По апелот на министерот во техничката Влада, Наќе Чулев, случајот попладнево е пријавен од двете новинарки, а од полицијата велат дека ќе постапат согласно законите, како и дека работат на целосно расчистување на случајот.
-Примени се пријавите од двете новинарки. МВР ќе постапи по пријавите, и се работи на целосно расчистување на случајот.
Освен кон новинари, Јакимовски изминатиот период закани упатувал и кон дел од колегите, како и кон директорката на Централниот регистар Марија Бошковска - Јанковиќ. Тој вчера доби отказ од работното место во институцијата, поради суштествени повреди на одредбите од колективниот договор, односно дека ги прекршил одредбите од договорот за вработување, според кои вработениот задолжително треба да го чува угледот на работодавачот.
-Емил Јакимовски ги повредил и прекршил одредбите од неговиот Договор за вработување според кои иако вработениот задолжително треба да го чува, сепак не го чувал угледот на работодавачот и не се воздржувал од сите постапки кои со оглед на природата на работата што ја врши се штетни или ги повредуваат интересите на работодавачот.
Името на Емил Јакимовски започна се почесто да се споменува во јавноста, откако новинари и вработени во институцијата јавно проговорија дека од него континуирано добиваат закани. Од централниот регистар вчера кажаа и дека се сомневаат дека Јакимовски стои зад објавите на Фејсбук страницата на институцијата, на која осамнаа статуси со навреди и обвинувања кон директорката.