Претседателката на Европската комисија, Урсула фон дер Лајен утре ќе има работен ручек со шесте лидери на државите од Западниот Балкан, на кој ќе се разговара за меѓусебните односи и за имплементацијата на Планот за раст на регионот, информира денеска портпаролката на ЕК за соседска политика, проширување и меѓународни партнерства Ана Писонеро.

Таа истакна дека на работниот ручек се поканети премиерите на Македонија, Христијан Мицкоски, на Албанија, Еди Рама, на Косово, Албин Курти и на Црна Гора, Милојко Спајиќ, претседавачката на Советот на министри на Босна и Херцеговина, Борјана Кришто и претседателот на Србија, Александар Вучиќ.

Во однос на Планот за раст на Западниот Балкан, Писонеро информира дека Европската комисија во моментов ја финализира проценката на доставените реформски агенди на земјите од Западниот Балкан поврзани со него, а кои се однесуваат на социо-економските аспекти и на областа на основните права.

- Кога ќе ги завршиме овие проценки, ќе се консултираме со земјите членки на претстојниот ИПА Комитет и во случај на позитивна оценка од страна на ИПА Комитетот, ќе ги одобриме реформските агенди, истакна Писонеро, додавајќи дека по ова ќе следи подготовката за исплата на првите транши од Инструментот за раст и реформи на Западниот Балкан.

[Внимателно ја следиме состојбата во Израел, значајното зголемување на насилствата, вклучително и постојаниот напад од ракетен оган од појасот Газа кон Израел. Испалувањето на ракети од Газа н]

Инаку, за време на престојот на премиерот Мицкоски во Брисел, во текот на утрешниот ден предвидени се негови средби и со претседателот на Советот на ЕУ, Шарл Мишел, со еврокомесарот за проширување и соседска политика Оливер Вархеји и со првиот човек на Генералниот директорат за соседство и преговори за проширување (ГД НЕАР), Герт Јан Копман.

За време на посетата на Брисел, Мицкоски ќе биде придружуван од министрите на надворешни работи и надворешна трговија Тимчо Муцински и за европски прашања Орхан Муртезани. Предвидено е Муцунски да се сретне и со генералниот секретар на НАТО во заминување, Јенс Столтенберг и да се обрати на приемот организиран во седиштето на Алијансата во Брисел по повод Денот на независноста – 8 септември. /МИА

Светската и регионалната безбедност и стабилност, начините за зајакнување на мултилатералната полициска соработка помеѓу членството на Интернатионалната полициска асоцијација (ИПА), поголема професионалност на вработените во полициските служби низ најразлични видови едукација и размена на искуства се меѓу главните теми на кои се расправа на 67. Светски конгрес на Интернационалната полициска асоцијација што се одржува во Охрид.

Како што посочи Мартин Хофман, претседетел на Интернационалната полициска асоцијација, работата на аосцијацијата е да се направи поврзување на државите со засилена полициска соработка, низ најразлични облици и на сите нивоа.

- Овие собири секако ни помагат во размена на искуства и добри практики, сето во насока на справуавање со криминалот во сите негови облици...Понекогаш соработката на ова ниво какво што е членството во ИПА дури е и попродуктивно и од онаа реализирана преку официјалните канали на комуникација. Како аполитична организација секако се обидуваме да помогнеме во фукнционалноста на севкупната соработката помеѓу полициите во регионот, но и во светски рамки, додаде Хофман.

Претседателот на ИПА Македонија, Игно Стојков, од своја страна изрази задоволство што Светскиот конгрес како најзначаен настан на Интернационалната полициска асоцијација се одржува тука, со присуство на претставници од 64 држави-членки на Асоцијацијата.

- Годишно надвор изнесуваме од 500 до илјада полициски службеници на разни обуки, семинари и работилници. Технички преку проекти го помагаме и делот на општото работење и живеење на полициските службеници и каде што можеме и во делот на технички помагала во Министерството. Нашите обуки и семинари се на трошок на ИПА организацијата и со самото тоа му помагаме на МВР, а обуките се високо професионални. Интенцијата како ИПА ни е да ги споиме полициските службеници преку размена на информации и искуства и да го подигнеме нивото на професионалност на сите полициски службеници, додаде Стојков.

Официјалниот дел од работата на Светскиот конгрес на ИПА во Охрид ќе биде заокружен со манифестацијата „Недела на пријателство“ при што за учесниците на собирот се предвидени туристички разгледувања на повеќе ИПА региони, градови, значајни историски и туристички места во Македонија.

Од денеска до почетокот на октомври КФОР ќе спроведе заедничка вежба со контингент од 300 војници од кралскиот јоркширски полк на Велика Британија, кој е привремено стациониран на Косово, како и серија заеднички вежби со други војници во рамките на мисијата.

„Целта на вежбата е да се тестираат постојните процедури за слетување на дополнителни војници и нивна интеграција во мисијата на КФОР. Вежбата ја поддржува подготвеноста на КФОР да одговори на релевантните безбедносни настани со цел да се обезбеди континуирано спроведување на нашиот мандат, врз основа на Резолуцијата 1244 на Советот за безбедност на ОН од 1999 година, да придонесе за безбедна средина за сите луѓе и заедници кои живеат на Косово и слобода на движење во секое време и на непристрасен начин“, соопшти КФОР.

Во соопштението се наведува дека по вежбата, контингентот на кралскиот јоркширски полк ќе се врати во Обединетото Кралство.

„КФОР ќе ги преземе сите мерки за ублажување на ефектите врз патниот сообраќај, кои може да се очекуваат како резултат на движењето на воениот персонал и возилата пред и за време на вежбите“, се наведува во соопштението.