Но, десетминутно доцнење поради сообраќајните метежи во Ахмедабад буквално ѝ го спасило животот, објави Би-Би-Си.
Трагична несреќа
Авионот AI 171 се урна само неколку секунди по полетувањето од меѓународниот аеродром Сардар Валабхаи Пател околу 13:30 часот по локално време. Од 242 лица во авионот, само еден патник преживеал. Ова е една од најлошите воздушни несреќи во поновата историја на Индија.
„Тукушто го напуштав аеродромот кога дознав дека авионот се урнал. Почнав да се тресам. Нозете ми се тресеа. Бев во шок“, изјави Бхуми за медиумите.
Бхуми била во Индија на одмор, по две години отсуство. Планирала да се врати во Лондон, но поради густиот сообраќај, на аеродромот пристигнала десет минути подоцна. Авионот требало да полета во 13:10 часот, а качувањето завршило веќе во 12:10 часот. „Пристигнав во 12:20 часот. Отидов до портата за качување и молев да ме пуштат во авионот. Реков дека веднаш ќе ги завршам сите формалности, но не ме пуштија“, рече таа.
„Кога ми беше одбиено качувањето, бев многу вознемирена. Се упатував кон излезот од аеродромот и тогаш слушнав дека авионот се урнал. Моето Ганпати (хиндуистичко божество) ме спаси“, додаде Буми.
Нејзината мајка рече дека Буми требало да патува сама до Лондон, додека детето останало со неа. „Благодарни сме на Бога што ја заштити мојата ќерка. Таа остана жива поради тоа дете што го остави дома. Со Божја милост, се врати дома“, рече таа.
Единствен преживеан: „Сè се случи за 30 секунди“
Единствениот преживеан од несреќата е Вишваш Кумар Рамеш, 40-годишен британско-индиски државјанин. Тој претрпел повреди на градите и за „Хиндустан тајмс“ изјавил: „Триесет секунди по полетувањето се слушна силен тресок, а потоа авионот се сруши. Сè се случи многу брзо“. Неговите роднини велат дека им рекол дека „нема поим“ како преживеал - што укажува на тешкиот психолошки шок низ кој минува.
Авион на „Ер Индија“ се урна кратко по полетувањето, губејќи висина и удирајќи во станбен комплекс во кој биле сместени лекари од Медицинскиот колеџ БЈ во округот Меганинагар, при што загинаа најмалку 28 лица. Експлозијата предизвика голем пожар, а густ црн чад се издигна над градот.
Контролата на воздушниот сообраќај во Ахмедабад потврди дека пилотот испратил повик за помош веднаш по полетувањето, што укажува на „Мејдеј“, што значи целосна вонредна состојба. Според експертите за авијација, можните причини за несреќата вклучуваат губење на потисокот на двата мотора, човечка грешка и удар од птица, но точните околности сè уште се истражуваат. Федералната влада формирала посебна комисија за истрага, потврди министерот за цивилно воздухопловство Рам Мохан Наиду.