Свет

Чешки европратеник ги обвинува словачките власти за „намерно следење“

Здечовски упати писмо до претседателката на Европскиот парламент, Роберта Мецола во кое изнесува обвинувања против властите на Словачка .

Чешкиот европратеник Томаш Здечовски упати писмо до претседателката на Европскиот парламент, Роберта Мецола во кое изнесува обвинувања против властите на Словачка за наводно следење и политичко заплашување за време на неодамнешната мисија на ЕП за утврдување фактите во земјата.

Здечовски, кој доаѓа од редовите на чешката Христијанско демократската унија (КДУ), во писмото наведува дека има „загрижувачки индикации“ оти членовите на официјалната делегација на ЕП, предводено од него, биле „намерно следени“ од словачките безбедносни служби за време на престојот во Словачка, каде имаа задача да го утврдат начинот на користење на средства исплатени на земјата од фондовите на ЕУ.

- Она што е особено алармантно е тоа што за време на вечерниот состанок со информаторите, вклучувајќи и поединци од словачките безбедносни служби, имавме силни причини да веруваме дека нашите активности беа намерно следени, пишува Здечовски во писмо.

Тој посочува дека овие сомнежи се поткрепени не само од „независни извори“, туку и од јавни изјави дадени од словачки владини претставници, меѓу кои и од министрите за внатрешни работи и за животна средина, Матуш Шутај Ешток и Томаш Тараба.

- Нивните забелешки носеа јасни политички призвуци и вршеа прекумерен притисок врз нашата делегација, која работеше строго во рамките на својот официјален мандат, вели чешкиот европратеник во писмото.

Здечовски натаму додава дека ваквите активности се неприфатливи и се во спротивност на принципите на соработка меѓу земјите членки и институциите на ЕУ.

Тој ја повика Мецола да „го поддржи интегритетот и независноста на нашите парламентарни мисии“, предупредувајќи дека таквото мешање е особено опасно „во време кога во делови од Унијата во пораст се авторитарните тенденции“.

Здечовски во писмото се осврнува и на изјавата на словачкиот премиер Роберт Фицо, кој го обвини дека дошол во Словачка за да работи „валкана опозициска работа како платен убиец“.

- Премиерот Роберт Фицо ме етикетираше како политички убиец, што го сметам за тежок личен напад и обид за делегитимирање на мисијата и нејзините наоди, посочува Здечовски во писмото. /МИА

Македонија

Лишен од слобода дилер во Скопје, пронајден кокаин, одредена мерка притвор

СВР Скопје поднесе кривична пријава против К.П.(30) од Скопје поради постоење основи на сомнение за сторено кривично дело „неовластено производство и пуштање во промет на наркотични дроги, психотропни супстанции и прекурсори“ по чл.215 од КЗ.

Имено, на 10.07.2025 во 22.10 часот, на подрачјето на општина Аеродром, полициски службеници од СВР Скопје го лишиле од слобода К.П.(30) од Скопје, затоа што при преглед кај него била пронајдена бела прашкаста материја, а по извршеното вештачење констатирано е дека станува збор за кокаин со нето маса 46,56 грама. Со К.П. бил извршен службен разговор, а од страна на судија на претходна постапка одредена му е мерка притвор во траење од 30 дена.

Тагови: мвр

Македонија

Петрушевски: СДС со невидена леснотија се радува на секоја катастрофа во државата

СДС со невидена леснотија се радува на секоја катастрофа во државата, надевајќи се дека ќе добие некој ситен политички поен, ако Македонија минува низ предизвици.

Пожарите кои гореа низ државата, а за кои веќе се докажува дека не се чиста природна непогода, туку човечки подметнати, од лица блиски до опозицијата, беа главна тема на политичкиот наратив на СДС.

На повеќе места низ државата на местата на пожарите меѓу другото најдени се и дрва потопени во бензин, гума, ракавици.

Истрагата на институциите дојде и до лица блиски до опозицијата, кои се веќе и во притвор.

Секој може многу јасно да види дека државата не гори само од природни непогоди, туку и од човечки фактор.

И додека некој подметнуваше пожари, а некој ликуваше преку политички соопштенија, институциите го дадоа својот максимум и навремено локализираа и изгаснаа десетици пожари низ државата.

Повикуваме на одговорен пристап на СДС, тие беа власт до пред само 1 година, а на државата и оставија расипани авиони без пилоти, стари возила и недоволна опрема.

Една година потоа, државата има функционални авиони, пилоти, и приспособени воени и полициски возила за гаснење на пожари.

Народот ја гледа разликата.

Бране Петрушевски, пратеник на ВМРО-ДПМНЕ

Тагови: Бране Петрушевски

Свет

Синот на нарко-босот Ел Чапо се изјасни за виновен пред американски суд во замена за полесна казна

Еден од синовите на мексиканскиот нарко-бос Хоакин „Ел Чапо“ Гузман, коосновач на картелот Синалоа, Овидио Гузман Лопез, се изјасни за виновен пред американски суд како дел од спогодбата за признавање на вина што обезбедува полесна затворска казна.

Познат по прекарот „Ел Ратон“ (глувчето), 35-годишниот Овидио е единствениот од четирите синови на водачот на картелот кој постигна спогодба со американското судство и ја призна вината.

Ел Чапо, отслужува доживотна казна затвор во САД, изречена во 2019 година.

Американскиот обвинител Џеј Клејтон изјави вчера на суд во Менхетен дека ова е „важен чекор во повикувањето на одговорност на картелот Синалоа и неговите водачи за нивната улога во епидемијата на фентанил, дрога што одзеде многу американски животи“.

Судот во Њујорк на 1 јули ги отфрли обвиненијата за трговија со дрога против Овидио Гузман како дел од спогодбата за признавање на вината, избегнувајќи судење и обезбедувајќи, според аналитичарите, полесна казна од казната на неговиот татко. Датумот на изрекување на пресудата сè уште не е закажан.

Како дел од спогодбата, Овидио Гузман се изјасни за виновен за заговор поврзан со трговија со дрога и учество во криминално здружение, објави Министерството за правда на САД. Тој, исто така, призна дека тој и неговите тројца браќа ја презеле улогата на нивниот татко во рамките на картелот.

Овидио беше уапсен во јануари 2023 година во операција во Кулијакан во северозападно Мексико, во која беа убиени најмалку 29 лица. Девет месеци подоцна, тој беше екстрадиран во САД.

Тагови: Ел Чапо