Светската здравствена организација соопштила дека децата претходно биле здрави и дека припаѓаат на групата од 170 помали деца од 11 земји кои во последната недела заболеле од необјаснет тип на хепатитис. Друга американска држава, Висконсин, ја истражува смртта на едно дете.

Американскиот центар за контрола и превенција на болести објави специјален нов документ за жариштето во Алабама и покрај фактот што истрагата за болеста продолжува низ целата земја.

„Во овој момент, веруваме дека аденовирусот може да биде причина за пријавените случаи кај децата, но сè уште истражуваме други потенцијални фактори на животната средина и ситуацијата“, се вели во соопштението на ЦДЦ.

Познато е дека аденовирусот 41 предизвикува гастроентеритис кај децата (воспаление на слузницата на желудникот, тенкото и дебелото црево), „но не е вообичаено како причина за хепатитис кај инаку здрави деца“, се вели во соопштението на агенцијата и се додава дека биле исклучени другите фактори што можеле да ја предизвикаат болеста-ковид, вируси на хепатитис А, Б и Ц (најчести причини за хепатитис во САД), автоимун хепатитис и ретката автоимуна Вилсонова болест.

Девет случаи на мистериозната форма на хепатитис во Алабама биле пријавени помеѓу октомври 2021 година и февруари 2022 година. Во три случаи, се појавила акутна црнодробна инсуфициенција, од кои за два била потребна трансплантација на црн дроб.

Сите пациенти се опоравиле или се опоравуваат, вклучително и двајцата приматели на трансплантацијата на црн дроб. Шест од нив биле позитивни на вирусот Епштајн-Бар, но немале антитела, што значи претходна инфекција.

Пред хоспитализацијата, повеќето деца повраќале и имале дијареа, а некои пријавиле проблеми со горниот респираторен тракт. За време на престојот во болница, кај повеќето млади пациенти биле забележани пожолтени белки на очите, кај некои се развила жолтица, а кај некои зголемен црн дроб.

Минатата недела ЦДЦ издаде здравствено предупредување со кое ги информира лекарите и јавно-здравствените власти да бидат внимателни и да ја следат појавата на слични случаи.

Во Висконсин се истражуваат четири случаи на болеста, меѓу кои и две деца со тежок исход - на едното дете итно му била потребна трансплантација на црн дроб, а другото починало како последица на болеста. Слични случаи на хепатитис се пријавени во Илиноис и други држави.

ЦДЦ препорачува децата да се вакцинираат навреме и нивните родители и старатели да се грижат за општата хигиена, особено за хигиената на рацете, да избегнуваат болни луѓе, да ја покриваат устата кога кашлаат и киваат и да избегнуваат да ги допираат очите, носот или устата.

Аденовирусите обично се шират со близок личен контакт, респираторни капки или допирање на различни површини. Постојат повеќе од 50 видови на аденовируси, кои најчесто предизвикуваат настинки, но и многу други болести.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.