Македонија

Bratot Apparel: Од “маалски” жаргон до современ урбан код

Streetwear како јазик на припадност, уметност како став - бренд што не следи трендови, туку гради заедница во која облеката престанува да биде форма и станува порака.

Постојат брендови што се носат и постојат оние што се живеат. Bratot Apparel припаѓа на вторите — таму каде што маалото станува симбол, а облеката начин на изразување, не украc.

Роден во Скопје, обликуван од улицата и воден од автентичност, Bratot е повеќе од облека — тој е став, тој е урбан код, тој е пулс на улиците од овој град.

Кико и Борче се гласот на улицата, пулсот на маалото и ставот што не се крие. Во разговор со нив, секој збор е отпечаток, секоја реченица носи енергија што се чувствува, не се објаснува.

„Bratot“ не звучи само како бренд – звучи како култура, vibe, движење. Како се роди ова име?

Името „Bratot“ се роди спонтано, од секојдневниот уличен говор. Зборот Братот во наше друштво е начин на обраќање, знак на почит, блискост и разбирање. Сакавме име што веднаш носи емоција, што не се објаснува, туку се чувствува. “Bratot” е наше, маалско, автентично...односно беше, повеќе не е само наше :D

Самото име ви носи енергија на блискост и урбана култура. Дали сакате луѓето да го доживеат токму така како „братство“ – припадност на група или пак повеќе е како ваш личен печат?

И двете. “Bratot” е личен печат, но и отворена заедница. “Bratot” е мајндсет, многу луѓе се веќе дел од приказната, на што сме навистина горди.

Почетоците знаат да бидат хаотични. Што беше најголемиот предизвик за вас и која беше првата идеја?

Најголем предизвик беше да останеме верни на визијата, без да правиме компромиси. Да смислиме производ, кој ќе биде дел од секојдневниот живот, односно тренд. Производ со кој што ќе изградиме заедница, автентичност, или во кратки црти свое јас.

Дали во старт бевте свесни дека ќе создадете движење, нешто поголемо и од самиот бренд?

Искрено не. Почнавме интуитивно. Но како што луѓето почнаа да се препознаваат во визијата на “Bratot”, стана јасно дека ова не е само обично парче облека, туку заедничка енергија.

Bratot Apparel не е само облека, туку е став. Која е приказната што ја раскажувате преку вашите креации?

Се трудевме нашите креации да имаат карактер, став, одлучност. Често знаеме да извадиме смели парчиња, несекојдневни и урбани пред се. Обработувајќи секојдневно расположение / mood, преку животински ликови, оставаме на потрошувачите да се пронајдат во нашите креации и да се поврзат со одредено животно, или одреден “mood”.

Скопје е дел од вашата ДНК. Колку градот ве инспирира во креирањето и колку, пак, сакате преку брендот да му дадете ново лице на градот?

Скопје нè обликуваше. Град со сурова енергија, контрасти и приказни. Преку “Bratot” сакаме да покажеме дека Скопје има стил, карактер и свој глас на глобалната streetwear сцена.

Streetwear често се гледа како „секојдневна“ мода, урбаната мода е глобален јазик, а модата како брз потрошен тренд. Како го правите секојдневното урбано и уникатно, што сакате да каже вашиот „дијалект“, како се гради вечност и што е поважно – стилот или приказната?

Со детали, симболика, јасна порака и со автентичност. Секојдневното станува уникатно кога има значење, а не само форма. Можеби доаѓаме од мала држава, но имаме силен став. Автентичноста е секогаш поважна од трендовите, бидејќи трендовите се менуваат, но карактерот останува. Со искреност се гради вечност – ние не бркаме трендови, туку градиме вредности. Потребни се и стилот и приказната, но стилот може да се копира, приказната никогаш.

Соработувавте со врвни уметници и креативци. Како дојде идејата за спој на streetwear културата со уметноста на телото – тетоважите – каква енергија донесе вашата соработка со Горан Мичич, на вашиот бренд?

Одлична соработка бидејќи streetwear-от и тетоважите говорат ист јазик, јазик на идентитет. Со неговата прва колекција за Bratot Apparel, Мичич донесе дополнителна енергија , остави голем печат и отвори нов колоритен свет, кој што доста добро се вклопува визијата на Bratot. Полн погодок за нас. Дефинитивно ова е само почеток, очекувајте нова collab колекција наскоро.

Спојот на streetwear и high art звучи како ризик, но и како револуција. Како изгледа кога Михаил Корубин, уметник со моќен визуелен потпис ќе се спои со улична мода?

Судир на светови што совршено се надополнуваат. Оние кои што го познаваат Корубин многу добро знаат за што станува збор. Нема да откриваме многу, ќе оставиме публиката сама да ја оцени нашата прва соработка, бидејќи капата зборува сама за себе. Се потрудивме преку соработката со Корубин, да го доведеме “Bratot” како бренд, на едно повисоко ниво.

Дали ваквите соработки ги гледате како проширување на границите на брендот – од мода кон уметност, од текстил кон платно?

Дефинитивно, “Bratot” не познава граници, ниту во форма ниту во израз. Тоа ни беше еден од плановите уште на самиот почеток. Верувајте ќе бидете позитивно изненадени и во иднина, од нашите соработки, кои што се надеваме дека ќе се прошират на светско ниво.

Ваша порака за младите?

Бидете свои, никогаш не се менувајте бидејќи тоа другите го бараат од вас. Ние сме доказ, дека во Македонија и те како се почитува иновативноста, квалитетот и искреноста. Никогаш немој да се откажете од вашите идеи и соништа.

Ако Bratot Apparel беше графит на ѕид, што би пишувало?

“Contemporary Streetwear Brand”

Bratot Apparel не се докажува со врева. Неговата сила е во препознавањето. Од маалото како појдовна точка, до улицата како сцена, и до заедницата како смисла — Bratot останува таму каде што стилот не е украc, туку јазик. И таму каде што облеката не се носи, туку се чувствува.

View this post on Instagram

A post shared by tike! (@tikebelgrade)

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ВМРО-ДПМНЕ: Реакција на прес-конференција на СДСМ

Добро е што Кузеска дава признание што од брусење шахти и казни на тие кои не употребуваат Северна, стигнавме денес и европските челници да употребуваат македонски идентитет и култура

Прес-конференцијата на Богданка Кузеска каде посочува дека Урсула фон дер Лајен употребува македонски јазик, култура и идентитет, со оглед на фактот што доаѓа од партијата позната по тоа што кога беше на власт ги брусеше капаците од шахтите зошто имале сонце, ја разбираме единствено како големо признание на оваа Влада која од состојба каде Заев како премиер ги корегираше и казнуваше сите кои не употребуваат Северна дојдовме до ситуација европските челници да ја прифатат придавката македонски и да се јакне македонскиот идентитет.

ВМРО-ДПМНЕ

Тагови: ВМРО-ДПМНЕ

Македонија

Делегација на МЕРМС во Женева

58% од инсталираниот капацитет е од обновливи извори – следен чекор модерна мрежа и складирање.

Делегација од Министерството за енергетика, рударство и минерални суровини учествуваше на UNECE Sustainable Energy Week која се одржа во Палатата на нациите во Женева, со фокус на прашањата поврзани со енергетската транзиција, енергетската безбедност, достапноста на енергијата и одржливиот развој.

Во рамки на настанот се одржаа состаноци на Групата експерти за енергетска ефикасност (GEEE), Групата експерти за почисти електроенергетски системи (GECES) и Групата експерти за обновлива енергија (GERE), како и 35-тата сесија на Комитетот за одржлива енергија на UNECE (CSE).

Во рамки на 13-тата сесија на Групата експерти за обновлива енергија (GERE-13), на панел-дискусијата Exchange of experiences on how to increase the uptake of renewable energy, Марко Минов од Секторот за обновливи извори на енергија, го претстави напредокот во спроведувањето на регулаторната рамка од Законот за енергетика и новиот Закон за користење на енергијата од обновливи извори, со кои се унапредува интеграцијата на енергетскиот пазар и се создаваат предвидливи услови за развој и инвестиции во обновливите извори.

Како клучни реформи беа опфатени прекуграничната распределба на капацитети, балансирањето, оперативната сигурност, гаранциите за потекло, активните потрошувачи, енергетските заедници и конкурентните механизми за поддршка на производството од обновливи извори на енергија.

Во излагањето, Минов го истакна и значителниот раст на капацитетите од обновливи извори на енергија во Македонија, особено на фотонапонските електроцентрали, а ги претстави и Годишните планови за изградба на енергетски објекти како инструмент за предвидлив и координиран развој на енергетскиот сектор и систематско планирање на нови производни капацитети и системи за складирање на енергија.

Во рамки на дискусијата, меѓу другото беше нагласено и дека: „зголемувањето на капацитетите од обновливи извори е само дел од енергетската транзиција. Следниот предизвик е електроенергетскиот систем да стане пофлексибилен, поотпорен и способен да интегрира сè поголеми количини на варијабилни обновливи извори. Интеграцијата на нови капацитети од обновливи извори, модернизацијата на мрежна инфраструктура, пазарните механизми и складирањето на енергија ќе биде важен дел од идниот развој на енергетскиот систем“.

Во рамки на 35 сесија на Комитетот за одржлива енергија (CSE-35) на тема Strengthening Energy Security, Affordability and Sustainability in an Uncertain World, меѓу другото беше одржана и дискусија на високо ниво, посветена на приоритетите, предизвиците и можностите за зајакнување на енергетската безбедност, достапноста и одржливоста.

Во рамки на сесијата, Елена Ивановска, кабинетски службеник задолжен за следење на стратешките приоритети на Владата, која воедно претседаваше и со сесијата System-wide Solutions to Strengthen Energy Security, Affordability and Sustainability, се обрати во име на Македонија, претставувајќи ги приоритетите на земјата и конкретните активности за унапредување на сигурноста, достапноста и одржливоста на енергетскиот систем.

Во своето обраќање, Ивановска истакна дека за Македонија, трите цели (енергетската сигурност, достапноста и одржливоста) се тесно поврзани и дека забрзувањето на развојот на обновливите извори, намалувањето на зависноста од увоз на електрична енергија и обезбедувањето сигурно снабдување бараат модерна, отпорна и регионално поврзана електроенергетска мрежа.

Посебен акцент беше ставен на потребата развојот на мрежната инфраструктура да го следи брзиот раст на обновливите извори. Во таа насока, беше посочено дека Македонија од 2021 година, кога обновливите извори сочинувале околу 38% од инсталираниот производен капацитет, до 2025 година достигнала учество од околу 58%, со повеќе од 1.750 MW инсталирани капацитети од обновливи извори.

Брзиот развој на сончевата енергија носи и нови барања за преносниот систем, особено поради децентрализираното варијабилно производство, двонасочните текови на електрична енергија и потребата од балансирање на системот.

Ивановска посочи и на потребата од значителни инвестиции во преносната мрежа, унапредување на регионалната соработка и развој на механизми за флексибилност, батериски системи за складирање енергија и управување со потрошувачката.

Учеството на претставниците од Министерството: Елена Ивановска, Билјана Матевска, Марко Минов, Сара Кочева, Ангела Алексова, Ненад Стојковски и Љубица Трајковска Лешоска претставуваше можност за размена на искуства со земјите членки на UNECE, претставници на меѓународни организации и експерти од областа на енергетиката, особено во делот на забрзувањето на енергетската транзиција и создавањето пофлексибилни, сигурни и одржливи енергетски системи, но и можност за претставување на реформите и искуствата на нашата земја.

Државата останува посветена на сигурна, достапна и одржлива енергетска транзиција, со фокус на понатамошно зголемување на производството од обновливи извори, модернизација и проширување на мрежната инфраструктура, развој на складирањето на енергија, унапредување на пазарната интеграција и создавање предвидлива регулаторна рамка за нови инвестиции.

Пораката од Женева е јасна: амбициозниот развој на обновливите извори мора да биде проследен со инвестиции во мрежата, флексибилност, складирање, регионална поврзаност и институционален капацитет.

Само преку интегриран пристап може да се изгради енергетски систем кој истовремено ќе биде сигурен, отпорен и одржлив.

Со почит,

Министерство за енергетика, рударство и минерални суровини

Тагови: МЕРМС

Македонија

Лишени од слобода се 12 возачи поради сторено кривично дело „безобѕирно управување возило“

Во текот на изминатото деноноќие, на различни локации во државата, лишени од слобода се 12 возачи поради сторено кривично дело „безобѕирно управување возило“.

Од нив, осуммина управувале возило без положен возачки испит и тоа: М.Љ.(40), А.Ш.(22) и Ј.Б.(30) сите од Скопје, И.Р.(24) од с.Света Петка, скопско, А.Р.(23) од с.Беловиште, гостиварско, С.А.(35) од с.Мелница, велешко и Н.М.(28) од с.Зрновци, кочанско и 17-годишник од село во Општина Градско.

Под дејство на алкохол управувале две лица и тоа: Н.П.(29) од Куманово и М.Н.(19) од Скопје. Додека пак, со забрана за управување со моторно возило управувале С.Н. (37) од Кичево и Р.Х.(37) од с.Рашче, скопско.

По целосно документирање на случаите, ќе бидат поднесени соодветни кривични пријави.

Апелираме до сите учесници во сообраќајот да ги почитуваат сообраќајните правила и прописи, да не управуваат возило без положен возачки испит или доколку имаат изречена мерка за забрана за управување или доколку се под дејство на алкохол и сите заеднички да придонесеме за побезбеден сообраќај.

Тагови: безобѕирно управување