Најмалку едно лице загинало во пожарот во преполнетиот мигрантски камп Моира на островот Лезбос.
Локалните власти соопштија дека пронашле тело на изгорена жена во кампот Моира, но според непотврдени извештаи, има уште една жртва и станува збор за дете. Девет лица биле повредени.
Полицијата подоцна испукала солзавец кон мигрантите кои протестирале, тврдејќи дека пожарникарите биле премногу бавни и не реагирале на пожарот.
Во насилните протести мигрантите се судрија со полицијата. Првиот пожар избувнал околу 4:45 часот ноќеска по полноќ на околу 400 метри од бегалскиот центар, соопшти полицијата.
Ова се случи во маслинарник, каде група мигранти биле принудени да кампуваат, бидејќи немало простор за нив во главниот објект.
По гаснењето на пожарот, избувнал друг, само 20 минути подоцна. Пожарот избувнал во централниот дел на бегалскиот камп во контејнерските куќи во кои живееле мигрантите. Во исто време со пожарот, започнале немирите во кои мигрантите ги нападнале пожарникарите и уништиле најмалку две противпожарни возила и ги урнале административните згради на кампот.
Пожарникарите потоа избегале од местото на пожарот, како и од кампот. Полицијата пристигнала за да употреби солзавец против насилните мигранти. Отпрвин, бидејќи немало доволно полицајци за да ги смират немирите, биле испратени дополнителни полициски единици.
Сè уште не е познато кој ги предизвикал овие пожари, но локалните медиуми објавија дека некои мигранти наводно палеле ѓубре. Бунтот, наводно , избувнал поради лошите услови за живот во кампот.