Македонија

Димитров се сретна со шведската министерка за надворешни работи

Ако не ги започнеме пристапните преговори оваа година, тоа за мене ќе значи дека не постои европска перспектива, по сето она што го постигнавме за две години. 

Постигнавме очигледен демократски пресврт. Да, сѐ уште правиме грешки, не сме совршени, но постои очигледна движечка сила кон европска либерална демократија во земјата, управувана од владеењето на правото.

Ова го истакна денеска во Стокхолм министерот за надворешни работи Никола Димитров на Министерската конференција на високо ниво за Западен Балкан, во организација на Министерството за надворешни работи на Кралството Шведска и Европската комисија.

–Мора да бидам искрен, зашто јас сум случаен политичар и мислам дека треба да имаме поголема искреност во политичките дебати дома, но и надвор. Мислам дека ако мора да добиеме и единаесетта препорака од Комисијата следната година нема да имам лице да му се обратам на мојот народ, на граѓаните и да зборувам за европска перспектива. Жал ми е што морам да го кажам ова, но ако не ги започнеме пристапните преговори оваа година, тоа за мене ќе значи дека не постои европска перспектива, по сето она што го постигнавме за две години, рече Димитров на панел-дискусијата посветена на случувањата во земјите од регионот на Западен Балкан, со фокус на нивната ЕУ перспектива.

Во рамките на посетата, како што соопшти МНР, Димитров се сретна со министерката за надворешни работи на Кралството Шведска, Маргот Валстром. Во фокус на разговорите беше европската перспектива на земјата и важноста од валоризација на постигнатото.

-Задоволство е да се биде во земјата чие внимание и заложба за нашиот регион бескрајно го цениме, истакна Димитров.

Воедно, беа разгледани прашања поврзани со искористување на потенцијалот за збогатување на меѓусебната соработка во повеќе сфери, пред се во делот на економијата и инвестициите. Министрите разговараа и за можностите за организирање лидерска академија на млади луѓе од регионот што би се организирала во Стокхолм.

Министерот Димитров работната посета ја продолжува попладнево на средба со претседателот на Парламентот на Кралството Шведска, Андреас Норлен.

Свет

Стапи во сила Трговскиот договор меѓу ЕУ и Нов Зеланд

Благодарение на овој договор, се очекува трговијата меѓу ЕУ и Нов Зеланд во рок од една деценија да порасне за 30 отсто.

Индустријата и земјоделците од Европската Унија добиваат мноштвото нови извозни можности со стапувањето во сила на Трговскиот договор меѓу ЕУ и Нов Зеланд, кој се очекува да ги намали годишните извозни давачки на европските компании за околу 140 милиони евра, соопшти Европската комисија.

- Благодарение на овој договор, се очекува трговијата меѓу ЕУ и Нов Зеланд во рок од една деценија да порасне за 30 отсто, при што извозот од Унијата потенцијално би се зголемил на 4,5 милијарди евра годишно. Инвестициите на ЕУ во Нов Зеланд имаат потенцијал да се зголемат и за 80 проценти. Овој историски договор, исто така, вклучува обврски без преседан за одржливост, вклучително и почитување на Парискиот договор за климата и основните работнички права, се додава во соопштението.

Со Договорот се укинуваат царините за клучните извозни земјоделско-прехранбени стоки од ЕУ, вклучително и свинското месо, виното, шампањското, чоколадата и кондиторските производи. Дополнително, со спогодбата се гарантира заштита на близу 2.000 вина и жестоки пијалаци од ЕУ, како и на 163 од европски производи со гарантирано географско потекло, како Фета сирењето, истарската пршута или чоколадните бонбони со марципан од Либек.

Од друга страна се обезбедени царински квоти за увоз на говедско и овчо месо и млечни производи во ЕУ.

Договорот предвидува и полесен пристап на компании од ЕУ до договори за новозеландски државни набавки на стоки, услуги и концесии, како посебна помош за извозот на малите бизниси.

Преговорите за Трговскиот договор меѓу ЕУ и Нов Зеланд започнаа во јуни 2018 година. Договорот беше потпишан на 9 јули минатата година, по што тој беше одобрен од страна на Европскиот парламент и на Советот на ЕУ, на 22, односно 27 ноември. Од друга страна, постапката за ратификација на Договорот во Нов Зеланд заврши на 25 март годинава. /МИА

Македонија

Од утре до понеделник јавниот превоз во Скопје по неделен возен ред

За време на велигденските празници, односно од утре петок - 3 мај до понеделник 6 мај. јавниот превоз ќе функционира по неделен возен ред.

Како што информираат од ЈСП Скопје исклучок ќе бидат линиите 11, 11А, 18А, 32, 47А, 55, 56, 56А, 81, 118, 160 и 164 кои утре ќе сообраќаат по саботен возен ред.

-Утре и во понеделник на 5 мај од 7 до 14 часот дежурни ќе бидат билетарниците на Транспортен центар и таа во Ѓорче Петров. Во сабота сите билетарници и центри за персонализација ќе функционираат вообичаено, а в недела за сите е неработен ден, информираат од ЈСП Скопје.

Жичницата за време на празничните денови нема да работи единствено во понеделник, другите денови ќе работи вообичаено, од 10 до 20 часот.

Од ЈСП Скопје потсетуваат дека за време на викенди и државни празници користењето на линијата 25 (Транспортен центар – Средно Водно) е бесплатно за сите граѓани.

Македонија

Изречени 34 санкции за возење под дејство на алкохол на подрачје на СВР Битола

Полицијата вчера на територија на СВР Битола изрекла вкупно 34 мерки за возење под дејство на алкохол.

Како што соопшти денеска МВР, 15 казни се изречени на подрачје на Битола, 11 на подрачје на Ресен, три во Македонски Брод, по две мерки во Прилеп и Крушево и една мерка на подрачје на Демир Хисар.

Засилените акциски сообраќајни контроли продолжуваат, велат од МВР и апелираат до граѓаните да ги почитуваат сообраќајните правила и прописи за да се зголеми безбедноста во сообраќајот.

притисни ентер