Американскиот претседател најпрво пристигна во Њу Џерси, федерална држава што се граничи со Њујорк и беше тешко оштетена во природната катастрофа.
"Експертите со децении не` предупредуваат на екстремни временски настани. Сега се соочуваме со нив. Не можеме да се вратиме назад, но можеме да спречиме работите да се влошат", рече Џо Бајден по повод состанокот со локалните водачи во кризниот штаб во округот Сомерсет.
Во разорните поплави во средата вечерта загинале 47 лица во американската метропола и околината и предизвикана е огромна материјална штета.
Снимките од подземната железница во Њујорк поплавена од поројот го обиколија светот. Шумски пожари, урагани и поплави, екстремни временски настани ги зафаќаат сите делови на САД, рече Бајден.
Американскиот претседател ја посети Луизијана минатиот петок, првата американска држава што Ида ја уништи додека се уште имаше ураганска сила.
Демократскиот претседател нагласи дека САД мора да инвестираат многу во борбата против климатските промени што е можно поскоро, особено во дотраената инфраструктура.
Џо Бајден подготвил два големи инвестициски програми, во инфраструктура (патишта, мостови, електрична мрежа) и во социјалните услуги (образование, здравство) во вкупен износ што може да порасне и до 5.000 милијарди долари.
Обиколките во областа опустошена од урагани се можност Бајден повторно да ја преземе улогата на утешител во последните недели во кои беше принуден да го оправда повлекувањето на американската војска од Авганистан и смртоносниот напад на аеродромот во Кабул, во кој загинаа 13 американски војници , пренесува Ројтерс.
САД се уште се обидуваат да ги повлечат своите луѓе од Авганистан по операцијата што Бајден ја нарече историска, бидејќи илјадници луѓе беа евакуирани со воздушен мост.
Бајден мора да се врати на домашните теми во наредните денови, како борбата за репродуктивни права на жените по новиот закон против абортус во Тексас, истекот на надоместоците за невработеност и новите мерки против „Ковид-19“.
Во сабота, Бајден ќе учествува на комеморациите по повод 20- годишнината од терористичките напади во Њујорк.