Таравари посочува дека е во редовна комуникација со Мицкоски и оти ја исчекува најавената средба по завршувањето на службенотп патување на премиерот.
- Штом се врати ќе се видиме ќе разговараме, инаку имаме комуникација со него. Тоа што го кажал господинот Николоски, јас сите ги слушам, меѓутоа ние сме автономна партија, одлучуваме сами. Засега имаме сигурна одлука дека одиме со посебни советнички листи и тоа е одлука на партијата и од тоа нема враќање назад, за сето друго сме подготвени и отворени да разговараме со сите во однос на локалните избори. - Арбен Таравари – лидер на Алијанска за албанците
Изјавата на Таравари следи по вчерашните пораки на потпретседателот на ВМРО-ДПМНЕ Александар Николоски за 360 степени, каде неговата евентуална соработка со ДУИ ја оцени како политичко самоубиство.
- Јас можеби најмногу од сите што сме во постојнава влада сум го критикувал, но ако тоа го тргнеме настрана, факт е дека тој е политички искусен и не мислам дека е до толку, ај сега обратно да кажам – наивен, да влезе во соработка со ДУИ. Мислам дека малку и јавноста го потценува и не очекувам дека ќе направи чекор каде што политички би се самоубил. Би бил изненаден да покаже таква политичка наивност. - Александар Николоски – потпретседател на ВМРО-ДПМНЕ
Николоски изјави и дека партијата и понатаму ќе се држи до ветувањето дека ДУИ за време на нивниот мандат ќе остане во опозиција. Реакција денеска стигна од Мала Речица. Изјавите на Николоски ги оценија како омраза кон ДУИ и кон Албанците, кои како што велат, имале цел да создадат марионетска албанска структура под целосна контрола, мотивирана од геополитички, антиевропски и шовинистички цели.