Европа

Британија и Франција на удар на топлотен бран- рекордните температури достигнуваат и над 40 степени

Велика Британија и Франција се соочуваат со интензивен топлотен бран што може да донесе рекордни температури, „тропски ноќи“ и здравствени ризици на почетокот на следната недела, предупредија метеоролошките служби на двете земји.

Метеоролошката служба на Велика Британија издаде жолто предупредување за екстремна топлина за понеделник и вторник за поголемиот дел од југоисточна Англија, вклучително и Норфолк, како и делови од Јужен Велс, објави Скај њуз.

Температурите во јужна Англија би можеле да достигнат околу 30 степени Целзиусови во недела, додека се предвидуваат понатамошни топлотни бранови за почетокот на следната недела, со максимални температури до 34 степени.

Метеоролозите велат дека постои 40 проценти шанса да се сруши јунскиот температурен рекорд од 35,6 степени Целзиусови, поставен во 1957 и 1976 година.

Високи температури се очекуваат и во други делови од земјата, вклучувајќи го Манчестер со 29 степени, Њукасл со 27, Глазгов со 25 и Белфаст со 24 степени Целзиусови.

Особено загрижувачка е високата влажност, која ќе биде повисока отколку за време на претходниот топлотен бран.

Во некои области се очекуваат таканаречени „тропски ноќи“, кога температурата во текот на ноќта не паѓа под 20 степени Целзиусови.

Британската агенција за безбедност на здравјето повика на посебна претпазливост кога станува збор за постарите лица и граѓаните со хронични здравствени проблеми.

Франција се соочува со уште поизразен топлотен бран, објави BFM.

Портокалово предупредување за топлотен бран е на сила денес во 60 департмани, или речиси две третини од земјата.

Се очекува максималните температури да бидат помеѓу 35 и 38 степени Целзиусови, додека ноќните температури ќе останат над 20 степени во многу области.

Француската метеоролошка агенција Метео-Франс предупреди дека сегашниот топлотен бран може да биде сличен по времетраење и интензитет на оние од јули 2019 и август 2003 година.

Експертите велат дека предупредувањето може дополнително да се заостри во наредните денови, при што некои региони ќе се движат кон највисокото, црвено ниво на тревога.

Францускиот министер за внатрешни работи Лоран Нуњез предупреди дека дневните температури би можеле да достигнат 40 степени Целзиусови, додека во некои области ноќните температури би можеле да останат околу 30 степени.

Поради ситуацијата, францускиот премиер Себастијан Ле Корнеј свика меѓуресорски кризен состанок во Министерството за внатрешни работи, на кој присуствуваат 14 министри.

Целта на состанокот е да се координираат владините служби за да се одговори на последиците од екстремната топлина.

Метеоролозите во Франција, исто така, предупредуваат дека високите температури во северната половина од земјата би можеле да доведат до локално силни грмотевици.

Британските служби за безбедност и спасување ги повторија предупредувањата до граѓаните да бидат внимателни при влегување во морето, езерата и реките.

Иако надворешните температури се многу високи, температурата на водата останува значително пониска, што може да предизвика студен шок, паника и отежнато дишење, велат експертите.

Според британските власти, за време на претходниот топлотен бран во мај, кога беше забележан нов рекорд за месецот од 35,1 степени Целзиусови, најмалку 15 лица го загубија животот, вклучувајќи девет деца.

Тагови: топлотен бран Франција

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Метео

Утре наутро ведро и студено

Утрото ќе биде ведро и студено.

Во текот на денот сончево со мала до умерена облачност. Ќе дува слаб до умерен ветер од северен правец. Минималната температура ќе биде во интервал од -2 до 7, а максималната ќе достигне од 19 до 27 степени.

Во Скопје, променливо облачно со сончеви периоди. Ќе дува слаб до умерен ветер од променлив правец. Минималната температура ќе се спушти до 3, а максималната ќе достигне до 26 степени.

За време на викендот времето ќе биде сончево. Од понеделник ќе биде сончево со променлива облачност во текот на денот. Утрата ќе бидат ведри и студени со ниски температури кои наместа ќе се спуштат под нула степени.

Тагови: УХМР

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Средба на Сиљановска-Давкова со Урсула фон дер Лaјен, претседателка на Европската Комисија

Претседателката Гордана Сиљановска-Давкова денеска се сретна со претседателката на Европската Комисија, Урсула фон дер Лaјен, која е во посета на земјава.

Најпрво, Гордана Сиљановска-Давкова изрази благодарност за растечкиот интерес и посветеност на Европската унија на регионот, потенцирајќи го индивидуалниот придонес на Урсула фон дер Лајен во забрзувањето на регионалните евроинтеграциски процеси.

Според претседателката, иако нашата држава не е формално меѓу западнобалканските држави со најголем напредок, таа, низ призма на двата најважни елементи: техничката подготвеност и геополитичката усогласеност со европската надворешна и безбедносна политика, заслужува да биде со нив, наместо на споредната патека.

Причината за македонското отсуство од друштвото на најуспешните, за неа е во давањето примат на наметнатиот билатерален спор пред копенхашките критериуми?!

Претседателката изрази цврсто уверување дека гарантирањето исти можности за нас како оние за Украина и Молдавија, со сигурност ќе ја зајакне нашата институционална подготвеност и ќе ја обнови нашата доверба и мотивација за европеизација, што ќе го забрза реформскиот курс.

Исто така, Сиљановска-Давкова потсети на потребата да се одржи политичка Меѓувладина конференција, согласно новата методологија и Преговарачка рамка, како и регуларен состанок на Советот за стабилизација и асоцијација, потенцирајќи ја важноста на практикувањето витален интеграциски процес, што ќе резултира со видливи резултати за македонските граѓани.

Претседателката на Европската Комисија истакна дека нашето место е во Унијата, којашто ќе продолжи сестрано да нѐ поддржува на реформскиот, евроинтеграциски пат, оценувајќи ги досегашните реформи како импресивни.

Фон дер Лајен, укажувајќи на неопходноста од деблокада на нашето напредување кон ЕУ, во духот на европските вредности, изрази уверување дека македонско-бугарскиот спор може да се надмине преку интензивни и сестрани средби и дијалог, коишто треба да почнат час поскоро.

Тагови: Гордана Сиљановска-Давкова Урсула фон дер Лајен

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Автомобилизам

Големо изненадување меѓу кандидатите за „Светски автомобил на годината“: Кина доминира

„Светски автомобил на годината“ за 2027 година: Кинеските производители имаат дури 27 модели на листата.

Организаторите на наградите „Светски автомобил на годината“ ги објавија 56-те кандидати кои се натпреваруваат за престижните награди за 2027 година. Речиси половина – поточно 27 модели – доаѓаат од Кина.

За да се квалификува за главната награда „Светски автомобил на годината 2027“, автомобилот мора да се произведува во обем од најмалку 10.000 примероци годишно и да се продава на најмалку два големи светски пазари на најмалку два континента.

Меѓу кандидатите за главната награда се: BMW i3, BYD Ti7, Chery Q, Cupra Raval, Deepal S07, Exeed RX, GAC Aion V, Geely Starray EM-I, Hyundai Ioniq 3, Jetour T2, Kia Telluride, Leapmotor T03, Lynk & Co 900, Mazda CX-5, MG4 EV Urban, Onvo L90, Subaru Trailseeker, Volvo EX60 и Zeekr 8X.

Погледнете ја целосната листа:

Објавени се и кандидатите за категориите „Светски градски автомобил“, „Светски луксузен автомобил“ и „Светски автомобил со високи перформанси“, додека листите за „Светски електричен автомобил“ и „Светски дизајн на автомобил“ ќе бидат објавени подоцна.

Кандидати за „Светски градски автомобил“ се, меѓу другите: Chery Q, Cupra Raval, Geely EX2, Hyundai Ioniq 3, Kia EV2 и Leapmotor T03.

Категоријата за луксузен автомобил ги вклучува: Audi Q7, Avatr 07, BMW X5, Genesis GV80 Hybrid, Jaguar Type 01, Polestar 5, Range Rover GT, Xpeng X9 и Zeekr 9X.

За наградата за најдобар спортски автомобил ќе се натпреваруваат Chevrolet Corvette ZR1 и ZR1X, Genesis GV60 Magma, Kia EV4 GT, Lotus Eletre X, Lynk & Co 02, Zeekr 7GT и Porsche Cayenne Turbo Electric.

Победниците во сите категории ќе бидат објавени на 24 март 2027 година.

Извор: Б92

Тагови: автомобил на годината

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.