грабежот, Патриција објавила список на предмети од нејзината колекција во Фејсбук група посветена на луксузни торби, наведувајќи предмети вредни илјадници долари.

Листата вклучуваше разни Birkin 35, златна чанта Kelly Sellier, Birkin 30 во сина боја Tiffany изработена од кожа Swift и сосема нова Evelyne Pochette 23.

„Толку сум исплашена“

Таа објасни дека продавала чанти кога ѝ здодевале, па објавувањето на листата било начин да ги претстави и размени предметите со други љубители на луксузни додатоци.

Патриша вели дека верува оти била мета поради нејзината колекција. По провалата, таа вели дека не се чувствува безбедно во својот дом, а инцидентот предизвикал и немири во нејзиното соседство.

„Толку сум исплашена. Се плашам да бидам во мојата куќа“, рече таа.

Таа додава дека е благодарна што нејзината ќерка и сопруг се безбедни, и покрај сè што се случило.

Тагови: крадци чанти

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Зеленски: Доколку Украина падне, 20 милиони Украинци доаѓаат во Европа (ВИДЕО)

Украина има поддршка од сите европски лидери, изјави денес украинскиот претседател Володимир Зеленски, негирајќи ги извештаите дека европската страна го замолила да го намали тонот во разговорите со американскиот претседател Доналд Трамп.

Зеленски: Доколку Украина падне, 20 милиони Украинци доаѓаат во Европа (ВИДЕО)

„Немаше никакви забелешки за време на денешните состаноци. Слушнав само поддршка од моите европски колеги, за што сум благодарен“, рече Зеленски на прес-конференција по учеството во делот од самитот на ЕУ посветен на Украина и по неколку билатерални разговори со лидерите на европските земји.

„Договорот на Трамп со Путин е погрешен“

Според некои медиумски извештаи, од Европа е побарано да не го крева тонот во односите со американскиот претседател Трамп за да не го налути дополнително.

Кога беше прашан за неговиот однос со Трамп и коментарите на американскиот претседател дека е потешко да се преговара со него отколку со рускиот лидер Владимир Путин, Зеленски рече дека морал да го брани опстанокот на својата земја.

Тој истакна дека договорот на Трамп со Русија за увоз на дизел не е во ред и дека по тоа влегуваме во лизгава патека за да може да следи договор за рускиот гас, потоа укинување на санкциите за банкарскиот систем, за одредени поединци, хемиската индустрија и конечно за замрзнатите руски средства.

На прашањето дали Украина ќе продолжи да ги напаѓа руските рафинерии додека Трамп бара прекин на нападите, Зеленски рече дека обично не зборува за „деталите за нашите операции. Ќе видите“.

„Ако паднеме, 20 милиони Украинци ќе дојдат во Европа“

Зеленски рече дека Путин не сака мир, дека сака да ја уништи Украина. „Тој не го почитува нашиот суверенитет и територијален интегритет, Донбас не му е доволен“, рече тој.

„Ако паднеме, 20 милиони Украинци ќе дојдат во Европа, затоа сакаме да останеме силни и да ја браниме нашата земја“, рече украинскиот претседател.

Дали Зеленски е жртвено јагне на Трамп? Тој само се насмеа: „Тоа е мојот одговор“

Кога еден новинар го праша дали мисли дека служи како жртвено јагне за внатрешните политички проблеми на Трамп, со оглед на тоа што за неколку недели, на среднорочните избори, на републиканците им се заканува губење на контролата и врз Претставничкиот дом и врз Сенатот, Зеленски направи долга пауза, се насмеа и рече: „Тоа е мојот одговор“.

Зеленски рече дека американскиот сателитски систем Старлинк, кој Украина го користи за соборување на руски ракети, не бил исклучен, но дека неговата брзина била значително намалена, поради што не можеле да соборат некои ирански беспилотни летала Шахед.

Тагови: Володимир Зеленски украина

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер