Неколкумина од новоизбраните министри ги презедоа новите функции, по вчерашната целодневна собраниска седница. Во зовриена атмосфера и без присуство на опозицијата, Собранието доцна синоќа ги избра новите осум министри од владината реконструкција. Наместо фокус на кадровските промени, седницата беше обележана со жестоки вербални пресметки, навреди, меѓусебни обвинувања и барања за извинување, поради што опозицијата ја напушти собраниската сала. Сите министри беа избрани со 69 гласа „за“, без ниту еден глас „против“ или „воздржан“ по што дадоа свечена заклетва во Собранието Бурниот ден беше заокружен со заедничка фотографија со премиерот Мицкоски и новоизбраните членови на неговиот кабинет.

Расправата за владината реконструкција помина во тензична расправа меѓу власта и опозицијата. На крајот од седницата, непосредно пред гласањето, премиерот Мицкоски упати извинување до пратениците и граѓаните за настаните што ја одбележаа собраниската седница.

- Среќен сум што го имам ова парламентарно мнозинство, кое досега испорача многу реформски закони, кои, впрочем, и еврокомесарката Марта Кос го истакна при нејзината последна посета кај нас, и тоа јавно. Како претседател на Владата, сакам да се извинам на вас, на пратениците и на граѓаните што денеска бевме сведоци на овие настани и се надевам дека тоа никогаш повеќе нема да ни се повтори“, изјави Мицкоски.

Извинувањето на Мицкоски следеше откако пратеничката група на СДСМ обвини дека кандидатот за министер за локална самоуправа Иван Стоиљковиќ упатил навреди кон нивните пратеници, а за истото се пожалија и од ДУИ. Тие бараа лично извинување од Стоилковиќ, но и од премиерот Мицкоски, како и да прекине седницата, а откако не добија ја напуштија истата. Претходно СДСМ свикаа и вонредна прес-конференција, на која оценија дека однесувањето на владините претставници било надвор од сите демократски критериуми. Во смирување на страстите не помогна ниту вонредниот состанок на координаторите на пратеничките групи со собранискиот спикер Африм Гаши на кој според опозицијата, било договорено да се донесе заклучок со кој ќе се осуди однесувањето на Стоиљковиќ, но таков чекор не бил реализиран.

-Со цел за непречено функционирање на Собранието, а како дел од заедничката координација во име на парламентарното мнозинство сакам јасно и гласно да кажам дека не одобруваме никакво однесување спротивно на принципите што ги заговаравме во Етичкиот кодекс и согласно Деловникот заради заштита на угледот и дигнитетот на Собранието, изјави Мицевски од ВМРО-ДПМНЕ.

-Друг треба да побара извинување, тој што доаѓа за министер треба да побара што го направи цело ова, а бараме од премиерот да преземе мерки, изјави Ајдари од ДУИ.

-Ваков начин на однесување којшто продуцира и омраза, доведе до работа на насилство треба да биде навистина осуден. Очигледно е дека не сакате да направиме чекор напред кон подобрување на целата оваа сотојба. изјави Спасовски од СДСМ.

По напуштањето на опозициските пратеници, седницата продолжи, а во салата од оние што не се дел од парламентарното мнозинство останаа само пратениците на Левица кои упатија критики за работата на Владата. Непосредно пред гласањето и тие заминаа од собраниската сала.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.