Тој пред Судот кажа дека се чуствува како политички затвореник и лице на кое се тренира правда. Јовановски вели дека му се прекршени правата загрантирани со Уставот, а за тоа го известил државниот обвинител, но и амбасадорите во земјава. Од кого биле упатени заканите Боки 13 не кажа, но дека имало такви потврди и неговиот адвокат Сашко Дуковски.
„Секојдневно има закани и притисоци. Во овој момент не би кажал од кого се, но има закани дали ќе збори или нема. Од надворешни лица. Не е херметички затворен затворот ‘Скопје’. Тој најдобро знае од каде доаѓаат. Ова е најмалку правен процес, туку е политички процес. Доаѓаат преку посредници, некогаш и директни.. Не можеме да кажеме дали се политичари. Од висока позиција се од секакво миље во оваа наша убава држава.”,вели Сашко Дуковски – адвокат на Бојан Јовановски.
На рочиштето сведочеше некогашната прва заменичка на Катица Јанева во СЈО, обвинителката Елизабета Јосифовска. Таа кажа дека на 2-ри мај минатата година по налог на специјалната обвинителка потпишала мислење за издавање на времен пасош во траење од 8 месеци на бизнисменот Камчев, осомничен во “Империја”.
„Барањето се работеше итно, беше добиено утрото, а кај мене на потпис стигна пред крај на работно време. Јанева и Стефанова не беа на работа, а мене ми беше чудно што не се почитуваше стандардната процедура. Се јавив кај шефот на кабинет на Јанева и таа ми рече дека комуницирала со специјалната обвинителка која потврдила дека треба времен пасош. Се слушнав телефонски и со Стефанова таа не се согласуваше, но последниот збор го имаше по закон Јанева. Јас немав избор, морав да потпишам.“, сведочеше Елизабета Јосифовска.
Јосифовска кажа дека на на состанок во декември 2018 Лиле Стефанова доставила предлог за одбивање на жалба и продолжување на притворот на Орце Камчев, но Јанева побарала да биде заменет со куќен. Рече дека ова било збунувачки за сите, а Стефанова кажала дека ќе биде штетно за истрагата , но Јанева и одговорила дека тоа ќе биде добро за процесот“
На друг состанок одржан во април, но во потесен состав во СЈО, Јосифовска кажа дека Јанева побарала од обвинителите Стефанова, која е надлежна за „Империја“ и од Бурим Рустеми, кој ја води истрагата „Поштенска банка“, да изготват пресметки колкави суми да исплатат како оштета на државата и со спогодба за вина да се ослободат од неа, со парични казни. Јанева рекла: „за да не одат луѓето во затвор“.
На прашање на адвокатот на Јанева, Јосифовска кажа дека пракса било да се преговара со осомничени за спогодба или соработка во истраги и дека според процедурите само специјалната обвинителка можела да знае дали против Камчев се воделе други истраги – што за адвокатите е во корист на Јанева.
За следни сведоци во постапката се повикани обвинителите Лиле Стефанова, Бурим Рустеми, како и некогашната шефица на Кабинетот на Јанева.