Дариус Конџи добитник на Златна камера 300 за животно дело на 46. ИФФК „Браќа Манаки“ - Канал 5

Култура

Дариус Конџи добитник на Златна камера 300 за животно дело на 46. ИФФК „Браќа Манаки“

Дариус Конџи е добитник на Златна камера 300 за животно дело на 46. Интернационален фестивал на филмска камера (ИФФК) „Браќа Манаки“, што од 20 до 26 септември ќе се одржува во Битола. 

Дариус Конџи добитник на Златна камера 300 за животно дело на 46. ИФФК „Браќа Манаки“

Оскаровецот Воли Фистер годинава во Битола ќе ја прими Специјалната камера 300 за особен придонес во светската филмска уметност. Ова беше соопштено на денешната втора прес-конференција на ИФФК во пресрет на новото фестивалско издание.

Директорот на ИФФК Димитрија Доксевски рече дека „Браќа Манаки“ е наша гордост и најави дека ќе има исклучително квалитетно издание, со квалитетна програма и доста возбудливо. Потенцира дека Воли Фистер и Дариус Конџи го потврдиле своето присуство на фестивалот, а ќе одржат и мастеркласови.

Потсети дека режисерот Семих Капланоглу е добитник на Специјална камера 300 за особен придонес во светската филмска уметност, а Кирил Џајковски e добитник на наградата „Големата ѕвезда на македонскиот филм“ што ја доделува Друштвото на филмски работници на Македонија (ДФРМ).

Доксевски информира дека мултимедијалниот македонски уметник и филмски режисер Киро Урдин специјално го изработил плакатот за фестивалот.

Селекторот на главната програмата на фестивалот Слаѓан Пенев информира дека на отворањето ќе биде прикажан македонскиот филм „Мајка“ на Теона Стругар Митевска, кој претходно имаше премиера на програмата „Хоризонти“ на филмскиот фестивал во Венеција. На затворањето ќе биде прикажан македонскиот филм „Диџеј Ахмет“ на Георги М. Унковски, наградуван на голем број фестивали.

Марија Апчевска, селектор на интернационалната краткомрежна програма заедно со Атанас Велковски, соопшти дека годинава ќе бидат претставени 14 наслови од целиот свет, од Европа, Америка, Азија, Австралија... Ќе има филмови од Швајцарија, Турција, Сингапур, Филипини.

- Оваа програма го слави краткиот филм како засебна форма и дозволува слобода, од аспект на камера и кинематограферски достигнувања. Како и досега во оваа програма, меѓу другите наслови ќе има и македонски филм „Нова енергија“ на режисерите Сара Климовска и Радован Петровиќ, рече Апчевска. Дополнително меѓу 14-те филмови ќе биде прикажана и нашата копродукција, филмот „Лојнес“, кој имаше премиера на годинашниов Канскиот филмски фестивал.

Таа посочи дека дел од филмовите се со социјални теми, со авантуристички приказни. Тоа се филмови кои имале премиери на големи фестивали, биле добитници на награди, но и има и филмови на нови имиња.

Кумјана Новакова, селекторка на документарната натпреварувачка програма на „Браќа Манаки“ истакна дека програмскиот концепт на оваа програма се води од неколку начела, од кои најзначајни се креативната храброст и посебноста на ликовниот филмски израз. Се обидуваме, како што рече, да се водиме и од социјалниот ангажман на филмот и од одговорноста, општествена, авторска, креативна, продукциска...

- Програмата оваа година ќе претстави осум филмови од цел свет, од Европа, од Јужна Америка, од регионот... Она што ги обединува сите филмови е што се актуелни во социјална, економска, политичка и културна смисла, рече Новакова, додавајќи дека во некои од нив има хибридни пристапи.

Сите филмови подеднакво се натпреваруваат за Железна камера 300. Меѓу осумте наслови во оваа програма се: мексиканскиот филм „Кажи збогум“, „Кога телефонот ќе заѕвони“...

Ханис Багашов, селектор на студентската програма, рече дека ќе бидат прикажани 16 наслови, кои претежно доаѓаат од Европа и од регионот. Ги претстави сите наслови меѓу кои се: премиера на филмот „Сенки на месечината“, „Топли води“, „Биково око“ од Србија, „Со среќа Сара“ од БиХ, „Светло месо“ од Швајцарија...

Тагови: Дариус Конџи Златна камера 300

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Бизарно

Девет жени пронајдени мртви во близина на Јоханесбург, полицијата истражува дали има сериски убиец?

Девет жени се пронајдени мртви во близина на Јоханесбург. Постои страв од сериски убиец.

Девет жени пронајдени мртви во близина на Јоханесбург, полицијата истражува дали има сериски убиец?

За помалку од два месеца, во областа Екурхулени, источно од Јоханесбург во Јужна Африка, пронајдени се телата на девет жени. Полицијата истражува дали некои од случаите се поврзани, додека во јужноафриканските медиуми се засилуваат шпекулациите за можен сериски убиец. Полицијата досега ниту го потврди, ниту го демантираше ова.

Последната жртва била пронајдена во четвртокот во Дон Парк. Се претпоставува дека таа имала околу 30 години. Телото било откриено на отворен простор покрај патот; локалните медиуми известуваат дека жената била делумно облечена и имала смртоносна повреда на вратот.

Полицијата формирала мултидисциплинарен тим за истражување на смртните случаи на жените.

Вршителот на должноста комесар на полицијата во Гаутенг, Фред Кекана, изјави дека истражителите откриле можни поврзаности меѓу некои од случаите, но дека се потребни дополнителни форензички и криминалистички наоди пред да се донесат какви било заклучоци.

Веќе е уапсен маж во врска со едно од убиствата; полицијата проверува дали тој може да се поврзе и со другите случаи, а истовремено истражува и друго лице.

Пет од деветте жртви сè уште не се идентификувани. Страв меѓу жителите Меѓу идентификуваните жртви е 38-годишната Динео Мотапане, чие тело беше пронајдено покрај патот во КваТема. Нејзиното семејство ја идентификуваше откако претходно пријави нејзино исчезнување во полицијата. Серијата смртни случаи предизвика страв кај жителите на Екурхулени и поттикна протести против насилството врз жените.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Продолжуваат истражувањата на праисториската наколна населба во Дојран

Дојран продолжува да го открива своето богато археолошко наследство.

Продолжуваат истражувањата на праисториската наколна населба во Дојран

Праисториската наколна населба кај Мрдаја, во Стар Дојран ќе се истражува и оваа година. Според информациите од Националната установа „Завод и музеј - Струмица", археолошките истражувања се реализираат со учество на археолошки тим од оваа институција, предводен од м-р Зоран Рујак, археолог советник кустос, а се поддржани од Министерството за култура и туризам.

Годинашната кампања е насочена кон истражување на праисториската наколна населба на брегот на Дојранското Езеро, со посебно внимание на содржините и просторните габарити на населбата, како и на временската рамка во која се одвивал животот во неа.

- Уште на самиот почеток, истражувањата дадоа непроценливи сознанија со кои животот во населбата започнал многу порано отколку што досега се мислеше. Досегашните сознанија зборуваа дека наколната населба е од доцното бронзено време и преодниот период помеѓу бронзеното и железното време. Со новите истражувања, се појавија докази, за почетоците на животот во населбата, уште во текот на средното бронзено време. Со ова, почетокот на животот во населбата се враќа во првата половина на вториот милениум пред н.е. - се вели во објавата на НУ „Завод и музеј - Струмица".

Според археолошкиот тим, одредени наоди укажале на широка трговска активност со далечните региони, па дури и со бронзанодобската населба на локалитетот Цареви Кули, Струмица. Заедно со неолитската населба на локалитетот Споменикот-Атици, кај Црничани, праисториската наколна населба Мрдаја -Дојран продолжува да биде место каде што археологијата се среќава со богатото културно наследство на Дојран и Југоисточниот Регион на земјава, велат тие.

Покрај археолошките истражувања на праисториската наколна населба Мрдаја -Дојран, во тек е и изработка на Основен проект за Музеј на вода, во водите на Дојранското Езеро.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Видео: Валјак за трева прегази поранешен англиски репрезентативец, но, фудбалерот потоа продолжи да игра.

Поранешниот англиски фудбалски репрезенативец Андрос Таунсенд (35), кој настапуваше за Тотенхем, Њукасл, Кристал Палас и Евертон, доживеа неверојатен инцидент додека се загреваше во Тајланд. 

Видео: Валјак за трева прегази поранешен англиски репрезентативец, но, фудбалерот потоа продолжи да игра.

Таунсенд се загреваше за време на полувремето од натпреварот меѓу неговиот тим, Прачуап, и Патани. Додека се обидуваше да ја удри топката, тој излезе од просторот предвиден за загревање.

Во тој момент, кон него се движеше валјак за рамнење на теренот, а возачот не го забележа навреме.

-Валјакот го удри Таунсенд во нозете, го собори на земја, а потоа продолжи да се движи преку неговото тело, стигнувајќи сè до половината. Возачот потоа ја запре машината, а соиграчите на Таунсенд веднаш притрчаа да му помогнат. За среќа, Таунсенд помина без сериозни повреди. По инцидентот, тој го продолжи загревањето, па дури и влезе во игра. Тој ја одигра последната минута од натпреварот, во кој неговиот тим, Прачуап, победи со 3–0.

По бизарниот настан, Таунсенд очигледно одлучи сè да претвори во шега. Тој објави видео од инцидентот на социјалните мрежи и се пошегува на сметка на својот поранешен клуб Стоук Сити, познат по својот физички напорен фудбал. „Стоук не беше толку лош“, рече Таунсенд.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер