Македонија

Дел од граѓаните ангажирани во избирачките одбори на локалните избори, се уште го чекаат својот хонорар

Пет месеци по локалните избори, дел од граѓаните кои беа ангажирани во избирачките одбори , се уште чекаат да го добијат својот хонорар.

Според нивните сведоштва, во некои општини исплатата доцни со месеци, додека во други наместо целосен износ, исплатена им е само половина од договорениот хонорар. Жителка на општина Гази Баба, која сакаше да остане анонимна, но и е позната на редакцијата, вели дека без подетално објаснување, им било кажано дека ќе добијат само половина од надоместокот, затоа што според објаснувањата, општината донела таква одлука.

Градоначалникот на општината, Бобан Стефковски, признава дека доценње има, но вели дека одговорноста за скопските општини е поделена со Град Скопје.

-Во општина Гази Баба се уште не се исплатени средствата бидејќи се соочуваме со одредени финансиски предизвици. Членот од законот насочува на заедничка исплата на општините и на Град Скопје. Ние правиме одредена финансиска консолидација и наредниот период че ја исплатиме нашата обврска, вели Стефковски.

Доцнења Има со исплатите и во Ѓорче Петров и Аеродром. Од Аеродром не информираа дека денеска на седница на Совет ќе се гласа за исплата на хонорарот. Во Општина Битола пак исплатени се само 25 проценти од вкупната сума. Неофицијално, од општините велат дека во минатото овие средства биле исплаќани во вредност од 30 проценти, додека остатокот го плаќал ДИК, и очекуваат и овој пат Државната изборна комисија да го плати остатокот од сумата. Инаку станува збор за сума од над 150 000 евра.

Од Државната изборна комисија објаснуваат дека ДИК досега неколку пати се обрати со укажување до општините, и минатата година со цел навремено да се предвидат средства за оваа намена во општинските буџети, но дека нема друга надлежност ниту пак правен или извршен механизам за постапување по законските обврски за исплата на надоместоците на изборните органи за Локалните избори 2025.

-Правото на надоместок е утврдено со Изборен закон и според истиот, за локални избори тоа е обврска на општините и Градот Скопје. – велат од ДИК

Инаку, членовите на избирачките одбори се избираат по случаен избор од редот на вработените во администрацијата, како и претставници на власта и опозицијата, а за нивниот ангажман за време на изборите им следува надомест, утврден согласно правилникот на Државната изборна комисија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Филипче за 25 години од Охридскиот договор: Соживот, а не поделби и омраза

По повод 25 години од потпишувањето на Охридскиот рамковен договор, претседателот на СДСМ, д-р Венко Филипче, порача дека договорот е темел на мирот, соживотот и демократската иднина на државата.

Филипче нагласи дека Македонија е заеднички дом на сите граѓани и дека различностите треба да бидат наша сила, а не алатка за политички поделби и ширење омраза, но денес, наместо да се негуваат вредностите на мирот, дијалогот и меѓусебното почитување, власта на Мицкоски повторно ги разгорува поделбите и создава атмосфера на страв и омраза.

„Денеска одбележуваме 25 години од потпишувањето на Охридскиот рамковен договор со кој беше ставен крај на вооружениот конфликт во 2001 година и се потврди територијалниот интегритет и демократската иднина на Македонија.

Токму најголемата сила на нашата држава е во тоа што е заеднички дом на Македонци, Албанци, Турци, Срби, Власи, Роми, Бошњаци и сите други наши граѓани. Различностите се дел од нашето општество и наша обврска е да ги негуваме како вредност, а не да ги користиме за политички поделби.

Охридскиот рамковен договор е потсетник дека мирот, дијалогот и компромисот се секогаш посилни од конфликтот, поделбите и омразата. По 25 години, сите имаме должност да ја градиме иднината на Македонија низ соживот, еднаквост и меѓусебно почитување – а не со поделби, навреди и омраза.

Но токму во овие денови го гледаме спротивното. Криминалната група ВМРО и Мицкоски ја водат класичната кампања на Ванчо Михајлов - кампања за ширење омраза и поделби. Народот го нарекуваат „талог“.

Ги делат граѓаните. Создаваат непријател. Сеат страв. Додека зборуваат за мир и соживот, во пракса прават сè за да го уништат. Македонија заслужува да биде просперитетна, интегрирана држава - дел од Европа, каде секој граѓанин ќе се чувствува сигурен во сопствената земја. Не со поделби. Не со омраза. Не со етикети како „талог“. Со вистина, со правда и со достоинство“, посочи претседателот на СДСМ, д-р Венко Филипче.

Тагови: Венко Филипче

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Превентивни активности за безбеден сообраќај и спречување на измами

Превентивна активност на тема „Носи кацига“

Денеска (13.08.2026), полициски службеници од Отсекот за превенција на СВР Тетово реализира превентивна активност на тема „Носи кацига“, насочена кон возачите на мопеди, мотоцикли и електрични тротинети, на кои им беше укажувано за обврската и потребата за носење на заштитен шлем, напоменувајќи им дека секој учесник во сообраќајот е еднакво одговорен како за својата, така и за безбедноста на сите останати учесници во сообраќајот. Превентивни активности за безбеден сообраќај спроведоа и полициски службеници од СВР Штип во Кочани, Штип, Пробиштип и Делчево. Овие активности имаат за цел да се зголеми нивото на сообраќајна култура и да се намали бројот на сообраќајни незгоди.

Отсекот за превенција при СВР Куманово, пак, во Куманово спроведе превентивна активност со цел информирање на граѓаните како да се заштитат од измами, особено при купување огревни дрва. На граѓаните им беше сугерирано да бидат внимателни, особено доколку некој им нуди огревни дрва по значително пониски цени, затоа што може да бидат жртви на измама, односно да не ги добијат дрвата кои ги платиле.

Тагови: Превентивни активности

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Во текот на изминатото деноноќие 14 лица лишени од слобода поради безобѕирно управување моторно возило

Во текот на изминатото деноноќие на целата територија на државата, полициските службеници лишија од слобода 14 лица поради сторено кривично дело „безобѕирно управување со моторно возило“ по член 297-а од Кривичниот законик.

Од нив, 10 лица управувале моторно возило без возачка дозвола, од кои тројца малолетници. Додека, кај еден од возачите била пронајдена и бела прашкаста материја. Три лица управувале возило под дејство на алкохол, при што едно од нив учествувало во сообраќајна незгода. Едно лице управувало возило во спротивен правец во еднонасочна улица. По целосно документирање на случаите, против лицата ќе бидат поднесени соодветни кривични пријави.

Министерството за внатрешни работи апелира сите учесници во сообраќајот доследно да ги почитуваат сообраќајните правила и прописи, да не управуваат моторно возило без возачка дозвола, доколку имаат изречена мерка за забрана за управување, ниту под дејство на алкохол. Одговорното однесување во сообраќајот е заедничка обврска и клучен предуслов за поголема безбедност на сите граѓани.

Тагови: безобѕирно управување

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.