Автомобилизам

Банкротира компанијата, која што требаше да произведува возила на соларен погон

Тажен крај за компанија чија цел беше да го зголеми опсегот на просечниот електричен автомобил до 100 проценти преку иновации.

Наместо револуционерен автомобил, ништо од почетокот на производството. Lightyear најверојатно ќе банкротира, а нејзините 600 вработени ќе излезат на берза на трудот. Како што потврди за NL Times стечајниот управник Реинуд ван Оијен, под-брендот на Lightyear Atlas Technologies банкротирал, а тоа значи и банкрот на производителот на автомобили.

Покрај бројните отпуштања, запрен е и развојот на вториот модел Lightyear 2, кој ќе биде предмет на разговори за идна соработка со потенцијалните партнери како VDL, сопственик на фабриката за автомобили NedCar во Борн. Иако производството на овој модел не е започнато и не е отворена листата на нарачки, интерес пројавија бројни лизинг компании.

„И пред стечај компанијата разговараше за соработка со различни компании. Наидов и на VDL. Затоа е очигледен чекор да се започне дискусија со VDL“, рече Ван Оијен, кој нагласи дека неколку заинтересирани страни веќе се идентификувани како кандидати за преземање. „Она што ќе го направам во следните неколку дена е да видам колку се сериозни нивните интереси“, заклучи тој.

Според локалните медиуми, постои голема веројатност за соработка, особено што NedCar моментално има слободен капацитет. Да споменеме и како првиот модел Lightyear 0 се произведува во Финска од ноември минатата година. Само мала количина била произведена пред фабриката да престане со работа. Неколку дена пред банкротот, компанијата одлучила да го прекине производството и целосно да ги префрли ресурсите на Lightyear 2. Очигледно предоцна.

Сестринската компанија Lightyear Layer, одговорна за производство на соларни панели, не престанува со работа. Во моментов се води истрага за да се види каква е судбината на интелектуалната сопственост на компанијата, односно кој располага со неа.

НБА

Леброн: Јокиќ е еден од најдобрите на сите времиња

Првата ѕвезда на Лос Анџелес лејкерс, Леброн Џејмс искажа комплименти за центарот на Деневер, Никола Јокиќ.

Лејкерси ќе се сретнат со Нагетс во 1. коло од плејофот, а дуелот Џејмс – Јокиќ предизвикува големо внимание кај светската кошаркарска јавност.

- Еден од најдобрите досега. Едноставно е таков. Јокиќ може се. Што е најважно, тој го менува начинот на кој неговите соиграчи размислуваат за сопствената игра. Кога некој може да ги инспирира другите да играат на ниво на кое не ни знаеле дека можат, тоа е доказ дека зборуваме за навистина одличен играч, рече Џејмс.

Првата средба во плејоф пресметките меѓу Лос Анџелес лејкерс и Денвер нагетс е закажана за утре. /МИА

Свет

Претставничкиот дом на САД треба да гласа за големиот пакет помош за Украина, Израел и Тајван

По неколкумесечно одложување, Претставничкиот дом на американскиот Конгрес денеска треба да гласа за големиот пакет помош за Украина, Израел и Тајван, вреден 95 милијарди долари, како и за евентуалната забрана на ТикТок во САД.

Предлог-законите се резултат на повеќемесечни тешки преговори меѓу демократите и републиканците, како и притисокот од сојузниците на САД и постојаните молби за помош од украинскиот претседател Володимир Зеленски.

Законите, сепак, сè уште имаат гласни противници во Конгресот, а надежите за усвојување зависат од кревката двопартиска коалиција која се обидува да ги надмине големите процедурални и законодавни пречки, пренесува Би-Би-Си.

Спикерот на Претставничкиот дом Мајк Џонсон изјави дека е решен да ги поднесе законите на гласање, и покрај фактот што радикалните републиканци може да побараат негово разрешување.

Предлогот предвидува 60,8 милијарди долари помош за Украина, 26,4 милијарди долари за Израел и 8,1 милијарди долари за индо-пацифичкиот регион, вклучувајќи го и Тајван.

Претставничкиот дом ќе гласа за секој предлог-закон поединечно, што значи дека некои може да поминат, а некои не.

Претседателот Џо Бајден и демократските пратеници во Конгресот со месеци се залагаат за нов голем пакет оружје за Украина, но републиканците под влијание на нивниот претседателски кандидат Доналд Трамп, ја условуваа помошта.

Со усвојување на законите, исто така, ќе му се овозможи на Бајден да конфискува и продава руски имот, а средствата да ги намени за помош на Украина, потег што беше прифатен и од другите земји од Г7.

Претставничкиот дом ќе ја разгледа и предложената законска одредба со која треба да се принуди ТикТок да се откаже од кинеската матична компанија ByteDance или ќе се соочи со забрана во САД, каде што има околу 170 милиони корисници.

Белата куќа соопшти дека „силно го поддржува“ вкупниот пакет помош и оти Бајден ќе ги потпише законите веднаш штом бидат усвоени од двата дома на Конгресот.

Тоа би можело да се случи за неколку дена, бидејќи лидерот на мнозинството во Сенатот, Чак Шумер, вети дека Сенатот со мнозинство од демократите брзо ќе преземе мерки штом бидат усвоени од Претставничкиот дом.

Сепак, политичките аналитичари во САД оценуваат дека усвојувањето на законите во Претставничкиот дом, би можело да го чини спикерот Мајк Џонсон губење на спикерското место. Неколку екстремно десничарски републикански пратеници предупредија дека може да го соборат Џонсон поради поддршката на нацрт-законите. /МИА

Македонија

Затруен од наркотици пронајден во бессознание во двор во Кавадарци

Кавадарчанец затруен од наркотици бил пронајден во бессознание во двор во Кавадарци, информираа денеска од СВР Велес.

- Вчера во 12.00 часот во ОВР Kавадарци, од Итна медицинска помош било пријавено дека во дворот на М.К.(42) од овој град, во бессознание бил пронајден кавадарчанецот Б.О.(40), кој бил затруен од наркотични средства. Подоцна, со судска наредба, полициски службеници извршиле претрес во домот на М.К., при што била пронајдена и одземена таблета екстази. М.К. бил лишен од слобода, појаснија од СВР Велес.

Оттаму додадоа дека по документирање на настанот, против него ќе биде поднесена соодветна пријава.