Македонија

ЦГК: Детектирани ризици од корупција во тендерите на државните и на општинските претпријатија

Слабостите констатирани во анализата ја потврдија потребата од засилување на интегритетот и намалување на ризиците од корупција во јавните претпријатија и акционерските друштва, велат од ЦГК.

Центарот за граѓански комуникации (ЦГК) детектира ризици од корупција во тендерите на државните и на општинските претпријатија во истажувањето „Мапирање на ризиците од корупција во јавните набавки на претпријатијата во сопственост на Владата и на општините" што денеска го објави на линкот https://www.opendata.mk/Home/TekstualniDetails/103?Category=2.

Ризиците од корупција, како што порачуваат од ЦГК, се мапирани врз основа на длабочински мониторинг на тендерите на 37 акционерски друштва и претпријатија основани од Владата, Градот Скопје и општините Кавадарци, Гостивар и Струга. Во 2019 година, овие претпријатија склучиле договори за јавни набавки во вредност од 247 милиони евра, што е 27 отсто од вкупните јавни набавки на земјата.

-Слабостите констатирани во анализата ја потврдија потребата од засилување на интегритетот и намалување на ризиците од корупција во јавните претпријатија и акционерските друштва, велат од ЦГК.

Прецизираат дека се констатирани ризици од корупција кои се манифестираат преку чести и значајни измени на плановите за јавни набавки, како и преку ниската реализација на плановите.

-Кај 16 од 37 претпријатија, реализацијата на плановите за јавни набавки е пониска од 50 отсто. Највиско ниво на реализација на планот имало АД МИА со 96 отсто, а најниско АД Водостопанство од само еден отсто, е еден од клучните наоди во анализата на ЦГК.

Покрај тоа, констатирано е дека концентрацијата на една фирма во јавните набавки на одредена институција, како еден од најрелевантните индикатори за постоење на ризик од корупција, е проблем којшто е евидентиран кај голем дел од анализираните претпријатија и акционерски друштва.

-Кај речиси една третина од нив, концентрацијата на набавките кај една фирма е поголема од 40 отсто. Според вредноста на договорите најголем удел на една фирма има кај АД Електрани, а според процентуално учество во АД Водостопанство, велат од ЦГК.

Според нив, третина од таргетираните претпријатија ја применувале нетранспарентната постапка со преговарање без објавување оглас. Високи удели на овие набавки во вкупната вредност на набавките се евидентирани кај Службен весник, со 28 отсто и кај Градски паркинг Скопје, со 22 отсто.

-Кај дури 20 од 37 таргетирани претпријатија уделот на поништени постапки е повисок од 20 проценти. Честите поништувања на тендерите претставуваат индикатор за постоење ризик од корупција. Најголеми поништувања на тендерите имале МЖ Транспорт, Национални шуми и ЈСП Скопје, покажуваат резултатите од анализата на ЦГК.

Големи разлики се констатирани во цените на набавките на ист вид производи и услуги и тоа од 24 до 120 проценти.

-Еден мегаватчас елктричната енергија е купуван по цени од 4.738 до 5.888 денари. Еден топ хартија за печатење ( бела боја, 80 грама и А4 формат) е купуван од 158 до 349 денари. Претпријатијата им плаќаат на агенциите за обезбедување, за едно лице за физичко обезбедување на месечно ниво 24.255 до 36.875 денари. За привремени вработувања се користени услуги од специјализираните агенции на кои им се плаќала провизија од 0,01 до 8,90 отсто од бруто примањата на работниците. Нафтените деривати, пак, се купувани по највисоките малопродажни цени,велат од ЦГК.

Истражувањето „Мапирање на ризиците од корупција во јавните набавки на претпријатијата во сопственост на Владата и на општините" е изработено во рамките на проектот „Кон отчетни јавни претпријатија" со финансиска помош од Амбасадата на Kралството Холандија во Скопје, имплементиран од Центарот за граѓански комуникации, во периодот од 1 октомври 2019 година до 30 септември 2021 година.

Култура

Љутков: Гевгелија е Град на културата за 2025 година

Гевгелија е Град на културата за 2025 година, соопшти министерот за култура и туризам, Зоран Љутков, кој денеска заедно со државниот секретар, Марија Ѓоргова, ги посети институциите од областа на културата во овој град.

Министерот Љутков потсети дека Гевгелија вторпат, по 2011 година, е носител на оваа манифестација, а тоа ја потврдува посветеноста на градот повторно да биде во центарот на културните настани во Македонија.

„Ова признание не е само чест, туку и обврска. Тоа е потврда дека Гевгелија, со својата богатa културна традиција, повторно ќе биде во центарот на културните настани во Македонија. Министерството за култура и туризам стои зад вас и ја поддржува оваа манифестација со 3 милиони денари, со цел да создадеме програма со повеќе од 140 настани во текот на целата година, програма што ќе го освежи културниот живот во овој град“, рече министерот Љутков.

Љутков ја посети и Старата чаршија во Гевгелија, за чија комплетна реставрација, од буџетот на Владата се издвоени 40.675.095,00 денари, со што Гевгелија ќе добие нова визуелна и функционална димензија.

„Овие проекти ќе ја подобрат инфраструктурата и ќе создадат простор за културни настани и уметнички проекти, со што ќе се негува традицијата и ќе се поттикнат нови културни трендови“, рече Љутков.

Според министерот Љутков, Гевгелија, со својата локација и природни убавини, привлекува многубројни туристи, а сега, како што рече, со статусот Град на културата, ќе понуди нови искуства и можности за уживање.

Во рамките на посетата на Гевгелија, министерот Љутков, заедно со своите домаќини, ги посети НУ Музеј – Гевгелија и црквата „Свети Атанасиј“ во село Габрово, соопштуваат од Министерството.

Шоу биз

Бен Афлек е 20 години вљубен во Џесика Алба, сега има можност за врска (ФОТО)

По неодамнешниот развод со Џенифер Лопез, Бен Афлек наводно се насочил кон познатата актерка Џесика Алба, која исто така неодамна се разведе по 17 години брак.

Извори за странските медиуми изјавија дека актерот долго време бил вљубен во Алба. „Добро чувана тајна е дека Бен Афлек имал љубов со Џесика Алба пред многу години“, рекле тие и додале: „Тој се интересира за неа речиси 20 години. Сепак, нивните патишта никогаш не се вкрстиле. До сега. Тие имаат силна врска и секогаш кога поминувале време заедно во минатото, хемијата меѓу нив се разбранувала“.

„Бидејќи и двајцата сега се сингл и нивните деца се пораснати, изгледа дека е совршено време нивната врска да процвета“, заклучил изворот.

Раскинувањето на Бен Афлек и Џенифер Лопез се случи пред повеќе од шест месеци, а оттогаш Афлек се поврзува и со Кик Кенеди, ќерката на Роберт Кенеди Јуниор, но таа гласина набрзо беше демантирана.

Исто така, во средината на јануари, Џесика Алба го потврди разводот од Кеш Ворен по речиси 17 години брак. Една недела откако се појавија извештаите за нивната разделба и можен развод, актерката ја потврди веста на социјалните мрежи. „Со години сум на патување на себеоткривање и трансформација – и како поединец и во партнерство со Кеш“, ја започна својата објава на Инстаграм.

„Горда сум на начинот на кој растевме во нашиот брак во изминатите 20 години, но сега е време да започнеме ново поглавје на раст и развој како поединци. Одиме напред со љубов, добрина и почит еден кон друг и засекогаш ќе останеме семејство. Нашите деца остануваат наш најголем приоритет и бараме приватност во овој момент“, порача таа.

Регион

Прогласена е вонредна состојба на Санторини, Грција донесе драстични мерки на сила до 1 март

На грчкиот остров Санторини е прогласена вонредна состојба по серијата силни земјотреси кои со денови го потресуваат островот, принудувајќи илјадници луѓе да се евакуираат.

Најсилниот земјотрес, со јачина од 5,2 степени според Рихтеровата скала, го погоди островот вчера вечерта, а се случи на длабочина од пет километри, по напливот на сеизмичката активност.

Илјадници луѓе го напуштија Санторини и околните острови во Егејското Море поради страв дека допрва треба да дојде уште еден – многу поинтензивен земјотрес, кој може да доведе до цунами или дури и вулканска ерупција.

Грчките власти претходно денеска најавија драстични мерки кои ќе важат до 1 март, објави Real.gr.

„Со одлука на Генералниот секретаријат за цивилна заштита, општина Тира прогласува вонредна состојба, со цел да се одговори на вонредните потреби и да се справат со последиците од сеизмичката активност што неодамна се случи во споменатото подрачје. Оваа одредба ќе важи до 1 март“, се наведува во соопштението.

Забележано е дека премиерот Киријакос Мицотакис утре ќе отпатува за Санторини за да ги информира одговорните за сеизмичката активност што го потресе островот. Премиерот ќе биде придружуван од министерот за климатски кризи и цивилна заштита, Василис Кикилијас.

Стотици туристи и жители го напуштија островот со траект, додека многу други побрзаа да одлетаат пред нов земјотрес да го погоди островот.

Брод на крајбрежната стража и воен десантен брод се распоредени во случај да биде потребна евакуација, потврди министерот за цивилна заштита Василис Кикилијас на вонредниот состанок со безбедносните службеници, научниците и премиерот во Атина.

Неколку помали земјотреси, со јачина од 2,4 до 4,5 степени според Рихтеровата скала, беа почувствувани и на Додеканезите, на околу 240 милји од Санторини, во последните 24 часа.

Засега не е забележана поголема штета на островот, но властите преземаат мерки на претпазливост.

На луѓето им се советува да избегнуваат големи собири во затворени простории, мали пристаништа и области каде што може да се случат одрони.

На хотелите им е кажано да ги испразнат своите базени за да се намалат потенцијалните штети на зградите.

Исто така, постојат стравувања дека посилен земјотрес може да предизвика цунами, па властите ги предупредија луѓето да се држат подалеку од крајбрежните области.

Мерки на претпазливост се преземени и на неколку блиски острови во Егејското Море, кои сите се популарни дестинации за одмор, откако во изминатите три дена беа регистрирани повеќе од 200 подводни земјотреси.

притисни ентер