Гарванлиев вели дека видеото е снимено во Даут пашиниот амам во Скопје, и уверува дека се работи за случајност. „Во спотот е претставена актуелната поставка на ликовната галерија и никој инволвиран во реализацијата на спотот не правел интервенција врз нив. Бугарското знаме е хоризонтално, а ова нема врска со Бугарија, истите бои ги имаат и други знамиња на европските земји, а јас лично не препознавам знаме во уметничкото дело.“ вели Гарванлиев за Канал 5 и додава дека немал никаква намера да предизвика било какви реакции.
Од Даут пашиниот амам пак каде е снимен спотот, велат дека се работи за уметничко дело е поставено уште во далечната 1995 година, а на него се оддава почит кон руски сликар од 15 век.
- Ова е делото кое ја разбранува јавноста, се работи за омаж на рускиот сликар Андреј Рубљов, а изработено од уметничката Жанета Вангели. Боите, сепак за разлика од спотот на Гарванлиев, денеска беа различно поставени.- Даут пашин амам.
Од уметничката галерија велат дека бидејќи се работи за триптих, односно дело кое е составено од три дела, боите од време на време ја менуваат положбата. Но, немаат одговор зошто токму за спотот на Гарванлиев, истите тие бои биле променети да наликуваат на бугарското.
Спотот кој доаѓа во сензитивен период за односите меѓу Македонија и Бугарија, предизвика бурни реакции и кај нашиот источен сосед. Дел од бугарските медиуми, пак спотот го нарекоа скандалозен, особени бидејќи според нив, пејачот кој ќе ја претставува Македонија, во видеото го нема македонското, но затоа ги има боите на бугарското знаме.