Македонија

Денеска пресуда за Јанкулоска во издвоената постапка за „Тенк"

Во Кривичниот суд денеска треба да биде изречена пресудата за издвоената постапка за Гордана Јанкулоска за предметот „Тенк“.

Обвинителството, во завршниот збор на 3 октомври, побара Судот да ја прогласи Јанкулоска за виновна за злоупотреба на службена должност и овластувања, како и да ги подмири трошоците заедно со Поповски и Груевски во висина од 313 илјади денари.

Обвинителката Фатиме Фетаи, во завршен збор наведе, дека од изнесените докази јасно се гледа дека Јанкулоска го поттикнала Поповски да набави блиндирано возило за МВР и тоа да се даде на користење на премиерот Груевски.

- Обвинетата Јанкулоска е виновна за злоупотреба на службена должност, бидејќи таа била свесна за своето дело и го сакала спроведувањето. Предлагаме Судот да ги земе како отежнувачка околност степенот на одговорност, а како олеснителна околност семејната состојба, рече Фатиме.

Одбраната, во завршен збор, пак, рече дека во постапката било грубо нарушен принципот на еднаквост на оружјата, СЈО не ја докажало својата надлежност, како и дека Судот треба да донесе пресуда за дејствие што наводно се случило пред шест години врз основа на докази кои во најголем дел се прибавени со кршење на домашните и меѓународни права.

Обвинетата Гордана Јанкуловска во завршен збор, рече дека додека траела постапката таа требало да се грижи за неколкумесечно бебе, како и дека била изложена на медиумски линч со објавување делови од незаконско стекантите аудио разговори.

- Во ниту еден момент во мене не постоела умисла да поттикнам некого за набавка на возило. Како министер никогаш и на никого не сум вршела притисок и ниту сум потпаднала под нечиј притисок. Судот во однос на мене треба да донесе ослободителна пресуда, рече Јануколовска.

Судењето за Јанкулоска почна на крајот на август годинава, откако обвинетата се породи. Нејзе и се суди посебно откако Судот го прифати барањето на адвокатите за лекарското боледување поради нејзината бременост.

Во „Тенк“ претходно беа осудени поранешниот премиер Никола Груевски на две години казна затвор и поранешниот помошник министер во МВР, Ѓоко Поповски на 6,6 години затвор, за набавка на блиндирано моторно возило „Мерцедес С 600 Гард“ во вредност од 600 илјади евра.

Двајцата се жалеа до Апелацискиот суд за висината на казните. Апелација во петокот соопшти дека жалбата на Груевски е отфрлена и му ја потврди затворската казна од две години. На Поповски, пак, пресудата му е преиначена на четири ипол години затвор./МИА

Технологија

Boston Dynamics има нов хуманоиден робот, објавија снимка од неговите можности (ВИДЕО)

Boston Dynamics лансираше нова, електрична верзија на својот хуманоиден робот Atlas, откако најавија повлекување на хидрауличниот модел.

Во објавеното видео, новиот Atlas се преклопува за да се крене од лежечка положба пред да зачекори кон камерата и да ја сврти главата. Екстремитетите, торзото и главата на роботот можат да ротираат за 360 степени, давајќи му на Атлас широк опсег на движења.

Компанијата соопшти дека нејзината електрична верзија на Atlas е посилна, со поголем опсег на движење од претходните генерации и дека се движи на начини кои „ги надминуваат човечките можности“.

„Ја дизајниравме електричната верзија на Atlas да биде посилна, попргава и поагилна“, се вели во блогот на компанијата. „Градиме робот кој ќе се движи на најефикасен можен начин за да ја заврши задачата, наместо да биде ограничен од опсегот на движење на човекот“, пишуваат тие.

Hyundai, кој го купи Boston Dynamics во 2021 година, планира да користи хуманоидни роботи во своите фабрики. Новите производствени капацитети треба да послужат како полигон за тестирање на можностите на Atlas, објави корејската компанија.

Boston Dynamics објави и проштално видео од пензионираната хидраулична верзија на роботот.

„Речиси една деценија, Atlas ја поттикна нашата имагинација, инспирираше нови генерации роботичари и ги прескокна пречките на теренот. Сега е време нашиот хидрауличен робот Atlas да седне и да се опушти“, пишува Boston Dynamics.

Свет

Туск: Ќе изградиме барикади на источната граница

Полскиот премиер Доналд Туск денеска изјави дека Полска почнува да работи на дополнително зајакнување на целата источна граница, во време кога земјата се соочува со, како што рече, сè помоќна „хибридна војна“ поради илегалните мигранти од Белорусија.

Туск не даде детали за планираните активности или средствата што ќе бидат наменети за нив, но рече дека кога безбедноста на Полска е во прашање, „нема да има ограничувања“.

„Полско-белоруската граница е уникатно место поради притисокот на илегалните мигранти. Всушност, имаме работа со растечка хибридна војна“, рече премиерот при обиколката на границата каде што се сретна со војници и граничари. „Сакам да нема сомнежи овде - земја која покажува сè поагресивни намери кон Полска, како Белорусија, е коорганизатор на оваа практика на полската граница.“

Во 2021 година, претходната полска влада и Европската унија ја обвинија Белорусија дека го организира протокот на мигранти за да изврши притисок врз ЕУ поради санкциите наметнати од европската институција кон Минск, но Белорусија ги отфрли обвинувањата.

Оттогаш продолжуваат обидите за преминување на границата, а бројките варираат со текот на времето. Полските граничари велат дека секојдневно евидентираат околу 300 обиди за илегално преминување на границата. Заладените односи меѓу соседните земји дополнително се влошија по инвазијата на Украина од страна на белорускиот сојузник Русија.

Претходната полска влада подигна ограда на полско-белоруската граница, долга повеќе од 180 километри и висока пет и пол метри, во обид да се заштити од илегалните мигранти. После тоа, беше инсталиран систем на камери и сензори кои ја надгледуваат границата.

Туск рече дека новите утврдувања ќе бидат поставени долж „целата источна граница“, но не даде детали.

„Тоа не е само внатрешната граница на Полска, туку и границата на ЕУ. Затоа, не се сомневам дека цела Европа ќе мора да инвестира во сопствената безбедност, инвестирајќи во источната граница на Полска и во безбедноста на нашата заедничка граница“, рече Туск.

Фудбал

Навивачите на Баер бесплатно добиваат посебни шампионски тетоважи

Новиот германски шампион Баер Леверкузен на своите навивачи им нуди бесплатни тетоважи за да ја одбележат историската сезона, во која веќе ја освоија шампионската титула.

Новиот германски шампион Баер Леверкузен на своите навивачи им нуди бесплатни тетоважи за да ја одбележат историската сезона, во која веќе ја освоија шампионската титула, но се уште имаат шанса за тројната круна бидејќи играат со Кајзерслаутерн во финалето на купот и со Аталанта во Лигата на Европа во финалето во Даблин на 22 мај.

Со ремито 2:2 против Рома, со кое ја потврдија победата од 2:0 од првата полуфинална средба, фармацевтите ја продолжија серијата без пораз на 49 натпревари оваа сезона и го соборија повеќедеценискиот европски рекорд на Бенфика, поставен помеѓу 1963 и 1965 година.

Баер ги опиша тетоважите како „специјална промоција на крајот на посебната сезона“ и им понуди на фановите да изберат една од многуте тетоважи со клупска тема и да закажат состанок за бесплатно да добијат нова декорација за својата кожа.

притисни ентер