Болеста „Њукастел" ги коси гулабите во Струмичко, надлежните апелираат на време да се вакцинираат со евтина вакцина

Одгледувачите на гулаби во Струмичко се жалат дека нивните јата се покосени од болеста „Њукастел", која во нашата држава се појави минатиот месец и засега е регистрирана само во Скопје.

Според Агенцијата за храна и ветеринарство болеста е пренесена преку птици од Турција. Не се пренесува на човек, но е високосмртоносна за живината и предизвикува големи економски штети во живинарството.

Гулабарите велат дека кај нивните миленици се појавува вртоглавица, вкочането крило и дијареја и набргу умираат.

-Кај мене умреа околу четириесетина гулаби од вкупно 120, но тука не ги ставам младите гулаби кои угинаа во гнездата во гулабарникот. Можеби на прв поглед не е толку страшно, но одгледувачите на гулаби трпат и финансиска штета, бидејќи еден добар македонски вртач, стар над три години, чини над 500 евра, вели Тодор Маџаров, претседател на Здружението „Македонски вртач" од Струмица и долгогодишен одгледувач на овој вид гулаби, но и други птици и животни.

Ни покажа и еден бел гулаб, кој ги имаше симптомите на болеста. Главата му беше свиткана нагоре, но според Маџаров може да се случи и да преживее, бидејќи досега имало и такви случаи.

И Миле Алтанџиев потврдува дека болеста „Њукастел" ја има кај гулабите.

-Моите гулаби беа меѓу првите кои беа нападнати од оваа болест, која не е нова и се појавува скоро секоја година. Пред две години изгубив цело јато кое го одгледував 25 години. За три дена ми умреа четирисетина гулаби. Истата година се појави и кај други гулабари. Годинава презедов мерки на немешање на гулабите и одгледувам само десетина гулаби. Сега поради пандемијата од коронавирусот не се движиме и не се собираме и со тоа не ги мешаме гулабите. Според моите сознанија болеста најмногу ги погодува младите гулаби, бидејќи се неотпорни, рече Миле Алтанџиев, претседател на Спортското друштво „Гулаб" од Струмица.

Вирусот на оваа болест беше лабораториски потврден во почетокот на април во одгледувалиште за бројлери во скопската општина Гази Баба, по што Агенцијата за храна и ветеринарство донесе решение за спроведување на сет безбедносни мерки за спречување на ширењето на болеста. Заради заштита од евентуално ширење на вирусот преку месото од пазарот беа повлечени и уништени количините месо кои пред детектирањето на болеста биле дистрибуирани во продажба.

Агенцијата за храна и ветеринарство апелира до одгледувачите на живина на целата територија на државава да ја исполнат законската обврска и согласно годишната наредба за здравствена заштита на животните, да се обратат до најблиското ветеринарно друштво и да ја вакцинираат живината и гулабите против болеста „Њукастел".

-Вакцинирањето на живината, односно на гулабите е на трошок на одгледувачите и доколку не спроведат вакцинирање има казнени мерки. Вакцината е многу евтина, а единствен услов е еднократно да регистрираат одгледувалиште за околу 270 денари и да го внесат во нашиот систем, објасни директорот на Агенцијата за храна и ветринарство, Зоран Атанасов.

Додаде дека доза вакцина чини околу 1.500 денари, од која може да се вакцинираат над илјади животни.

Според податоци од гулабари во Струмица има околу стотина огледувачи на гулаби-вртачи, а во државата вкупниот број на гулаби е околу 10 илјади. /МИА

Доктор специјалист од Општата болница Куманово починал од корона

 Драган Тасевски, доктор специјалист вработен на хируршкото одделение во Општата болница Куманово, почина од коронавирус.

Докторот добил позитивен тест пред десет дена, а откако состојбата му се влошила бил лекуван на Инфективната клиника во Скопје.

Куманово е жариште на коронавирусот од почетокот на пандемијата. Досега во Центарот за јавно здравје во Куманово, под кои спаѓаат и Липково и Старо Нагоричане, регистрирани се 1.998 заболени од коронавирус, а активни се 233.

„Талир": Јанакиевски и Божиновски од сопственикот на ,Урбан Инвест" барале 15.000 евра

Сопственикот на кавадаречката компанија „Урбан инвест", Јован Грков, во своето денешно сведочење во случајот „Талир" изјави дека лично од обвинетите Миле Јанакиески и Кирил Божиновски пред избори добил наредба да даде 15 илјади евра.

Сведокот Грков при својот исказ пред Судот уште потврди дека добивал тендери за градежни активности од Град Скопје и од други општини.

На прашање на обвинителката Ленче Ристоска дали некој од ВМРО-ДПМНЕ барал пари од него, односно од фирмата, приговараа адвокатите на сите обвинети дека прашањето е наведувачко, па прашањето беше преформулирано.

– Некаде пред изборите добив СМС порака од Марјан, претседател на Општинскиот комитет на ВМРО-ДПМНЕ – Центар. Ми пиша дека треба да отидам во Владата. Во посоченото време отидов, ми кажаа пред која канцеларија да отидам. Почекав, ме викнаа Миле Јанакиески и Кирил Божиновски. Состанокот траеше кратко, ми рекоа имам обврска да дадам 15.000 евра. Ми рекоа на лицето Марјан да му ги предадам. Не ми кажаа зошто треба да ги дадам парите. По неколку дена му ги дадов тие 15.000 евра на Марјан. Му ги дадов на рака. Потврда, документ не добив од Марјан за парите што ги дадов, одговараше сведокот на прашања на Ристоска.

Грков по овој одговор беше прашан и дали се спротиставил на ова барање, на што тој одговори со ,,не” и образложи дека знаел оти мора да го исполни барањето.

Потоа настапија адвокатите на обвинетите со вкрстени прашања за потребите на одбраната.

Инаку, денешното судско рочиште за случајот „Талир” за незаконско финансирање на ВМРО-ДПМНЕ и перење пет милиони евра, почна со казна за адвокатот Донче Наков од 500 евра од страна на судијата за организиран криминал Осман Шабани. Минатото судење за овој случај беше одложенп затоа што претставникот на ВМРО-ДПМНЕ, партискиот портпарол Наум Стоилковски не дојде, оти, како што го оправда адвокатот Наков, се разболел.

– Адвокатот кажа дека ќе достави медицинска потврда до Судот како доказ за тоа што му го кажал претпоставувам клиентот – претставник на партијата. Наков тоа до денеска не го стори, а јас кажав на минатото рочиште дека давам наредба за негово полициско спроведување ако до Судот не донесете документаија. Поради тоа и претставникот беше приведен. Судот го казнува адвокатот Донче Наков со парична казна од 500 евра во денарска противвредност, соопшти судијата Шабани.

Обвинението за незаконското финансирање на ВМРО-ДПМНЕ го товари поранешниот партиски лидер и премиер Никола Груевски за „злоупотреба на службената положба и овластување" и за „перење пари и други приноси од казниво дело". Бидејќи Груевски е во бегство во Унгарија, му се суди во отсуство.

За истите две кривични дела, казниви со затвор, се осомничени и Кирил Божиновски и Миле Јанакиески, кој е во куќен притвор.

Во истиот процес Илија Димовски и Леко Ристоски се обвинети за „перење пари и други приноси. За ова дело беше обвинета и Елизабета Чингаровска, која ја призна вина. Партијата ВМРО-ДПМНЕ, како правно лице, исто така е обвинета за „перење пари и други приноси"./МИА.

Голем помор на риби кај производители на крап на Тиквешко Езеро

Целото производство од преку 120 тона ни е загрозено. 

Голем помор на риби кај производители на крап, се случува во моментот на Тиквешко Езеро, почнувајќи од вчерашните утрински часови, а се уште трае, алармираат производители на крап. Велат дека во моментов на удар се две од најголемите компании производители на крап во кафезен систем, „Златен крап" и „Дошница".

– Целото производство од преку 120 тона ни е загрозено. Настојуваме на секаков начин да интервенираме, вклучително и со додавање на вештачки кислород во водата како би ја спречиле оваа катастрофа, но развојот на ситуацијата е се` уште неповолен, велат од „Златен крап".

Според нив, забележително е катастрофално ниското ниво на акумулацијата во изминатиот период и нејзиното интензивно празнење, кое трае и во моментот.

– Измереното ниво на кислород во водата е спуштено на алармантни 2 mg/L. Ова е за повеќе од половина од вообичаено присутниот кислород (4 до 5 mg/L) во нашите води, а кој е неопходен за опстојување и добра кондиција на рибата, велат засегнатите.

И покрај тоа што позицијата на рибниците е точно над поранешното течение на Црна Река, овој помор, велат, до моментов се случува само во овој дел.

– Досега не е забележан помор на другите рибници, но ризикот секако постои, особено што пред неколку години истиот проблем се појави кај целата акумулација и тогаш беше уништено речиси 60-70 проценти од производството на сите производители. Со случајот се запознати челниците на Владата и министерот за земјоделство, шумарство и водостопанство. Уште во текот на вчерашниот ден, направен е увид од ветеринарен инспектор, земени се мостри од водата од страна на ИЈЗ Кавадарци, а однесени се мостри од водата и примероци од угината риба во Агенцијата за храна и ветеринарство во Скопје на дополнителни анализи и испитувања. Заедно со овие наоди, случајот ќе биде пријавен и во Министерството за внатрешни работи, информираат засегнатите од поморот на риби на Тиквешко Езеро.

притисни ентер