Албанскиот државјанин Емилијано Кроси (24) кој, меѓу повеќето кражби, ја ограбил и резиденцијата на Рахим Стерлинг, принудувајќи го да се врати дома од Светското првенство во 2022 година, е осуден на 13 години затвор, објавија албанските медиуми.
Кроси (24) наречен „албански „јастреб“ извршил многу кражби, вклучително и онаа во резиденцијата на англиската ѕвезда, на 3 декември 2022 година.
Тој користел скала во задната градина за да се качи до прозорецот од спалната соба на Стерлинг и украл десет од неговите часовници Ролекс. Од домот на фудбалерот бил украден и накит, вреден околу 300.000 фунти.
-Кроси, кој илегално влегол на британска територија, скриен во камион, претходно признал дека е вклучен во 15 кражби. Но, пред судот во Гилфорд, судијката Кетрин Хартли пресуди дека тој е вмешан во 18 кражби, осудувајќи го на 12 години и 10 месеци затвор. Британската полиција сè уште трага по неговиот татко Алфред Исуфи (48), вујко му Анри Осман (44) и 22-годишниот братучед Џерард Калаја, за кои се верува дека побегнале од Велика Британија, наведуваат медиумите.
Постојат основи на сомнение дека биле дел од криминалната група која вршела кражби во луксузни вили помеѓу ноември 2022 и март 2023 година. Меѓу другите жртви се и поранешниот играч на „Кристал Палас“, Скот Дан и на „Челзи“, Марк Кукурела.