Во рамките на делегацијата од ЕБОР, составена од директори надлежни за различни региони, беа присутни Рене ван Хел, директор за Холандија, Кина, Македонија, Ерменија и Монголија, потоа Фатих Туркменоглу, претставник на ЕБОР за земјава, како и директорите за другите земји од регионов и светот.

На средбата министерката Божиновска ги претстави активностите на Министерството за зајакнување на домашниот енергетски систем, енергетската инфраструктура и забрзување на реформските процеси во земјата. Во таа насока, беа презентирани конкретните законски решенија на кои во моментов работи Министерството, а кои се насочени кон остварување на стратешките цели на државата во енергетскиот сектор.

Претставниците на Европската банка за обнова и развој ги поздравија заложбите на Министерството за создавање на стабилен и предвидлив енергетски систем, оценувајќи ги како многу понапредни во однос на одредени земји од регионот, на коишто им е потребен подолг период за реализација на конкретни чекори во енергетиката.

Во фокусот на разговорите на денешната средба беше искористувањето на потенцијалот на обновливите извори на енергија во земјава, како и можностите за складирање на енергијата од обновливите извори.

Министерката Божиновска истакна дека постои огромен интерес кај граѓаните и компаниите за користење на енергијата од обновливите извори и дека Министерството ќе работи на овој план во иднина.

Посебен дел од разговорите се посвети и регионалното поврзување на земјава со соседите, за што министерката информираше за напредокот во однос на енергетското поврзување со Грција и Србија, потенцирајќи дека се работи и на нови мрежни поврзувања со земјите од регионот.

На средбата беше нагласено значењето и на сајбер безбедноста, како предуслов за безбеден енергетски систем, за што беше истакната можноста за взаемна соработка на ова поле.

Министерката Божиновска, на состанокот, ја потврди силна посветеност кон партнерството со ЕБОР, како еден од клучните партнери на нашата држава во напорите за создавање стабилна енергетска иднина за државата.

Министерството за енергетика, рударство и минерални суровини останува целосно посветено на партнерски пристап и целосна имплементација на реформските чекори за зголемување на енергетската сигурност што ќе придонесат за побрз развој на државата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Според планот што го претстави претседателот на АТП, Андреа Гауденци, вкупниот износ на средства наменет за играчите би требало да достигне околу 350 милиони долари годишно, без да се вклучи наградниот фонд од гренд слем турнирите.

Директните исплати од АТП кон играчите би требало да надминат 100 милиони долари, додека фондот за бонуси би се зголемил од сегашните 21,5 на 50 милиони долари.

Покрај тоа, дополнителни 25 милиони долари би биле наменети за играчите кои ќе ја завршат сезоната меѓу најдобрите 250 во светот, додека уште 30 милиони долари би се издвоиле за пензиски програми за околу 300 тенисери на годишно ниво.

„Тенисот денес е во многу силна позиција. Нашите турнири растат, навивачите го следат спортот на сè повеќе начини, а заработката на играчите е на рекордно ниво. За да остане силен, спортот мора да продолжи да се развива“, изјави Гауденци.

Една од најважните промени ќе се однесува и на АТП-рангирањето. Резултатите на најголемите турнири би требало да имаат поголема тежина отколку што имаат сега, при што АТП се стреми да ја намали потребата тенисерите да бркаат дополнителни поени на помали натпреварувања по лошите резултати на големите турнири.

Планот предвидува и воведување појасно дефинирани недели резервирани за одредени категории турнири, со цел тенисерите полесно да ја планираат сезоната и да најдат повеќе простор за одмор.

Во новата структура ќе биде вклучен и турнирот од серијата „Мастерс 1000“ во Саудиска Арабија.

Овие промени доаѓаат во време кога сè повеќе тенисери јавно се жалат на физичкиот напор што го носи сезоната долга речиси 11 месеци, како и на системот што ги поттикнува да играат на голем број турнири за да освојат поени и финансиски бонуси.

АТП, исто така, ќе ја разгледа долгорочната иднина на натпреварите во двојки, вклучително и можните промени во големината на ждрепките. Доколку тоа доведе до намалување на наградниот фонд за двојки, планот е тие средства да се пренасочат кон квалификациите и раните рунди во поединечна конкуренција. Гауденци смета дека целиот пакет ќе им овозможи на тенисерите подобро да го планираат својот календар, да заработуваат повеќе и да добијат поголема финансиска сигурност.

„Следната фаза претставува можност сезоната да стане позначајна, како за играчите, така и за навивачите, а истовремено да се поттикне развојот на спортот преку создавање повеќе можности во рамките на целата АТП-турнеја“, изјави првиот човек на АТП. Предлозите допрва треба да поминат низ дополнителни консултации и одобрувања, а АТП планира конечниот пакет да го претстави на завршните состаноци за сезоната, кои ќе се одржат во Торино.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Веста за неговата смрт ја потресе јавноста низ целиот Балкан. Македонската телевизија ја прекина редовната програма за да ја соопшти тажната вест.

На денешен ден, 16 октомври 2007 година, во сообраќајна несреќа во Хрватска загина еден од најомилените пејачи на Балканот македонскиот пејач со ангелски глас Тоше Проески.

Во моментот на смртта тој имаше само 26 години, а денешната годишнина одбележува 19 години од заминувањето на уметникот чии песни сè уште живеат меѓу публиката низ целиот регион.

Проески загина во близина на Нова Градишка, за време на патувањето од Скопје кон Загреб. Веста за неговата смрт ја потресе јавноста ширум Балканот.

Македонската телевизија ја прекина редовната програма за да ја соопшти тажната вест, а 17 октомври беше прогласен за Ден на жалост во Македонија.

Последното испраќање се одржа во неговото Крушево, каде што беше погребан со највисоки државни почести.

Десетици илјади луѓе дојдоа да му оддадат почит на пејачот, чија прерана смрт остави голема празнина на музичката сцена.На погребот присуствуваа многу познати уметници од целиот регион.

Во текот на својата кариера, тој издаде седум албуми и стекна бројни обожаватели ширум Балканот. Го доби прекарот „македонски славеј“ благодарение на својот величествен глас и посебната емоција што ја внесуваше во своите интерпретации. Неговите песни „Чија си“, „Игра без граници“ и „The Hardest Thing“ остануваат меѓу најпрепознатливите нумери што публиката ги слуша и денес.

Иако неговата кариера беше прекината во моментот кога тој беше на врвот на својата популарност, Тоше Проески остави неизбришлива трага во музиката.

Речиси две децении по неговата смрт, неговите песни сè уште нè потсетуваат на уметникот кој со својот глас, хуманост и едноставност ги освои срцата на публиката низ целиот регион.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.