Загриженоста за влијанието на големиот број имигранти од Европската унија е еден од клучните фактори во позадината на британскиот референдум за напуштање на блокот во 2016 година и владата денеска соопшти дека планира да го намали вкупниот број имигранти.
Новиот систем ќе доделува поени за специфични вештини, квалификации и професии и ќе им се издаваат визи само на оние кои ќе имаат доволно бодови.
За да ги добие потребните поени , секое лице од надвор ќе треба да го владее англискиот и веќе да има договорено работно место со минимална годишна плата од 25.600 фунти.
„Визите ќе им бидат доделени само на оние кои имаат доволно поени“, објасни во изјавата министерката за внатрешни работи Прити Пател. „Ова ќе им даде приоритет на најдобрите таленти, како што се научници, инженери и универзитетски професори“, рече таа.
Правилата стапуваат на сила од 1 јануари 2021 година, по периодот на транзиција по излегувањето на Велика Британија од ЕУ на 31 јануари, а граѓаните на ЕУ ќе бидат третирани на ист начин како и граѓаните што не се во ЕУ.
„За прв пат по децении, Велика Британија ќе има целосна контрола врз тоа кој доаѓа во земјата и како работи нашиот имиграционен систем“, се наведува во соопштението на владата во документот во кој се наведени плановите.
На граѓаните на ЕУ нема да им треба виза за да останат во Велика Британија до 6 месеци.
„Треба да го свртиме фокусот на нашата економија од потпирање на ефтини работници од Европа и наместо тоа да се концентрираме на инвестирање во технологија и автоматизација. Работодавците ќе треба да се прилагодат“, се вели во владиниот документ.
Министерката Пател рече дека 70 проценти од ниско квалификуваната работна сила во Европа денес нема да ги исполни новите барања, „што значи дека бројот на (имигранти) ќе се намалува во иднина“.
Предлогот на Владата бара од секој странски работник да заработи 70 бода за да може да биде кандидат за работа во Велика Британија. На пример, системот дава 20 поени на кандидатите кои заработуваат најмалку 25.600 фунти, додека оние што го заработуваат само потребниот минимум од 20.480 фунти нема да добијат бодови.
Дваесет повеќе поени ќе бидат доделени на оние кои можат да демонстрираат „релевантни компетенции“ и уште дваесет за потребното ниво на англиски јазик.
Овие мерки не влијаат на 3,2 милиони граѓани на ЕУ кои побараа да останат во Велика Британија по Брегзит.
Што се однесува до студентските визи, тие исто така ќе се засноваат на систем на бодови и ќе бидат отворени за „таленти од целиот свет“, под услов да добиле повик од британска институција, да зборуваат англиски и да можат да ги покријат нивните трошоци.