Македонија

ЦГК: Општините потрошиле 770 илјади евра за прскање против комарци

За прскање против комарци, општините годинава платиле 770 илјади евра.

Тендери за справување со комарците имале 39 општини и еден плански регион со 9 општини. Ова, како што посочуваат од Центарот за граѓански комуникации, повикувајќи се на анализата направена врз податоците на сите договори за јавна набавка за комарци, значи дека вкупно 48 општини годинава презеле мерки за уништување на комарците.

Според анализата на ЦГК, 35 општини имале тендери за т.н. терестичко прскање, односно прскање од земја, а шест општини имале тендери за т.н. авионско третирање. Седум општини имале и земјено и воздушно прскање.

Најголем договор за уништување на комарците, како што се вели во анализата, има Град Скопје, кој лани за двегодишен третман против комарци од воздух и од земја, платил половина милион евра.

Во анализата наведено е дека од другите општини, повеќе пари за уништување на комарците платиле оние кои најмиле услуга за авионско прскање и тоа Велес, Кавадарци, Кочани, Куманово и Штип.

Од вкупно 13 договори за јавна набавка за авионско прскање, 11 тендери добила кумановската фирма Бониер, додека останатите два, меѓу нив и највредниот, скопскиот, ги добил Аероклубот Скопје.

Кај договорите за уништување на комарците од земја, предничи кавадаречката фирма Лиса-Ком МС, со склучени 9 договори. Следен е Центарот за јавно здравје Скопје со 7 договори.

- Цените што ги плаќаат општините за оваа услуга се многу различни и зависат од тоа дали прскањето е авионско или до земја, од опфатената површина, но и од бројот на третмани бидејќи многу општини предвидуваат по неколку третирања во текот на годината. Сето ова ја отежнува и споредбата на цените. Како и да е, најевтино за еден хектар прскање плаќа Град Скопје, само по 11 денари за хектар прскање од земја, велат од Центарот за граѓански комуникации.

Авионските прскања чинат од 216 денари за хектар колку што плаќа Град Скопје, до 2.230 денари за хектар колку што платила Карбинци.

- Кога станува збор за средството со кое се прска против комарци и ларви од комарци, општините не се многу прецизни во описот. Само две општини нагласуваат дека средството мора да биде еколошко, а други две општини наведуваат и какво средство или негов еквивалент би сакале. Како и да е, сите општини наведуваат дека средството мора да има решение за промет и да биде одобрено од Министерството за здравство, наведуваат од ЦГК.

Формула

Хамилтон во базата на Ферари: Многу сум среќен што денес го исполнувам мојот сон

Седумкратниот светски шампион во Формула 1, Луис Хамилтон денеска ја објави својата прва фотографија од базата на Ферари во Маранело.

Британецот е во костум, пред легендарниот модел на Скудерија Ф40 и пред зградата до патеката „Фиорано“, која Енцо Ферари ја користеше како резиденција при тестирањето таму.

-Има денови што знаете дека ќе ги паметите засекогаш и денес, мојот прв ден како возач на Ферари, е еден од тие денови. Имав среќа да постигнам работи во кариерата за кои мислев дека се невозможни, но дел од мене отсекогаш сакал да се натпреварува во црвено. Многу сум среќен што денес го исполнувам овој мој сон. Денес започнуваме нова ера во историјата на овој култен тим и едвај чекам да видам каква приказна ќе напишеме заедно, сподели Хамилтон на Инстаграм.

Утрото Хамилтон се сретна со тимот со кој ќе работи, а за денеска е закажана и работа во симулатор, а тестот на Фиорано со болидот Ф1-75 најверојатно ќе биде во среда.

Македонија

Поскапуваат горивата

Горивата од полноќ поскапуваат од пола до денар и пол. Дизелот и Екстра лесното масло за домаќинство поскапуваат за пола денар, а Еуросупер БС-95 и Еуросупер БС-98 за денар и пол.

Според денешната одлука на Регулаторната комисија, од полноќ се зголемува и цената на мазутот за 0,337 денари за литар.

Од полноќ, Еуросупер БС-95 ќе се продава по цена од 81 денар за литар, а Еуросупер БС-98 по цена од 83 денари за литар. Новата цена на дизелот ќе биде 76 денари за литар, а на Екстра лесното масло за домаќинство 75,5 денари за литар.

Регион

Пролонгирана исплатата на европски пари за Хрватска

Владата на Хрватска побара одложување на исплатата на 835,6 милиони евра од Механизмот за заздравување и отпорност, бидејќи сè уште не е донесена законската рамка која треба да ја редефинира и подобри работата на државните компании.

Хрватската Влада упати барање за исплата на 20 декември, но по барањето за одложување средствата ќе бидат исплатени во март.

Шестата транша според Механизмот требаше да изнесува 835,6 милиони евра и да послужи за исполнување на 26-те фази и реформски цели предвидени во Националниот план за закрепнување и отпорност. Хрватска досега повлече речиси 63 отсто од средствата од грантот, а вкупната сума се планира да биде 10 милијарди евра. Ова финансирање трае до 2026 година.

Нема причина за загриженост. И други земји-членки, исто така, претходно побараа одложувања. Владата има доволно време да ја усвои законската рамка во грејс периодот. Нацрт-правната рамка е на консултација со јавноста и очекуваме да биде усвоена до март, изјавија претставници на Европската комисија