Делото „Љубовта е во кофа“ е понудено од аукциската куќа „Сотби“ во Лондон, по првична проценета цена од четири до шест милиони фунти (5,5 до 8,2 милиони долари).
По десетминутно наддавање, девет понудувачи во салата и онлајн и преку телефон, делото е продадено по цена три пати повисока од горната проценета граница.
Делото се состои од полу-исечено платно во рамка, а на него е нацртано девојче, обидувајќи се да посегне по балон во форма на срце.
Кога последен пат било продадено во Сотби во октомври 2018 година, делото било познато како „Девојчето со балон“. Во моментот кога анонимен европски купувач ја даде победничката понуда од еден милион фунти (1,4 милиони долари), скриениот механизам за сечење што Бенкси го вградил во рамката профункционира и платното поминало низ него и делумно останало да виси под рамката.
Во тоа време, аукциската куќа „Сотби“ била критикувана затоа што не го забележале механизмот за сечење, но тогашниот купувач одлучил да не се откаже од купувањето, што денес му се исплатеше, бидејќи цената на делото скокна.
Делото брзо стана едно од најпознатите дела на Бенкси, а Сотби пред денешната аукција го испратиле на изложби во различни градови, вклучително и Њујорк и Хонг Конг.
Иако важи за еден од најскапите современи уметници, идентитетот на 40-годишниот Британец од Бристол не е познат бидејќи пишувањето графити на јавен простор е забрането и казниво во многу земји.