Да се подигне свеста за „афазија“ - состојба која вклучува проблеми со говорот, по мозочен удар или повреда на главата, но и матичните лекари да ги упатуваат пациентите во центарот кој им нуди здравствена услуга, бараат од Државниот центар за рехабилитација на патологија на вербална комуникација..Афазија може да биде дијагностицирана и кај деца, кои имале вирус кој ги напаѓа нервите или тешка повреда на главата....

„Течни ми се мислите, но зборовите од уста не излегуваат...“ Вака се чувствуваат дел од пациентите што по мозочен удар имаат афазија, последователна состојба која меѓудругото вклучува нарушување на говорот. Многумина од лицата кои ќе доживеат мозочен удар, или силна повреда на главата, не знаат дека има државна институција во која можат да добијат стручна помош, а тоа е Центарот за рехабилитација на патологија на вербална комуникација, или по стар назив Завод за слух, говор и глас, лоциран кај државните клиники, вели Директорката Нермин Теловска. Таа алармира за подигнување на свеста и кај граѓаните, но кај лекарската фела.

Не само возрасни, афазија имаат и деца. Таа може да биде последица од инфекции кои ги напаѓаат нервите, на пример по каснување од комарци кои се пренoсители на вируси, но и силен удар на главата.

Од Здружението „Хоуп“ чија претседателка имала два мозочни удари и има афазија, велат дека ако е одземена способноста за течен говор, не значи дека е одземена и надежда. Од таму велат дека и семејствата на лицата со афазија треба да знаат дека вообичаено интелектот на нивните блиски не е засегнат.

Афазијата е предизвикана од оштетување во делот од мозокот кој го контролира изразувањето и разбирањето. Лицето со афазија може да има проблеми со зборувањето, читањето или пишувањето, а некогаш и разбирањето. Во Македонија се проценува дека со афазија живеат од 5.000 до 10.000 лица.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.