„Не можеме да го игнорираме овој непријателски потег“, рече портпаролот на белоруското Министерство за надворешни работи, Анатолиј Глазов во изјавата по стапувањето во сила на американските економски санкции против девет белоруски државни компании.

Како што се наведува во соопштението, мерките за одговор вклучуваат „намалување на дипломатскиот, административниот и техничкиот персонал“ на американската амбасада во Минск и „заострување на постапката за издавање белоруски визи“.

Белорусија исто така ја одзеде лиценцата на Агенцијата на САД за меѓународен развој (УСАИД) за работа на нејзина територија, прецизира тој.

Санкциите на САД против девет белоруски државни компании биле воведени во април по задушувањето на демократските протести во Белорусија.

По спорните избори во 2006 година, Вашингтон ги забрани сите трансакции со тие компании. Министерството за финансии на САД ги укина тие санкции во 2015 година и го поздрави извесниот напредок, но американската влада кон крајот на март предупреди дека суспензијата нема да биде обновена.

„Овие се нелегитимни дејствија спротивни на меѓународното право и нивната цел е да извршат притисок врз суверена држава“, критикуваше Глазов додавајќи дека тие ќе влијаат на „обичните белоруски граѓани“.

Минатата недела Вашингтон објави дека работи со Европската унија на дополнителни санкции против Белорусија по присилното пренасочување на авионот на Рајанер кон Минск и апсењето на опозициски активист во авионот.

Американскиот амбасадор во Минск беше отповикан во 2008 година на барање на белоруските власти по американските санкции против белорускиот претседател Александар Лукашенко. Оттогаш, американската дипломатска мисија е предводена од вршител на должност.

Лукашенко се соочи со невидени масовни протести откако беше избран за петти мандат на спорните избори во август 2020 година.

Тој одбива каква било отстапка и ги уапси или прогонува повеќето свои противници, тврдејќи дека Западот води кампањи во обид да го симне од власт.