Македонија

Борел: Самитот е добра можност да се потврди посветеноста на ЕУ на поддршката за Украина

Овој Европски совет е особено важен бидејќи со украинскиот претседател Володимир Зеленски ќе потпишеме договор за безбедносните обврски на Европската Унија кон Украина

Овој Европски совет е особено важен бидејќи со украинскиот претседател Володимир Зеленски ќе потпишеме договор за безбедносните обврски на Европската Унија кон Украина, изјави денеска високиот претставник на ЕУ за надворешна политика и безбедност Жозеп Борел пред почетокот на дводневниот Самит на Унијата во Брисел.

- Овие безбедносните обврски, покриваат и воени, дипломатски и финансиски обврски, истакна Борел, додавајќи дека е добро што е договорено употреба на приходите од замрзнатите руски средства за поддршка на Украина.

Според него, овој Самит е добра можност да се потврди посветеноста на ЕУ на поддршката за Украина.

Тој додаде дека Европа мора да го надомести изгубеното време во сферата на одбраната, преку поддршка и финансирање на европските одбранбени капацитети и одбранбената индустрија.

- Тоа нема да биде лесно, бидејќи ниту земјите членки, ниту ЕУ, немаат одвишок средства, истакна Борел, додавајќи дека сепак мора да се инвестира во одбранбената индустрија.

Според него, кога почнала војната во Украина се покажало дека 75 проценти од потребите за воените капацитети, ЕУ ги набавува од трети земји. - Тоа не може да биде однесување соодветно за еден геостратешки играч, нагласи Борел.

Борел се осврна и на ситуацијата на Блискиот Исток, нагласувајќи дека постои „голема загриженост“ за случувањата на теренот во услови кога и Израел и Хамас ги одбија планот на американскиот претседател Џо Бајден за прекин на конфликтот во Газа и Резолуцијата на ОН со која беше поддржан тој план.

- Гледаме дека гладот продолжува, бомбардирањето продолжува, хуманитарната поддршка не влегува во Газа, рече Борел, нагласувајќи дека состојбата во Газа не се менува и дека меѓународната заедница мора да се справи со тоа.

Високиот претставник укажа дека како резултат на случувањата во Газа се бележи зголемување на насилството на Западниот Брег и ескалираат тензиите во Либан, затоа мора да се преземат мерки за промена на ваквата состојба.

Шоу биз

Вил Смит објави нова песна: Музиката ме подигна

Вил Смит објави нова песна наречена „You can make it“. Познатиот актер и рапер песната ќе ја изведе во живо на 30 јуни на доделувањето на наградите „BET“.

Вил направи пауза од својата музичка кариера откако ја објави песната „Get Lit“ во 2017 година. Пред тоа тој исто така имаше пауза од речиси 12 години по студискиот албум „Lost and Found“ објавен во 2005 година.

Смит на својот Инстаграм профил сподели видео како свири дел од својата нова песна на пијано. „За време на некои од најтемните моменти, музиката беше покрај мене - да ме подигне и да ми помогне да пораснам. Моја скромна желба е музиката да го направи истото за вас и да ви ја донесе сета радост и светлина што ја заслужувате“, напиша тој во описот на видеото.

Свет

Сирија: Терористичката група „Исламска држава“ убила над 4000 луѓе од поразот во 2019 година

 Џихадистите од терористичката група Исламска држава (ИД) убиле околу 4100 луѓе во Сирија откако го загубија своето последно упориште во земјата во 2019 година, соопшти денеска Сириската опсерваторија за мониторинг на човекови права (СОЧП).

ИД презеде контрола над делови од Сирија и Ирак во 2014 година, прогласувајќи калифат и наметнувајќи режим на терор пред да биде поразена во 2019 година од меѓународната коалиција предводена од САД и курдските сили.

По територијалниот пораз, џихадистите се повлекоа во огромната сириска пустина и продолжуваат со смртоносни напади, главно насочени кон армијата и силите доминирани од Курдите.

Од 2019 година, борците на ИД убиле околу 4100 луѓе во повеќе од 2550 операции во областите под контрола на режимот или под контрола на полуавтономната курдска управа, соопшти Опсерваторијата.

Повеќето од жртвите се војници, но бројот на жртви, исто така, вклучува 627 цивили, наведува СОЧП, чија седиште е во Обединетото Кралство, но има широка мрежа на извори низ Сирија.

Едвај поминува ден без напад, заседа, целна операција или изненаден напад од џихадистите во регионот, истакнува организацијата додека режимските сили и групите што ги поддржуваат редовно спроведуваат безбедносни операции во пустината, со поддршка на руските воени авиони.

ИД претрпе тешки загуби со повеќе од 2000 убиени џихадисти, вклучувајќи водечки функционери, наведува СОЧП.

Извештајот на Обединетите нации објавен во јануари проценува дека бројот на борци на ИД во Ирак и Сирија се движи од 3000 до 5000.

Во граѓанската војна во Сирија, која избувна во 2011 година по бруталната репресија на владата врз продемократските демонстрации, загинаа над половина милион луѓе, што ја подели земјата./МИА

Тенис

Алкараз: Подготвен сум да ги „врзам“ Ролан Гарос и Вимблдон

Вимблдон е во тек, а во центарот на вниманието сега е актуелниот шампион и победник на Ролан Гарос, Карлос Алкараз. Шпанецот истакнува дека е подготвен да ја одбрани титулата.

- Во моментов, не се чувствувам особено посебно. Иако, овде се ми е посебно, бидејќи минатата година имав две одлични недели. Но, јас само сакам да гледам на ова како на секој турнир. Се чувствувам одлично, имав многу денови да се адаптирам, да тренирам. Се чувствувам многу порелаксирано кога се движам и играм на трева, изјави Алкарас.

Шпанецот доаѓа со „ореолот“ на освојување на Ролан Гарос и има шанса да го направи она што не го направија многу луѓе во отворената ера - да ги освои Ролан Гарос и Вимблдон во истата година. Ова го постигнаа Бјорн Борг три пати, Рафаел Надал двапати и Род Лејвер, Роџер Федерер и Новак Ѓоковиќ по еднаш.

- Само да се освои Гренд слем е тешко. Сè е уште потешко кога за краток временски период се префрлате од земја на трева. Но, да речеме дека ќе се обидам да го направам тоа. Сакам да се приклучам на листата на малиот број луѓе кои го направиле ова. Знам дека ќе биде многу тешко, многу предизвикувачки. Но, мислам дека сум подготвен за тоа, порача Шпанецот.

Тој призна дека гледа видеа од поранешните шампиони, но потенцира дека нема ништо да промени во својата игра.

-Сè уште гледам снимки од Роџер, Енди (Мареј), Рафа, како и Новак. Сега ги гледам моите снимки за да видам како го направив тоа, заврши Алкараз. /МИА

притисни ентер