Бугарското Собрание денеска едногласно, со 194 гласа ЗА, изгласа нова Резолуција поднесена од партијата „Има таков народ “ на Слави Трифонов и група пратеници, во која како што се вели, се потврдува дека Бугарија стои зад европскиот консензус од 2022 година и се повикуваат македонските власти да ги спроведуваат Заклучоците на Европскиот Совет, Преговарачката рамка и Протоколите.

Во документот се нагласува дека се неприфатливи какви било обиди во рамките на европските институции за повторно преговарање, заобиколување или игнорирање на елементи од веќе постигнатите договори, а внесувањето на Бугарите во македонскиот Устав е само една од обврските..

-Разговарав со Антонио Кошта, со многу колеги, со Манфред Вебер, и со колегите од Европската народна партија. Имаме Договор за добрососедство, таканаречен француски предлог, и инсистираме сите да се придржуваат до договорот и какви било провокации што се прават не се во ничиј интерес. Оваа декларација уште еднаш потсети дека фундаменталниот документ за модерната историја е Договорот за добрососедство, изјави Борисов.

-И дури критиките дека Каја Калас внесувала некакви различни идеи во ЕП, а самата Каја Калас гласаше за францускиот предлог кога јас бев премиер, таа седеше до мене. Така што таа позиција ни е силна, никакви отстапки и на крај целиот бугарски парламент разбра за што станува збор, изјави Петков.

Единството во бугарскиот парламент за декларацијата за Македонија го пофали и бугарскиот шеф на дипломатијата Георг Георгиев, кој повтори дека нема план Б за деблокада на евроинтеграциите на Македонија.

-Бугарија ќе продолжи да го почитува договорот од 2022 година. Нема да отстапиме ниту сантиметар од него. Нема да повторуваме дека исполнувањето на европските барања е тоа што е неопходно за да се постигне напредок. Нема варијанта Б, нема план Б. Планот е еден. Промена на Уставот, исполнување на критериумите, за да може процесот да се движи, изјави Георгиев.

Во пресрет на гласањето за извештајот европратеникот Вајц, во изјава за „360 степени“ потврди дека во нацрт-документот има неколку референци за признавање на македонскиот јазик и македонскиот идентитет, како одговор на негирањето од бугарските и претходно од грчките соседи.. И покрај жестоките напади од бугарска страна за кои сведочи, сепак тој извештајот да биде изгласан со големо мнозинство во ЕП.

-Во нацрт-документот, таков како што е сега, има неколку референци за признавање на македонскиот јазик и македонскиот идентитет. Лично ми е жал што ова е потребно, бидејќи нема сомнеж дека Македонците се Македонци и дека македонскиот јазик е македонски јазик. Лично, не би гледал потреба тоа да се каже. Не можам да негирам дека бугарските членови на ЕП се незадоволни со текстот. Тие јавно тоа го изразуваат во бугарските медиуми. Одат дотаму што дури и сум лично нападнат дека сум пристрасен. Има дури и случаи каде што се тврди дека сум корупмиран од С. Македонија, што целосно ги отфрлам, изјави Вајц.

Во пресрет на гласањето, се мобилизираше и македонската дипломатија, а премиерот Мицкоски пред два дена ги повика сите политички чинители да се обединат и да застанат во одбрана на македонските национални интереси и најави дека ќе се прави стратегија и преку директни средби со европратеници да се одбрани нацрт текстот на резолуцијата.