По вчерашните остри критики од страна на вработените во овие служби и членови на синдикатот кои бараат да се повлечат законите предупредувајќи дека не се реформски ниту пак се истите што ги изработиле работните групи, од кабинетот на министерот Игор Филков за Канал 5 велат дека ниту едно стекнато право на вработените не било укинато а со законските решенија се зајакнува правната сигурност и на јасен и предвидлив начин се уредува статусот на службите.

-Во однос на наводите дека постојат разлики во однос на текстовите изработени од работната група, потенцираме дека законите претрпеа одредени измени како резултат на новите системски решенија, особено донесувањето на Законот за административни службеници и склучените колективни договори, со цел обезбедување правна усогласеност и функционална кохерентност на целиот систем. Во понеделник предлог-законите се предвидени за второ читање во Собранието, каде што сите пратеници ќе имаат можност да поднесат амандмани. Токму преку оваа фаза на собраниска расправа ќе се овозможи дополнително прецизирање, унапредување и усогласување на текстот, со цел конечното законско решение да биде квалитетно, применливо и во интерес на институциите и граѓаните,- - Министерство за правда.

Претставници на судовите и обвинителствата на јавната расправа алармираа дека двата предлог-закона, наместо реформски, се дискриминирачки и ќе направат поделба меѓу персоналот во услови кога судовите и обвинителствата кубурат со кадар. Според нив клучно е тоа што законите ги препознаваат само стручните служби како посебни државни службеници додека другите вработени се изедначуваат со административни службеници што сметаат дека значи уназадување, пониски плати и нееднаквост.

-Со години укажуваме дека работата во јавното обвинителство не може да се третира како класична административна работа. Работиме со кривични предмети. Работиме со класифицирани информации. Работиме со финансиски истраги. Работиме со докази. Работиме во постапки кои директно влијаат врз кривичниот прогон и владеењето на правото. Токму затоа очекувавме закон што ќе ја препознае таа специфичност. Наместо тоа, добиваме закон во кој најголемиот дел од клучните прашања повторно се регулираат по логика блиска до државната администрација.,- изјави – Маја Петрова – Советник портпарол и Заменик претседател на Синдикалната организација на јавните обвинителства .

И двата закони се дел од реформската агенда и требаше да бидат донесени уште лани. Но бидејќи постапката доцнеше предвидено е најдоцна до декември годинава да бидат усвони во собранието.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Граѓанската иницијатива „Стоп за УСЈЕ“ тврди дека Цементарницата „УСЈЕ“ бара продолжување на работењето според застарени стандарди за загадување, наместо, како што велат, усогласување со современите европски норми и најдобрите достапни техники за заштита на животната средина.. Поради ова тие најавуваат протестен марш што ќе се одржи на 23 јуни во Скопје.

Според иницијативата, во барањето на компанијата не биле предвидени конкретни мерки за намалување на емисиите на загадувачки материи, а предлозите доставени од граѓанските организации не СЕ земени ВО предвид. Оттаму оценуваат дека со ваквиот пристап „Усје“ практично бара да продолжи да работи со гранични вредности за загадување кои датираат од 2007 година. Од граѓанската иницијатива апелираат до Министерството за животна средина да не издаде, како што наведуваат, неусогласена и незаконска дозвола.

„Наместо усогласување со европските стандарди и најдобрите достапни техники, компанијата бара да продолжи да работи со истите гранични вредности за загадување од 2007 година“. МЖСПП мора да обезбеди заштита на здравјето на граѓаните и подобар квалитет на воздухот во Скопје“, порачуваат од иницијативата. - Марија Манолчева- Стоп за УСЈЕ.

Од министерството за животна средина уверуваат дека Цементарница Усје ќе добие дозола за работа по нови стандарди иако новиот закон стапува на сила во 2027 година. А додаваат и дека до сега никој не побарал објаснување ниту забелешка по однос на барањето на Усје, кое е јавно достапно на интернет страната на министерството.

-Не е вистина дека дозволата ќе биде издадена според старите стандарди. Напротив, дозволата ќе биде издадена согласно новиот закон за контрола на индустриски емисии, иако законот со имплементација почнува од септември идната година. Цементара Усје се согласи дека во новата дозвола ќе прифатат услови според новиот закон, иако истиот стапува на сила во 2027 година. - Министерство за животно средина.

Од министерството појаснуваат дека и другите фабрики на кои годинава им истекува дозволата се согласиле истата да им биде продолжена согласно новите стандарди, со цел да заштедат време и средства. Протестниот марш на „Стоп за Усје“ ќе се одржи на 23 јуни со почеток на релација од Собранието до Министерството за животна средина и просторно планирање.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Според податоците, од вкупно 142 следени ветувања, Владата реализирала едно од пет, односно 18% се целосно исполнети.

Во економијата има одредени позитивни поместувања – невработеноста опаѓа и се отвораат нови работни места. Целосно се реализирани ветувањата за непроменети даночни стапки и зголемување на пензиите, а јавниот долг останува под проектираната граница. Сепак, предизвици остануваат инфлацијата, буџетскиот дефицит, сивата економија и социјалната заштита.

-Владата ќе мора да направи избор кои ветувања се приоритет и кои јавно ги ревидира, обидот истовремено да се реализираат сите би бил многу тежок. - Благица Петреска – Фајнанс Тинк .

Најголем напредок има во образованието, со мерки за дуално образование, инклузија на ученици со попреченост и инвестиции во училишна инфраструктура, но предизвик остануваат реформите во високото и предучилишното образование. Во здравството се реализирани проширување на позитивната листа, укинување на економските директори, зголемен број бесплатни ин-витро процедури и повисок капитациски бод, но дел од системските реформи, како дигитализацијата и реорганизацијата на здравствениот систем, сè уште доцнат. Во младинскиот сектор дел од мерките остануваат неисполнети, меѓу кои скратеното работно време и бесплатниот интернет во образовните институции, како и ограничениот напредок во обуките за дигитални вештини. Најслаби резултати се бележат во мерките за родова еднаквост и социјална заштита, каде најголем дел од ветувањата остануваат нереализирани.

- Во фаза на донесување се 3 значајни закони за високото образование и добар дел од мерките се предвидени таму, но бидејки тие се уште во фаза на јавна дискусија се уште чекаме кога ќе се донесат и на каков начин ќе се имплементираат. Ана Мицковска Ралевска - Македонски центар за граѓанско образование.

-Клучните системски реформи кои што треба да обезбедат поквалитетен, поефикасен и побезбеден здравствен систем е предизвик кој што треба да се реализира наредните 2 години. Кирил Солески - Македонско лекарско здружение.

Меѓу препораките од анализата е Владата да ги ревидира ветувањата што не се остварливи и во преостанатиот дел од мандатот да се фокусира на приоритети што граѓаните ги сметаат за најважни – капитални инвестиции, грижа за децата и старите лица и подобрување на квалитетот на јавните услуги.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.