Дендиас: Пријателски ја гледаме Македонија

Постојат две прашања: Спроведувањето на Договорот (од Преспа) и толкувањето на Договорот. Секој правен текст има и толкување.

Со пријателски чувства ја гледаме Македонија и пријателски го гледаме овој народ, тоа е мала земја на која многу можеме да ѝ помогнеме, изјави министерот за надворешни работи на Грција, Никос Дендиас во интервју за грчката државна телевизија ЕРТ, но додаде дека и „соседите треба да ја почитуваат чувствителноста на грчкиот народ".

Како што јави дописничката на МИА од Атина, говорејќи за спроведувањето на Договорот од Преспа, Дендиас рече дека нашата земја во пресрет на Самитот на ЕУ се обидува да направи „колку што е можно повеќе", но дека прави и „итроштини и обиди да го скрати патот".

– Постојат две прашања: Спроведувањето на Договорот (од Преспа) и толкувањето на Договорот. Секој правен текст има и толкување. И за ова да бидеме согласни. Не може да толкуваат како што сакаат, треба да толкуваат како што треба. Ние со пријателски чувства ја гледаме Македонија и пријателски го гледаме овој народ. Тоа е мала земја на која многу можеме да ѝ помогнеме. Можеме да инвестираме, можеме да ги повлечеме со нас во една заедничка европска иднина, но треба и тие да ги почитуваат чувствителностите на грчкиот народ и на грчкото општество, рече Дендиас, истакнувајќи дека она што ја интересира Грција е на северната граница да има пријател и не сака уште еден непријател.

Шефот на грчката дипломатија објасни дека станува збор за договор „што не може лесно да се толкува и треба да ја убедиш другата страна за толкувањето", а како средство да се искористи интегративниот процес.

Во однос на европската перспектива на нашата земја и дали Грција ќе поддржи отпочнување пристапни преговори на претстојниот Самит на ЕУ, шефот на грчката дипломатија порача дека Македонија „има уште неколку денови да заврши уште неколку работи".

– Треба да направат уште некои работи, го имаме разјаснето тоа. Ние со задоволство ќе ви помогнеме. Ќе ви помогнеме, доколку ни помогнете, оваа реченица ја искористив пред Димитров. Тоа го знаат многу добро. Треба да се обидат малку повеќе, имаат уште неколку денови, рече шефот на грчката дипломатија.

Дендиас објасни дека во грчкото Министерство за надворешни работи постои Акциски план и ќе биде назначено надлежно лице за следење на спроведувањето на Договорот од Преспа од наша страна.

Тој нагласи дека мора „да се искоренат случаите на антиквизација" и спомена дека „Министерството за надворешни работи на Македонија се наоѓа на улица што се вика Филип Втори Македонски", додавајќи дека "ова не е комплимент кон грчката страна".

Дендиас во синоќешното интервју за ЕРТ го повтори ставот дека Атина ќе го почитува Договорот, што, како што рече, му го објаснил на министерот за надворешни работи Никола Димитров, а грчкиот премиер Кирјакос Мицотакис истото му го пренел и на претседателот на нашата Влада, Зоран Заев на нивната средба во Њујорк.

МТСП: Понеделник неработен за граѓаните од католичка вероисповед

Понеделник, вториот ден на Велигден, според Грегоријанскиот календар, неработен за граѓаните од католичка вероисповед.

Министерството за труд и социјална политика соопштува дека согласно Законот за празниците, 1 април 2024 година (понеделник) вториот ден на Велигден, според Грегоријанскиот календар, е неработен ден за граѓаните од католичка вероисповед во Република Македонија.

Министерството за труд и социјална политика на граѓаните од католичка вероисповед им го честита празникот.

АВМУ: Донесено упатство за радиодифузерите за Претседателските и Парламентарни избори 2024

 Агенцијата за аудио и аудиовизуелни медиумски услуги (АВМУ), со цел појаснување на начинот на примена на правилата од Изборниот законик донесе упатство за радиодифузерите за Претседателските и Парламентарни избори 2024.

Како што соопштија денеска од АВМУ, со упатството се опфатени правилата за лимитите за платеното политичко рекламирање (ППР), означувањето на нарачателот на рекламирањето, распределбатата на времето во вести кај Јавниот сервис, бесплатното политичко претставување на Собранискиот канал, обезбедувањето пристапност на содржините за изборниот процес за лицата со попреченост, правилата за известување во деновите на изборниот молк особено за периодот на преклопување на двата изборни процеси.

- За време на изборната кампања за Претседателските избори, во првиот круг на гласање, радиодифузерите може да емитуваат вкупно девет минути и триесет секунди дополнително време за рекламирање на реален час емитувана програма, исклучиво наменети за ППР. Во упатството е точно утврдена распределбата на овие минути меѓу седумте подносители на листи/кандидатите за претседател. Во вториот круг на гласање вкупното време за ППР ќе зависи од времето за ППР што го користат подносителите на листи/кандидатите за претседател кои ќе ја продолжат изборната кампања во вториот круг, се наведува во соопштението.

За време на изборната кампања за Парламентарните избори, се појаснува во соопштението, радиодифузерите имаат право на дополнителни девет минути и триесет секунди за рекламирање на реален час, исклучиво наменети за ППР. По потврдувањето на поднесените листи на кандидати за пратеници од страна на Државната изборна комисија, Агенцијата соодветно ќе го дополни упатството за радиодифузерите за Претседателските и Парламентарни избори 2024.

- За време на изборниот молк за Претседателските избори, на 23 и на 24 април (до 19 часот) 2024 година, продолжува изборната кампања за Парламентарните избори, но запира медиумското покривање во вестите и во посебните-информативни емисии на учесниците во изборните кампањи за двата изборни процеси, се додава во соопштението од АВМУ.

Јавниот сервис и телевизиите на државно ниво што ќе објавуваат платено политичко рекламирање, треба да емитуваат содржини поврзани со изборниот процес во формат пристапен за лицата со попреченост.

Упатството за радиодифузерите за Претседателските и Парламентарни избори 2024 е достапно на веб страницата www.avmu.mk.

Коалиција Вреди: ДУИ во руско сценарио бара лек за изборниот пораз

Навреме предупредивме дека очајниот ДУИ смислил сценарио за предизвикување политичка криза после првиот круг на претседателските избори со цел да избегне чесно признавање на извесниот пораз.

Нивен сон е Техничката Влада на Талат Џафери да опстои повеќе од предвидените 100 дена.

Бујар Османи избегнува одговор на многу логичното прашање што правел како претседавач со ОБСЕ во текот на 2023 за оваа меѓународна институција да оцени дека постои потенцијал за нарушувањето на безбедноста во изборниот процес и го зголеми бројот на набљудувачи. Исто така молчи дали Османи како домаќин на Лавров го прашал за рецептот за суспендирање на демократската волја на граѓаните.

Но, контурите на ова РУСКО сценарио полека излегуваат на виделина. Владата на Талат Џафери незаконски спречува поставување на началник и дополнителен началник на СВР Тетово за да може да ги злоупотребува партиските војници на ДУИ инсталирани во полицијата во кампањата. Потврда за ова е последниот скандал со училиштето во Житоша кое не само што е претворено во штаб на ДУИ, туку во него полицајци отворено агитираат за Али Ахмети, се фотографираат и објавуваат на социјалните мрежи.

Очекуваме дека раководството на МВР соодветно ќе ги евидентира и санкционира овие девијации од страна на полициски службеници.

Јасно им порачуваме на полициските службеници и останати кадри на ДУИ во државните институции, добро да размислат какви партиски задачи прифаќаат и спроведуваат. Ништо не може да ја смени реалноста. ДУИ после 08 мај преминува во опозиција и за секој нивен кадар кој се огрешил пред законите ќе следи соодветна правосудна постапка. Добро е секој партиски активист на ДУИ да размислува трезвено и да не се впушта во незаконски авантури лажно верувајќи дека ќе продолжат кариерите на Али Ахмети, Бујар Османи и Артан Груби.

Знаеме дека исплашеното раководство на ДУИ и нивните коалициони другарчиња се подготвени на различни предизборни далавери, но треба да земат предвид дека на секој обид за спречување на слободно, фер и демократско гласање на Албанскиот народ, жестоко ќе одговориме. Ништо не може да ги спречи промените. Гласачите уште повеќе се мотивираат да гласаат против ДУИ кога ги гледаат овие нивни очајнички потези. Бранот е тргнат и тој секојдневно ќе расте додека не се претвори во цунами за ДУИ на изборите.

Коалиција Вреди

притисни ентер