Веста која вчера како бомба одекна во Москва, заедно со ненадејната оставка на руската Влада, денеска веќе го добива се поизвесното сценарио, затскриено зад уставните измени, кои ги најави Путин, а кои се очекува да го продолжат политичкиот век на таткото на нацијата. Путин не губи време и уште денеска ги изложи придобивките од уставните измени пред работната група, што треба да ги донесе.
-Значењето на овие измени е да се обезбеди понатамошен развој на Русија како правна, социјална држава, со ефикасни институции, да се зајакне улогата на граѓанското општество и политичките партии, изјави Владимир Путин, претседател на Русија
Уставните реформи, според руските медиуми, предвидуваат сериозно ослабување на позицијата претседател, а засилување на моќта на премиерот и на шефот на државниот совет. Најголем дел од анализите упатуваат дека Путин ќе атакува токму на едно од овие две позиции, по четири години, кога му истекува и вториот мандат и нема право на нов.
-Овој чекор, всушност има за цел да ја смени структурата на руската валда, на начин, што ќе му овозможи на Путин да делува од различна позиција., вели Виктор Олевич, политички аналитичар од Москва.
-Каква и позиција да одреди за себе, ќе треба да му овозможи контрола и тој да биде конечен арбитар на споровите меѓу елитите и одлуки во земјата., вели Маша Липман, политички аналитичар од Лондон
Путин со Русија владее 16 години. Досегашниот устав го ограничуваше на два последовни мандати, но не прецизираше колку такви последовни мандати може да има. Путин во 2008-та веќе беше премиер, а Медведев стана претседател, за по четири години да се вратат на првичните позиции. Што и да избере овој пат, тој не планира да се откаже од моќта, а тоа се уште го очекуваат поголем дел од Русите.