Долготрајното седење може да има негативни последици по здравјето и нормалното функционирање. Може да предизвика болки во грбот, вратот и рамената, намалена циркулација, како и замор (ова на некои можеби ќе им изгледа чудно бидејќи се во седечка положба). Но, недостатокот на активност може да предизвика замор.

Експертите предупредуваат дека луѓето кои поминуваат повеќе од четири или пет часа дневно на компјутер, треба да прават редовни паузи и едноставни вежби кои ја подобруваат циркулацијата, ја намалуваат напнатоста и ги зајакнуваат мускулите. Иако е најдобро повремено да станувате и да шетате, постојат голем број вежби кои можете да ги правите додека сте во канцеларија, а кои ќе ви помогнат да се чувствувате подобро и поенергично. Ако сакате, можете да ги направите и од своето место на седење.

Истегнување на 'рбетот во седечка положба

Истегнувањето на 'рбетот во седечка положба е вежба која ја подобрува флексибилноста на 'рбетот и ја намалува напнатоста во грбот. Редовното вежбање може да ја намали вкочанетоста и болката во долниот дел на грбот, што е чест проблем кај луѓето кои поминуваат многу часови седејќи.

Како да ја направите вежбата:

Седнете исправено на стол со стапалата рамно поставени на подот.

Ставете ги рацете пред вас со дланките свртени кон земјата.

Полека повлечете ја брадата кон градите и издишете додека почнувате да се спуштате надолу, свиткувајќи го 'рбетот напред.

Задржете ја оваа позиција 10 секунди, чувствувајќи истегнување по должината на 'рбетот.

Полека вратете се во почетната позиција и повторете пет пати.

Ротација на вратот

Друга вежба што можете да ја испробате е ротација на вратот. Оваа вежба, ако се прави правилно, може да ја намали напнатоста во вратот и рамената, области кои често се напнати и болни по часови и часови седење пред компјутер. Ротацијата на вратот ја подобрува подвижноста и флексибилноста.

Ротацијата на вратот ја зголемува подвижноста на цервикалниот 'рбет, намалувајќи ја вкочанетоста и болката што произлегуваат од продолженото згрчено држење.

Како да ја направите вежбата:

Седнете исправено и опуштете ги рамената.

Полека свртете ја главата надесно, гледајќи преку рамото и задржете ја таа положба пет секунди.

Вратете се во средината, а потоа свртете ја главата налево и задржете ја позицијата пет секунди.

Повторете пет пати на секоја страна.

Кревање на рамената

Рамената се едни од најпроблематичните подрачја кога седите долго време, особено ако сте под стрес или имате лошо држење на телото. Оваа вежба помага да се опуштите и да ги активирате мускулите на рамото. Покрај рамената, оваа вежба ги релаксира и затегнатите мускули на вратот, намалувајќи ја болката предизвикана по долгото седење или лошо држење на телото.

Како да ја направите вежбата:

Седнете исправено, со рацете опуштени покрај телото.

Полека подигнете ги рамената нагоре, како да сакате да ги допрете ушите со нив.

Држете ја оваа положба неколку секунди, а потоа полека спуштете ги рамената до почетната положба.

Повторете ја вежбата десет пати.

Подигнување на нозете

Оваа вежба ја подобрува циркулацијата во нозете, го намалува отокот и го зголемува мускулниот тонус. Тоа е одлична вежба за луѓе кои поминуваат многу време седејќи. Помага и за подобрување на циркулацијата во нозете, ја намалува вкочанетоста и ја подобрува мускулната сила.

Како да ја направите вежбата:

Седнете исправено, со стапалата цврсто поставени на подот.

Полека подигнете ја едната нога нагоре додека не биде паралелна со подот.

Задржете ја ногата крената пет секунди, а потоа полека спуштете ја.

Повторете го истото со другата нога. Направете десет повторувања за секоја нога.

Колку време е потребно за овој краток тренинг?

Овие вежби можете да ги изведувате во секое време во текот на работниот ден, а целиот сет на вежби можете да го завршите за помалку од 10 минути. Се препорачува да ги правите неколку пати на ден, особено ако поминувате многу време пред компјутер или во една положба. Иако на прв поглед изгледаат едноставно, редовното изведување на овие вежби може значително да го подобри држењето на телото, да ја намали болката и да ја зголеми енергијата во текот на денот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.