Македонија

Делегација предводена од претседателот Костадиновски на билатерална средба во Уставниот суд во Романија

Делегација на Уставниот суд предводена од претседателот д-р Дарко Костадиновски денеска, во Букурешт oдржа билатерална средба со претставници на Уставниот суд на Романија.

Во фокусот на средбата беа улогата и надлежностите на уставните судови во заштитата на супрематијата на Уставот, како и на перспективите за билатерална соработка.

Заедничка тема на средбата беше: „Јавната комуникација на уставните судови”.

Покрај претседателот Костадиновски, дел од делегацијата беа судиите проф. д-р Ана Павловска Данева, м-р Фатмир Скендер, Генералниот секретар на Судот м-р Виолета Георгиевска и Љубица Гаџовска, шеф на Кабинетот на претседателот на Уставниот суд.

На почетокот на средбата, претседателката на Уставниот суд на Романија, Елена-Симина Танасеску упати поздравно обраќање, во кое истакна дека оваа работна средба е знак на длабока заемна почит и истовремено, автентичен израз на заложбата за градење и зацврстување блиски односи меѓу двата уставни суда.

„Сметам дека ваквите средби се уште поважни во време кога уставните судови се повикани да одговорат на сè посложени предизвици и кога заштитата на владеењето на правото, уставната демократија и основните права бара не само институционална цврстина, туку и дијалог, заедничко размислување и размена на добри практики“, изјави Танасеску.

Таа, исто така, истакна дека Уставите на Романија и на Македонија биле донесени во 1991 година, во историски контекст длабоко обележан со трансформацијата на Централна и Југоисточна Европа и со воспоставувањето нови темели на владеењето на правото и уставната демократија.

Претседателката, исто така, посочи дека избраната тема на разговорите е особено актуелна, бидејќи во општество во кое информациите се движат со досега невидена брзина и во кое од јавните институции постојано се очекува да ги објаснуваат своите одлуки, комуникацијата повеќе не може да се смета за секундарен елемент од работата на еден уставен суд.

„За еден уставен суд, јавната комуникација мора да постигне деликатна рамнотежа: од една страна, почитување на правната природа и авторитетот на уставната одлука, а од друга страна, легитимната потреба на граѓаните да го разберат образложението и значењето на одлуките кои можат директно да влијаат врз нивниот живот. Во суштина, станува збор за довербата. А јавната доверба не може да се наметне. Таа се гради со текот на времето, преку професионализам, независност, транспарентност и способност на институцијата на ригорозен и јасен начин да ја објасни улогата што ја има во уставната архитектура“, истакна претседателката на Уставниот суд на Романија.

На средбата, од страна на Уставниот суд на Романија,покрај претседателката Танасеску, која е и претседателка на Асоцијацијата на франкофонските уставни судови, учествуваа и судиите Георге Стан, Михаела Чиокина, Михаи Бусуиок и Асталош Чаба Ференц, како и Бенке Кароли, прв судиски асистент, Кристина Титиришка, судиска асистентка и директорка на Кабинетот на претседателката.

Претседателот на Уставниот суд на Македонија, д-р Дарко Костадиновски, го истакна големиот предизвик со кој денес се соочува традиционалното сфаќање според кое „судовите зборуваат само преку своите одлуки“.

„Тоа не е затоа што судските одлуки ја изгубиле својата централна улога, напротив, тие и понатаму остануваат главната и најавторитетната форма на комуникација на еден суд. Меѓутоа, начинот на кој денес се создаваат, пренесуваат и толкуваат информациите суштински ја промени средината во која функционираат уставните судови“, изјави претседателот Костадиновски.

Во таа насока, во своето обраќање тој издвои неколку суштински аспекти:

Од транспарентност кон активна институционална комуникација;

Судот треба да биде извор на информации, а не само тема во медиумите;

Целта не е популарност, туку јасност;

Отсуството на одлуки или институционалниот молк не се секогаш неутрални;

Транспарентноста мора да има јасно утврдени граници;

Формата може да се менува, но правната суштина останува непроменета;

Дигиталната комуникација е и двонасочен процес;

Нашето искуство потврдува дека постои вистински интерес кај јавноста за директно информирање;

Отвореноста може да биде и средство преку кое независноста станува видлива. Следниот чекор во овој процес беше воведувањето директен пренос на седниците на Уставниот суд;

Комуникацијата не може да го замени независното и висококвалитетно судско одлучување.

„Транспарентноста и јавната комуникација не се идентични поими. Поголемата транспарентност не значи дека уставните судови треба да влегуваат во јавна дебата. Постои суштинска разлика меѓу тоа да се објасни една одлука и таа јавно да се брани. Критиката на судските одлуки е легитимен елемент на секое демократско општество. Улогата на Судот не е да ја задушува критиката, туку да обезбеди јавната дебата да има пристап до точни информации за тоа што Судот навистина одлучил. Токму затоа рамнотежата е многу тешка: отвореност без политизација, достапност без популизам и комуникација без нарушување на судската воздржаност“, истакна претседателот Дарко Костадиновски.

Во рамки на билатералната средба, судијата Асталош Чаба Ференц имаше презентација на тема: „Дали се менува јавната комуникација на уставните судови? Дилеми и предизвици“.

Работната средба се одвиваше во дух на отвореност и пријателство, а двете страни особено ја оценија подготвеноста за развивање вистински судски дијалог и размена на искуства меѓу двата суда.

На крајот од средбата, претседателот Костадиновски беше поканет да се потпише во Книгата на честа на Уставниот суд на Романија, соопштуваат од Уставниот суд.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Си Џинпинг го покани Трамп во Кина

Кинескиот претседател Си Џинпинг, по завршувањето на тридневната државна посета на САД, го покани американскиот претседател Доналд Трамп на нова посета на Кина.

За време на церемонијата за чај во Белата куќа, Си рече дека двајцата лидери можеби ќе имаат уште две можности да се сретнат оваа година: на самитот на Азиско-пацифичката економска соработка (АПЕК) во Кина и на самитот на Г20 во Мајами во декември.

„Ги покануваме претседателот и неговата сопруга да ја посетат Кина“, рече Си.

„Па, ви благодарам многу, ќе бидеме таму“, одговори Трамп, а потоа додаде дека ќе „разговара многу“.

Си и неговата сопруга Пенг Лијуан пристигнаа во главниот град на САД во среда на тридневна државна посета, со високи трговски тензии меѓу двете суперсили високо на агендата.

Малку конкретни резултати

Иако двајцата лидери јавно разменија комплименти, од нивните приватни средби произлегоа малку конкретни резултати. Се очекува САД да објават повеќе детали за потенцијалниот напредок во трговските разговори во понеделник.

Трамп последен пат ја посети Кина во мај, пишува dpa. Овогодинешниот самит на АПЕК треба да се одржи во Шенжен во ноември.

Можна средба со Путин

Рускиот претседател Владимир Путин, исто така, го најави своето пристигнување таму, поттикнувајќи шпекулации за можна трилатерална средба меѓу Си, Трамп и Путин.

Трамп и Си се сретнаа на маргините на самитот на АПЕК и минатата година во Јужна Кореја, каде што постигнаа пошироко трговско примирје.

Тагови: Доналд Трамп Си Џинпинг

Македонија

Мицкоски: Не бараме полесен пат, бараме пат уреден со правила – мала држава има право на исто достоинство и ист глас како големите сили

Евроинтеграцијата на Македонија трае надвор од секој разумен рок, а правилата мора да важат еднакво за малите и големите држави .

Евроинтеграцијата на Македонија трае надвор од секој разумен рок, а правилата мора да важат еднакво за малите и големите држави – ова беше една од клучните пораки на премиерот Христијан Мицкоски од говорницата на Генералното собрание на Обединетите нации. Мицкоски порача дека Македонија направила тешки компромиси во име на мирот, соработката и европската интеграција, но дека довербата не може бесконечно да биде еднострана обврска. Македонија нема да ја префрли својата одговорност на Брисел, рече Мицкоски порачувајќи дека мора да го зајакнеме владеењето на правото, да изградиме поефикасни институции и поконкуретна економија.

„Истовремено, очекуваме европската интеграција да остане процес заснован на заслуги и мерливи критериуми — а не процес во кој билатералните прашања постојано можат да ја поместуваат целта. Не бараме полесен пат. Бараме пат уреден со правила. Не бараме пониски стандарди. Бараме стандардите да останат стандарди. Ова е еднакво важно и за кредибилитетот на Европа, во време кога нејзината геополитичка тежина сѐ повеќе ќе зависи од способноста своите заложби да ги претвори во конкретни политички резултати, од решеноста да ги брани вредностите за кои се залага и да остане истрајна во нивното унапредување, и покрај многуте предизвици со кои се соочува.“

Тој упати повик до Европската Унија, кога веќе бара од помалите земји – кандидатки да ги почитуваат нејзините правила, и таа самата да ги почитува правилата кои што ги поставила. Според него, билатералните прашања не треба постојано да ја поместуваат целта на евроинтеграциите.

„Ако од малите држави се очекува да ги почитуваат правилата, тогаш правилата мора и ним да им обезбедат предвидливост. Ако од кандидатите за членство во една организација се бара да исполнат одредени критериуми, тогаш исполнувањето на тие критериуми мора да води кон напредок. Ако бараме од граѓаните да им веруваат на институциите, тогаш институциите мора да покажат дека нивниот збор има вредност и дека преземените обврски траат. Правилото што важи денес не може утре да биде поинакво само затоа што се променил односот на силите. И преземената обврска не може да биде привремена политичка погодност. Таа мора да биде основа врз која луѓето ќе можат да ја планираат својата иднина.“

Осврнувајќи се на поновата историја на земјата, Мицкоски рече дека Македонија повеќепати се откажувала од нешто што, како што нагласи, природно ѝ припаѓа како основно право. Според него, земјата носела тешки одлуки и правела компромиси во име на мирот, соработката и интеграцијата, често по цена на чувството за достоинство и правда.

„Нашата историја не учи дека меѓународните компромиси се многу тешки и дека мирот, стабилноста и интеграцијата бараат политичка храброст и големи жртви. И без намера да звучам поучувачки, ако некој сака да види пример за земја која повеќепати се откажала од нешто што природно и припаѓа како основно право, нешто што многумина го земаат здраво за готово, доволно е да погледне во поновата историја на мојата нација. Историја обележана со предизвици, со безбедносни ризици од регионални размери со постојани компромиси и отстапки направени во име на мирот, соработката и повисоките цели на интеграцијата., често по цена на нашето најосновно чувстсво за достоинство и правда. Донесовме навистина тешки одлуки. Продолживме напред дури и кога процесите траеја подолго отколку една генерација граѓани што можеше разумно да ги очекува. Но токму затоа гледајќи ги тие одлуки со временска дистанца и јасна свест на реалноста денес можам одговорно да кажам дека довербата не може бесконечно да биде еднострана обврска.“

Во обраќањето пред Обединетите нации, Мицкоски се осврна и на потребата од посилна и поефикасна меѓународна соработка. Порача дека светот се соочува со нови безбедносни, економски и технолошки предизвици, а ОН мора да имаат поголема способност да одговорат на нив. Во услови кога, како што рече, се менува глобалната рамнотежа, Мицкоски повика на почитување на меѓународното право, еднакви правила и систем во кој довербата и одговорноста важат за сите.

Автомобилизам

Фолксваген повлекува 4 милиони возила- проблемот со управување го имаат Голф8, дури 700.000 Ауди...

Германскиот автомобилски гигант „Фолксваген Груп“ се соочува со едно од најголемите повлекувања на возила во својата понова историја.

Германскиот автомобилски гигант „Фолксваген Груп“ се соочува со едно од најголемите повлекувања на возила во својата понова историја, кое вклучува околу четири милиони автомобили ширум светот поради можен сериозен дефект во системот за управување.

Повлекувањето влијае не само на моделите на матичните брендови „Фолксваген“ и „Ауди“, туку и на возилата на преостанатите брендови од групите „Шкода“ и „Сеат“, објавува германскиот дневен весник „Ханделсблат“.

Од вкупниот број повлечени возила, околу 2,16 милиони се возила на „Фолксваген“ (вклучувајќи го и популарниот модел „Голф 8“, повеќе од еден милион возила се модели на „Шкода“, околу 700.000 се на „Ауди“, додека околу 200.000 возила се погодени од „Сеат“.

Според Германската федерална администрација за моторни возила (KBA), проблемот е идентификуван во завртка во механизмот за управување што може да се скрши, што во најлош случај доведува до целосно откажување на воланот при возење.

Според извори од компанијата, итните служби и замената на делови ќе предизвикаат огромни финансиски трошоци.

„Фолксваген“, додаваат изворите, немал повлекување од ваков обем откако избувна скандалот со дизел („Дизелгејт“) пред повеќе од една деценија.

Тагови: фолксваген