Дел од мрачната историја на Оксфорд и Кембриџ - Канал 5

Живот

Дел од мрачната историја на Оксфорд и Кембриџ

Британските универзитети на Оксфорд и Кембриџ постојано се рангирани меѓу најдобрите во светот и се прославени со својата академска извонредност.

Дел од мрачната историја на Оксфорд и Кембриџ

Но, мрачната историја е на секој чекор бидејќи Велика Британија, се чини, допрва и уште долго ќе треба да се соочува со своето колонијално минато. Од 2018 година, посетителите може да ги чујат и не толку пријатните приказни од речиси илјадагодишната историја на најстарите универзитети на Островот.

„Ова не е стандардна тура“, гласи воведната реченица на студентката Клер Меккен пред да ја поведе својата група посетители низ калдрмите на Оксфорд, коишто привлекуваат околу седум милиони луѓе секоја година, пренесува „Индекс“.

Величествените градби, многу од нив средновековни, сведочат за богатата историја на универзитетскиот град, којшто се наоѓа на 80 километри северозападно од Лондон. Повеќето британски премиери, вклучително и сегашниот - Риши Сунак, како и главниот опозициски лабуристички лидер Кир Стармер, се образувале зад високите ѕидини на Оксфорд.

Но, првата станица на турата е колеџот „Ориел“, пред којшто се наоѓа статуата на некогашниот студент Сесил Роудс - колонизатор кој во 19. век сонувал за „британска Африка“ од Кејп Таун до Каиро. Меккен, инаку по потекло од Јужна Африка, прочита цитат од Роудс каде што тој ги опишува Африканците како „најодвратните примери на човечки суштества“. Таа ја истакна и неговата улога во Втората бурска војна и фактот дека тој ја основал „Де берс“, компанија што сè уште е светски лидер во трговијата со дијаманти.

Студентката-водич натаму говори за експлоатацијата на рудниците што му донеле богатство на Роудс и му овозможиле да ja востанoви Постдипломската стипендија на Роудс - една од најпрестижните академски награди во светот. Поранешниот американски претседател Бил Клинтон е меѓу добитниците на таа стипендија.

Меккен праша: Што треба да се случи со споменикот на Роудс? ...Кампањата „Роудс мора да падне“, инаку, почната од група студенти, бараше да се отстрани споменикот, но Оксфорд во 2021 година одлучи статуата да остане на своето место.

Според многу историчари, уривањето на кој било споменик е вандализам. Тие велат: секој споменик е обележје на своето време - и позитивните, и негативните личности се дел од историјата.

Уште една занимливост е што девојките добиле право да студираат на Оксфорд во 1870 година, но морале да чекаат до 1920. за да им бидат признаени дипломите. Ним, на жените, исто така, долго време им било забрането да влегуваат во библиотеките за да „не ги вознемируваат“ мажите, објаснува Меккен. „Ориел“, основан во 14. век, е последниот колеџ при Оксфорд што ги отвори вратите за жените - кон крајот на 1985 година.

Следи колеџот „Ол соулс“, којшто Меккен го опишува како „најексклузивниот колеџ во Оксфорд“. Основан во првата половина на 15. век, тој е еден од најелитните и прима само двајца или тројца нови студенти годишно.

- „Ол соулс“ ни покажува како е стекнат престиж преку економска експлоатација и ропство, вели Меккен.

По протестите од 2020. против насилството врз црнците, „Ол соулс“ објави дека повеќе нема да ја именува својата библиотека по Кристофер Кодрингтон - уште еден озлогласен некогашен студент од 17. век. Имено, по неговата смрт во 1710 година, тој му оставил на Универзитетот дел од своето богатство стекнато на семејните плантажи во Индија, коишто биле работени од робови од африканско потекло.

Повеќе од 20.000 луѓе учествувале во овие туристички прошетки со приказни од темната страна на историјата, од почетокот на 2018 година. Такви има и во Кембриџ, а иницијаторите се надеваат дека ќе ги прошират и во Лондон, а натаму и во Париз и на други места.

- Дали знаевте дека Оксфорд и Кембриџ заедно поседуваат повеќе земја отколку Англиканската црква?, прашува водичот Ешли Ленс на својата тура близу раскошната капела на „Кралскиот колеџ“ при Универзитетот Кембриџ.

Колеџот „Сент Џонс“, пак (основан 1511 година, при Кембриџ), прифаќа жени-студентки од 1980 година. Но, кога пристигнале првите девојки, службеникот го спуштил знамето на половина копје и носел црна лента...

Покрај толку многу контроверзии од минатото, посетителите и новите студенти велат дека овие информации и приказни се корисни и треба да се знаат./МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Седум години по трагедијата кај Ласкарци каде загинаа 16 патници во автобусот на Дурмо Турс

Седум години по трагедијата кај Ласкарци каде загинаа 16 патници во автобусот на Дурмо Турс, семејствата на загинатите и повредените сè уште чекаат конечна судска разрешница.

Седум години по трагедијата кај Ласкарци каде загинаа 16 патници во автобусот на Дурмо Турс

По одлуката на Врховниот суд со која е укината пресудата за обвинетите и предметот е вратен на повторно одлучување пред Апелациониот суд, семејствата излегоа со писмо до јавноста. Велат дека одлуката ја примиле со неверување и чувство на неправда и дека дополнително ја нарушува довербата во правосудниот систем.

-Сметаме дека ваквата одлука дополнително ја поткопува и онака сериозно нарушената доверба на граѓаните во правосудниот систем. Ова не претставува само неуспех на правосудниот систем, туку и сериозен удар врз целото општество,- - Писмо од семејствата на загинатите кај Ласкарци.

Семејствата потсетуваат дека во меѓувреме дел од родителите кои ги загубиле своите деца не ја дочекале конечната судска разрешница. Тие бараат новата постапка да се води без понатамошно одолговлекување и одлуката да биде заснована на фактите и доказите изнесени во текот на судскиот процес.

-Она што го бараме е правда заснована на фактите и доказите изнесени во текот на судскиот процес, кои недвосмислено укажаа на причините што доведоа до трагедијата и врз основа на кои беше утврдена одговорноста во првостепената постапка, а потоа и во второстепената, без понатамошно одолговлекување и без никакви компромиси во утврдувањето на одговорноста за изгубените човечки животи,- - Писмо од семејствата на загинатите кај Ласкарци.

На 9 септември Врховниот суд ја укина пресудата на Апелација и предметот го врати на повторно одлучување. Во образложението подоцна наведе дека второстепениот суд не дал конкретни одговори на клучните жалбени наводи, ниту доволно објаснил како дејствијата на секој од осудените придонеле за трагедијата. Посочени се и прашањата околу техничката исправност на автобусот и вештачењата за причините за несреќата, како и тоа дека не било спроведено супервештачење за здравствената состојба на возачот. Сега Апелациониот суд повторно треба да ги разгледа жалбите и да донесе нова одлука.

YouTube video

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

РКЕ: Цената на дизелот се зголемува за 5,50 денари по литар, бензините поевтинуваат

Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 1,50 ден/лит.

РКЕ: Цената на дизелот се зголемува за 5,50 денари по литар, бензините поевтинуваат

Имајќи ги предвид влијанијата на погоре наведените елементи во формирањето на цените на нафтените деривати согласно Методологијата, утврдени се следните малопродажни цени на нафтените деривати: Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 1,50 ден/лит, во однос на малопродажните цени утврдени со одлуката за утврдување на највисоки малопродажни цени на нафтените деривати и горива за транспорт од 14.09.2026 година и со тоа малопродажната цена на ЕУРОСУПЕР БС-95 изнесува 99,00 ден/лит, додека малопродажната цена на ЕУРОСУПЕР БС-98 изнесува 101,00 ден/лит.

Малопродажната цена на ЕУРОДИЗЕЛ (Д-Е V) се зголемува за 5,50 ден/лит, во однос на малопродажната цена утврдена со одлуката за утврдување на највисоки малопродажни цени на нафтените деривати и горива за транспорт од 14.09.2026 година и со тоа малопродажната цена на ЕУРОДИЗЕЛ (Д-Е V) изнесува 104,50 ден/лит.

Малопродажната цена на Екстра лесното масло за домаќинство (ЕЛ-1), се намалува за 7,00 ден/лит, во однос на малопродажната цена утврдена со одлуката за утврдување на највисоки малопродажни цени на нафтените деривати и горива за транспорт од 14.09.2026 година 5 Изготвил: Јулијана Димоска-Исајловска и со тоа малопродажната цена на Екстра лесното масло за домаќинство на (ЕЛ-1) изнесува 102,50 ден/лит. Малопродажната цена на Мазутот М-1 НС, се зголемува за 1,835 ден/кг, во однос на малопродажната цена утврдена со одлуката за утврдување на највисоки малопродажни цени на нафтените деривати и горива за транспорт од 14.09.2026 година и со тоа малопродажната цена на Мазутот М-1 НС изнесува 50,078 ден/кг.

РКЕ

Тагови: РКЕ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Мицкоски во Њујорк разговарал со американскиот државен секретар Марко Рубио

Владината делегација ја продолжува посетата во Њујорк, каде во фокусот се политичкиот дијалог со американската администрација но и европската перспектива на земјава.

Мицкоски во Њујорк разговарал со американскиот државен секретар Марко Рубио

Премиерот Христијан Мицкоски објави дека во Њујорк разговарал со американскиот државен секретар Марко Рубио. Според него, директната комуникација на високо политичко ниво е потврда за важноста на стратегиското партнерство меѓу Скопје и Вашингтон и можност за дополнително продлабочување на билатералните односи.

„Во период на сериозни геополитички предизвици, силните партнерства и отворениот дијалог со нашите стратешки сојузници имаат уште поголема тежина. Македонија има јасни државни интереси и продолжува достоинствено и принципиелно да ги застапува заедно со нашите стратешки партнери.“- - Христијан Мицкоски.

Околу 130 шефови на држави и влади неделава се во Њујорк на Генералното собрание на ОН, каде главни теми ќе бидат војните во Украина и на Блискиот Исток, глобалната безбедност, климатските предизвици и регулирањето на вештачката интелигенција а генералната дебата главниот дел со обраќања на светските лидери е од 22 до 28 септември.

Првиот човек на ООН, Антонио Гутереш, пред почетокот на генералната дебата повика на разум и на посветеност кон мирот во светот.

-Оваа недела, лидери од целиот свет, ќе се соберат во оваа иста соба, собата на Генералното Собрание на ООН. Мојата порака до нив е јасна: Дојдете за мирот, за достоинството за правдата и за хуманоста. Единствено со меѓународна соработка може да изградиме подобар свет. И никогаш не треба да се предадеме во борбата за тоа. изјави – Генерален секретар на ОН, Антонио Гутереш.

Мицкоски во четврток треба да се обрати пред светските лидери од говорницата на ОН, со што ќе биде заокружен политичкиот дел од посетата на САД.

Инаку вечерва по македонско време, на маргините на Генералното собрание на Обединетите нации, ЌЕ се одржИ состанок на неформалната група „Пријатели на Западен Балкан“. Домаќин е шефот на италијанската дипломатија Антонио Тајани, а покрај претставниците на шесте земји од Западен Балкан учествуваат и земјите членки на групата, како и претседателката на Европскиот парламент Роберта Мецола. Главна тема е забрзувањето на европската интеграција на регионот.

Во меѓувреме, Мицкоски и министерот за надворешни работи Тимчо Муцунски се сретнаа и со македонската заедница во Њу Џерси. Македонската делегација од САД најави продлабочување на стратешкото партнерство со Вашингтон, инвестиции во антимон, дата-центри и енергетика

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер