Беше слеп 20 години, а потоа познатиот доктор му извади заб и му го вгради во окото: „Мислев дека се шегува, но прогледав“ - Канал 5

Живот

Беше слеп 20 години, а потоа познатиот доктор му извади заб и му го вгради во окото: „Мислев дека се шегува, но прогледав“

Зачудувачка животна приказна доаѓа од Канада. Слеп човек прогледал, а за неговото оздравување не е заслужно никакво чудо – туку науката и медицината!

Беше слеп 20 години, а потоа познатиот доктор му извади заб и му го вгради во окото: „Мислев дека се шегува, но прогледав“

Редок хируршки зафат, кој вклучува вадење на заб и негово вградување во окото, му овозможил на овој 34-годишен маж повторно да гледа! Неговиот доктор објаснил како функционира оваа процедура.

Науката во последниве децении бележи огромен напредок во медицината и технологијата, отворајќи можности кои некогаш изгледале незамисливо. Благодарение на интервенции што ја обединуваат експертизата од различни области – биологија, инженерство и хирургија – денес е можно на пациентите да им се вратат функции што ги изгубиле пред многу години, исто како што на овој слеп Канаѓанец му е вратен видот.

Особено фасцинантни се иновациите што овозможуваат поврзување на човечкото тело со вештачки помагала, надминувајќи ги природните ограничувања. Ваквите примери не само што ги менуваат животите на поединци, туку ги поместуваат и границите на тоа што го сметаме за возможно во современата медицина.

Фото: Youtube/ Life-changing 'tooth-in-eye' surgery restores man's vision

Прогледал по 20 години

Приказната која на најдобар начин го илустрира овој напредок доаѓа од Канада, каде слеп маж повторно прогледал по повеќе од 20 години, благодарение на редок зафат познат како „заб во око“, пишува магазинот People.

Брент Чапман, 34-годишник од Северен Ванкувер, Канада, го изгубил видот кога имал само 13 години. Причината била исклучително ретка алергиска реакција на ибупрофен, позната како Стивенс-Џонсонов синдром. Болеста сериозно му ги оштетила очите и го оставила целосно слеп. Следните две децении ги поминал барајќи терапија што би му го вратила видот. Пробувал бројни третмани, но ниту еден не давал долгорочни резултати.

Тогаш стапил во контакт со офталмологот др. Грег Молони од болницата Mount Saint Joseph во Ванкувер. Токму др. Молони предложил на неговото десно око да се изврши ретка процедура „заб во око“.

Како функционира „заб во око“?

Оваа операција е развиена уште во 1960-тите години, а до денес е извршена кај само неколку стотини пациенти низ светот. Самиот зафат вклучува неколку сложени чекори. Прво се вади сопствениот заб на пациентот, потоа се обработува и во неговиот центар се дупчи мала дупка. Во таа дупка се вградува вештачка леќа, а целата структура потоа се вградува во предниот дел од окото на пациентот, овозможувајќи му да гледа преку новата леќа.

Др. Молони објаснил дека се користи сопствениот заб на пациентот бидејќи тоа значително го намалува ризикот телото да го отфрли вградениот материјал како туѓо тело.

„Луѓето обично се шокирани и не можат да поверуваат кога ќе слушнат дека ваква операција воопшто постои,“ рекол докторот.

„Бев скептичен“

Чапман признал дека и самиот на почетокот бил многу скептичен.

„Звучеше како нешто од научно-фантастичен филм. Помислив: Кој воопшто го измисли ова? Па ова е лудост,“ изјавил во интервју за порталот Today.com.

„Се чувствувам фантастично. Видот ми се врати и сега гледам еден целосно нов свет,“ изјавил за медиумите.

Особено емотивен момент бил кога првпат по дваесет години можел да го погледне во очи својот доктор.

„Кога се погледнавме со др. Молони, и двајцата заплакавме. Не сум погледнал никого во очи со моите вистински очи повеќе од 20 години,“ рекол Чапман, кој е еден од првите пациенти во Канада на кој му е извршен овој зафат.

YouTube video

Тагови: медицина слеп Чудо

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

13 возачи лишени од слобода за „безобѕирно управување со возило“ во изминатото деноноќие

Во текот на изминатото деноноќие, на територијата на целата држава, полициски службеници лишија од слобода 13 лица поради „безобѕирно управување со возило“.

13 возачи лишени од слобода за „безобѕирно управување со возило“ во изминатото деноноќие

Од нив, 11 возачи управувале возило без возачка дозвола, и тоа од Велес, Скопје и Прилеп.

Двајца возачи, од Куманово и Скопје, управувале возило под дејство на алкохол.

При преземање на мерки и активности, кај возач од Скопје кој управувал возило без возачка дозвола, било констатирано дека на патничкото моторно возило предната регистарска таблица не припаѓала на возилото.

По целосно документирање на случаите, ќе бидат поднесени соодветни кривични пријави.

Министерството за внатрешни работи продолжува со засилените контроли во сообраќајот, со цел санкционирање на несовесните возачи и спречување на однесувања со кои се загрозува безбедноста на сите учесници во сообраќајот. Почитувањето на сообраќајните правила и прописи, поседувањето важечка возачка дозвола и управувањето со возило во трезна состојба се основа за безбеден сообраќај.

Тагови: безобѕирно возење

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Мелони повлекува црвена линија: „Не сум добрa за сите годишни времиња“

Италијанската премиерка Џорџија Мелони ги отфрли шпекулациите дека би можела да формира сојузи со политички сили кои се противат на воената помош за Украина.

Мелони повлекува црвена линија: „Не сум добрa за сите годишни времиња“

Во интервју за италијанскиот весник „Ил Фодлио“, Мелони рече дека не е подготвена да се откаже од своите верувања за политичка или изборна корист.

„Џорџија Мелони сигурно не е подготвена да го стори спротивното од она што го направила или во што верува, заради политичка или изборна пресметка“, рече таа, одговарајќи на прашањето дали поставила јасни црвени линии за приклучување кон коалиција.

Нејзините зборови се предупредување до Роберто Ваначи, поранешен генерал кој стана екстремно десничарски политичар и отворен критичар на Европската Унија и воената помош за Украина.

„Кој бара премиер кој се предомислува во зависност од тоа која партија го поддржува, секогаш и исклучиво за лична корист, треба да бара некој друг. Јас сум сериозна личност и не сум добра за сите годишни времиња“, рече Мелони.

Мелони ќе се соочи со гласачите на изборите следната година, откако штотуку стана премиер со најдолг мандат во италијанската историја. „За мене, во текот на овие години, од изборна гледна точка, ќе беше покорисно да не ја поддржувам Украина отколку да ја поддржувам неа. Не ја поддржував Украина за Киев, туку за Рим“, нагласи италијанската премиерка.

Тагови: Џорџија Мелони

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ЛДП анализа: Спротивно од премиерот, иселувањето ќе се интензивира во наредните години!

Македонија денес не се соочува со изолирани грешки, туку со невидена серија на скандали што го уништуваат секојдневието на граѓаните.

ЛДП анализа: Спротивно од премиерот, иселувањето ќе се интензивира во наредните години!

Додека премиерот шири розева пропаганда за наводен просперитет, суровата реалност и најновите PISA резултати покажуваат поразителна слика за Македонија: загрижувачка елементарна и функционална неписменост кај младите и целосен слом на образовниот систем. Оваа општествена хаварија директно се пресликува и во судството, каде што одлуките станаа целосно неразбирливи за обичниот човек. Во оваа држава, за ситен криминал се одговара експресно, додека за најголемите коруптивни процеси постапките немаат завршница или завршуваат со ослободителни пресуди за кои дури и не се објавуваат пишани образложенија, како што е случајот со „Талир 2“ и седиштето на ВМРО-ДПМНЕ. За да се види каде завршиле искрадените пари од џебот на граѓаните, не треба замислување или правни филозофии — доволно е само да се отворат очите во центарот на Скопје и да се погледнат онаа огромна камена палата со толку спратови и целиот плоштад пред неа.

Македонија денес не се соочува со изолирани грешки, туку со невидена серија на скандали што го уништуваат секојдневието на граѓаните. Власта новата учебна година ја започна со скандалозно преображение на наставните програми и слушање црковни писма наместо наука, додека прославата на независноста ја претвори во коруптивен спектакл со приватизација на државни функции. Генералната неказнивост гарантирана преку Кривичниот законик, законите заглавени со месеци, и трагичниот, животозагрозувачки недостиг на лекови на Онкологија се само потврда дека системот е целосно заглавен. По истиот овој коруптивен модел денес на сите им е јасно зошто бегаме од европските правила и зошто по истиот принцип паѓаат економијата, здравството и образованието.

Во вакви катастрофални околности, Либерално-демократската партија (ЛДП) констатира дека, спротивно од празниот оптимизам на премиерот, иселувањето од Македонија не само што нема да запре, туку драматично ќе се интензивира во наредните години како директна последица на ова лошо владеење. Кој нормален човек, млад професионалец или родител би останал да живее во земја каде што ги нема основните услови за здравје, правда и заштита на сопствените деца? Единствените кои со задоволство ќе останат во ваква заглавена држава се луѓето од партиската елита на ВМРО-ДПМНЕ, кои се и единствените кои ја градат сопствената иднина врз грбот на оние кои си заминуваат.

Со почит,

Либерално-демократска партија

Тагови: ЛДП

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер