Од СДСМ велат избори на 14 јуни се можни. Од владејачката партија, ги отфрлија како неточни тврдењата на лидерот на ВМРО-ДПМНЕ, Мицкоски, дека според Венецијанската комисија се потребни 60 дена за избори после вонредна состојба, што би значело некаде во јули.
Од ВМРО- ДПМНЕ велат дека засега нема да лицитираат со датуми за избори, бидејќи приоритет е здравјето на граѓаните. Велат на утрешната лидерска средба ќе настапат со план којшто ќе води до избори, но очекуваат одлуката за изборен термин да се донесе со консензус на партиските лидери.
ДПА ја поддржува идејата за избори во средината на јуни. Лидерот на партијата Мендух Тачи смета дека брзи избори се важни за стабилизирање на економијата во наредниот период. Според него треба да се отворат верските објекти, бидејќи битката со вирусот ќе трае.
-Мислам дека после празникот Бајрам по 21, 22 дена да имаме избори. Многу е важно да има избори затоа што покрај оваа битка со вирусот ни претстои уште една голема битка, битка за економско опоравување на нашиот народ, изјави Тачи.
Позицијата на ДУИ што деновиве ја соопшти вицепремиерот Бујар Османи е дека треба да се исполнат два услова за одржување на избори – да не се загрози здравјето на граѓаните и да има набљудувачи од ОБСЕ/ОДИХР. Ставот на другите партии се уште се чека.
На лидерската средба кај шефот на државата во Вила Водно поканети се лидерите на СДСМ, на ВМРО-ДПМНЕ, на ДУИ, на ДПА, на БЕСА и на Алијансата на Албанците, а ќе присуствува и претседателот на Собранието Талат Џафери.
За конечниот датум за одржување на изборите освен партиските лидери, позитивен сигнал треба да даде и Комисијата за заразни болести која се очекува да да даде насоки за спроведување на чинот на гласање и како граѓаните да ги почитуваат мерките за заштита.